محاولة اظهار الرجالة والحقارة على الابرياء منسوبى السفارة…

Posted: الجمعة,14 سبتمبر, 2012 by ياسين شمباتى in اخرى

قرأت قبل قليل على شريط قناة الجزيرة الاخبارى ما الآتى نصه (عاجل : متظاهرون يقتحمون السفارة البريطانية بالخرطوم واخرون يحاولون اقتحام السفارة الالمانية ) ,, او كما جاء …

تعجبت وبشدة من اقحام السفارتين البريطانية والالمانية فى اظهار الاحتجاجات على الفيلم المسئ للرسول الخاتم عليه صلوات الله ورحمته ! او ليس الفيلم امريكيا خالصا ؟؟ام ان السفارة الامريكية بعيدة مكانا ومنالا فآثرت هذه الشرذمة التغول على الابرياء هنا !!؟

ولنفترض ان هذا الاقتحام كان بالسفارة الامريكية , الم يكن الاجدر والافضل للاسلام وللمسلمين ولحفظ بيضة الدين ان يكون الامر على مستوى القادة والرؤساء والملوك والامراء والسلاطين ؟؟ ام ان هؤلاء غير مسلمين ؟؟ انا برررررررررررررررررا .. ام انهم يعرفون التجمع والتبعثر بعده على خلفية مجازر المسلمين فى ميانمار وبلاد آراكان ! خسئتم …

والله لقد وددت ان يكون الخبر هكذا (عاجل : متظاهرون يقتحمون القصر الجمهورى وآخرون يطوقون مقر القيادة العامة فى محاولة لاقناع الجيش بالتدخل لصالح الوطن والمواطنين )..

هكذا كان سيكون للامر شِنة ومعنى ,, حينها كنا سنحظى برئيس (رجل) لا يخشى فى الله لومة لائم , يصدع بالحق ويأمر بالمعروف ولا يعرض عن المتربصين الكائدين لامر الدين .. حينها كان رئيسنا الرجل المسلم سيستدعى سفيره ببلاد العم سام ويطرد سفيرهم هنا ,, وكان سيدعو لمؤتمر وقمة اسلامية جامعة ليحذو الباقين حذوه , اما ان يكون الامر هكذا شرذمة مبعثرة وقلة مستضعفة فهو وربى لعين السفه والحمق والغباء ..

لا اريد ان اشير كثيرا الى رجال الامن والتبن المتواجدين حول السفارتين من بنى وطنى , فهم من الخور والجبن بحيث لا يضربون او يبطشون الا ببنى جلدتهم ! بالله عليكم الم يكن اولى الغضب على من قتل الابرياء بنيالا وعلى قتلة (صفية) ود/على فضل والمعتصم وكل الابرياء فى بلادى ؟؟

هل نصرتم الله او رسوله جين قتل هؤلاء ؟ او حين سفكت الدماء وهتكت الاعراض واستبيحت الاموال ؟؟ مالكم لا تغضبون ولا تقتحمون حين يضام المستضعفون من الرجال والنساء والولدان والطفل ؟؟ افيقى يا امة ضحكت من جهلها الامم,, انكم لا تعرفون لله او رسوله حقا بالامس حتى تعرفوه اليوم ..

رحم الله الرجل الطيب / رجب طيب اردوغان ….

ونلتقى …….

تعليقات
  1. abushagrod2 قال:

    لا فض فوك
    اردوغان مالو ؟

  2. ياسين شمباتى قال:

    ههههههههههههههههههههههههه,,,
    رجل طيب ويراعى المسلمين,,,
    بركة بالجية يا حبيب…

  3. التركي قال:

    شمباتي ههههههههههههههه انت لسه فيك باقي روح وبتسبح ضد التيار ربنا يقويك ….. قيادة شنو وقصر شنو هو انت قايل القايمين ديل قامو كدة عن طيب خاطر ….. مع اعتراضي التام على نقض الفيلم عن طريق القوة والعنف كنت أتمنى أن يكون اعلامنا الاسلامي صاحيا قبل وقوع المحظور لا أقول مسئولينا لأن الحاصل يصب فى مصلحتهم سواء أساء للاسلام والمسلمين أم عدل عن فكرة الفيلم لدى الاخرين …..ايردوغان وصل للمرحلة دي لانه معاه اغلبية الشعب وباختيار حى مش معاهو زمرة منتفعة ونحن محتاجين لاربعة زيهو كدة عشان نحسن التصرف وردود الافعال ….. ولنا عودة باذن الله

  4. AFLAIGA قال:

    شمباتى : يعنى انت داير الحكومه تلقى ليها فرصة تنفث الغضب الشعبى وما تستغلها اسى الغضب الطلع الجمعه ده لو طلع فى مظاهرة سكر ولا رغيف مش كان بيخسرو ؟؟!! ههههههه
    صلى الله وسلم على سيدى وسيد ولد ادم محمد بن عبد الله الامى الطاهر النور الباهر
    شلت يدا من ساء سيدى احمدا
    اسى عليك الله لو اى زول قام اقتدى بالرسول وما كضب ولا سرق ولا نهب ولا ظلم كان فى زول بيتجرا يشتم ولا يسيئ ؟؟
    دعونا ننصر نبينا غير المحتاج لنصرتنا فقد نصره الله دعونا ننصره بالتاسى به وبخلقه ونشوف بتجينا عوجه ؟؟
    رحم الله شهداء السفارة ولكل امرئ ما نوى .
    الوم اجهزة الامن لوم كبير جدا يعنى هم اكتشفو الصباح الجمعه انو حتكون فى مظاهرات ؟؟؟ ياخى بلا لمه
    مفروض من الخميس كل المقار تكون مؤمنه ومحكمة التامين والحواجز ابعد من المدى المؤثر ده لو بيعرفو مدى مؤثر يعنى شنو ؟؟ والفشل هو ان تخرج من الازمة بلا خسائر لانو اى زول عارف انو المظاهره دى لا بتقلب بلد ولا بتكتل مسيئ ولا شيئ ؟؟
    يبقى النجاح انو تتامن المقار وتتاح الفرصه للتعبير وتمنع الشغب والتعدى ؟؟ وده داير ليهو حصة عصر لامنجية النظام استخسر انو اديهو ليهم هنا ؟؟
    بالله يا ابكرون وبشار دى حالة دى ؟؟

  5. نيام قال:

    المسلم الصحيح يغضب و يثور و لكنه ليس بطعان و لا لعان فالمصطفي صلي الله عليه و سلم عندما ذهب مبشرا برسالته الي الطائف فخرج الصبية في اثره بتحريض من علية القوم فاصابوه حتي ادمو قدمية بالحجارة خيره المولي عز و جل في ان يطبق عليهم الاخشبين فقال المصطفي صلي الله عليه و سلم قولته عسي ان يخرج من اصلابهم من يؤمن بالله و رسوله.
    كان الموقف يتطلب الحكمة و الموعظة الحسنة فهم يثيرون علينا غضب العامة بانا غوغائيين متخلفين لا نعرف المنطق و لا المعايشة مع الاخر.
    الاقباط ذوي الاصول المصرية بدعم من اليهود كان كيدهم كيد ساحر..فهم من ناحية ارادوا ان يحرجو النظام الاسلاموي الذي يحكم مصر الان و من ناحية اخري ان يستأسدوا بدعم اللوبي اليهودي في مثل هكذا مواجهة .ولا ادري الي اي حد نجحوا و لكنهم حققوا بعض النجاح .
    عندما رأيت الهبة علي السفارات امس اعتقدت انها هبة عفوية من مسلمين اسئ الي نبيهم فأبت كرامتهم ذلك الفعل الشائن و لكني عندما رأيت ان الهبة يتقدمها الطيب عبدالله و اسحق كرم الله علمت انها مغسولة العفوية و لا تعدو ان تكون مسرحية سيئة الاخراج امنية الانتاج و لا تخلو من ريموت كنترول…
    التركي:
    فيك الخير نحنا عايزين اربعة اردوغان بس!!!??????
    يبقا لي مودر زيرو لو ما اتنين..

  6. ياسين شمباتى قال:

    التركى…
    ههههههههههههههههههههه,,,دا باقى الحيل الما مشدود !! وكلنا رافضين للفيلم ومعترضين على ما تم لكن هل هى دى الطريقة الممكن توصل صوت او نطلع بيها بى فائدة ؟؟ الا يكون لنا فى حلمه صلى الله عليه وسلم اسوة وقدوة حين عفا عن اليهودى الذى آذاه او الاعرابى الذى جذبه من ثوبه ؟؟ لعن الله كل من اساء او قصر..

    افليقا…
    صدقت يا رفيق,,لان اخلاقنا قد تدهورت واهترأت صرنا منهشا ومرتعا للضال من الشعوب وللفاجر منها,,
    طبعا القوات الامنية كان عندها علم بدلالة انو المظاهرات دى طالع ليها ترخيص ! لكن دا التدبير الغشيم للنظام اللئيم !
    بس انا الحارقنى والمجننى انو فى اخبار عن انو الاتكتلو قرب السفارة الامريكية اصيبوا برصاص المارينز ! لو صدق الامر تكون دى كارثة تانية …

  7. ياسين شمباتى قال:

    نيام…
    هههههههههههههههههههه,,فاضل يطلعوا فيها ايمان لندن وعلوية بنبر ! قبح الله افعالهم ….
    ياخ امس فى قبطى اسمو (الانبا شفيق) قال كلام موضوعى , حيث طالب بتكوين محكمة او هيئة دولية لمنع التجاوزات واهانة الاديان,ودا كلام سليم جدا ..
    لكن الحصل امس من ناسنا كان قمة السفه والعبط ….

  8. AFLAIGA قال:

    نيام الحبيب:
    جسجسة مرسى ستستمر حتى يهلك دونهم . اقباط مصر ديل ما زى حقننا ناس ميكى فيلوثاوس وعبدو تادرس وزاهر اسطفانوس فرج والناس الحلوين البيرفعو معانا الفاتحه ولا شنو ؟؟
    خلى بشاوى يحكى ليك عن ميكى ولا شمباتى يحكى ليك عن الدكاترة الاقباط الفى السودان ولا انت ذاتك تحكى لينا عن قبطة مدنى وكوستى ولا احكى ليك عن ناس اسطفانوس فرج . ده ما صراع بين مسيحية واسلام دى قصه اكبر من كده .
    شمباتى : يعنى لو فحصو بصمة الطلقة حيقولو لينا ديل المارينز كتلو المسكين ؟؟ طبعا لا .

  9. ياسين شمباتى قال:

    هههههههههههههههههههه,,,طبعا امريكات مضوقاهم يدها وصواريخها قبل دا !
    فيستحيييل يهبشوها بى كلمة كدة ولا كدة…

  10. المندهش قال:

    الحكاية وما فيها إنو دي الشتارة وليست الشطارة
    الجماعة ما صدقوا يلقوا ليهم فرصة زي دي وأهو الحمد لله طالما قالوا سيرسلوا جنود المارينز لحراسة السفارة سيفعلوا وهم عند قولهم … مش زي جماعتنا .. وسيستمر الإلحاح وستستمر شتارة جماعتنا الى ان يتحقق المراد ,,,,, وربنا يتمم على خير

  11. ياسين شمباتى قال:

    المندهش…
    ههههههههههههههههههههههههه,,فاكر قصة الحاويات اللى قعدت فى الميناء ستة شهور وبعدين دخلت ! وطييييب !!
    وشتارة وقمة العوارة ,,, وعجبى ,,,

  12. نيام قال:

    غايتو انا ما بعرف لكن حسب تجربتي كان جا مرينزاوي واحد تاني آب مرقو…ات ما شفتوهم في بعقوبة حرم الخرتوم تبقا بعقوبة باللبن..

  13. بت وراق قال:

    الاخوه الاعزاء
    سلامات
    انت عارف ياشمباتي الموضوع دا مدور ليهو يومين وانا بره الشبكه عندي بتي عندها امتحانات بالصدفه فتحوا التلفزيون وسمعته الخبر وانا قايله الموضوع احياء الذكري السنويه لموضوع الفلم المسئ اتاريهو دا فيلم جديد
    السوال هو هل فعلا هو فلم جديد ام امتداد للفلم القديم ؟
    ام هو شي في نفس يعقوب ؟
    ام هو اثبات لصور معينه اتجاه المسلمين؟

  14. ياسين شمباتى قال:

    نيام…
    ههههههههههههههههههههه,,,البلد بقت كلها بعقوبة وكابل و ثيل غوانتنامو !!

    بت وراق..
    حبابك وحباب الجابك…دا عشان تعرفى انو المسلمين من الوهن والضعف والسفه بمكان ,, لاهم قادرين بتخذوا ردة فعل محترمة لا قادرين يمسكوا خشومهم عليهم,,قاااادر الله..

  15. المندهش قال:

    جاء في الاخبار مايلي :
    قلل حزب “المؤتمر الوطني” من تهديد الإدارة الأمريكية بنقل بعثتها الدبلوماسية بالخرطوم إلى إحدى العواصم الأفريقية بدعوى عجز الحكومة عن توفير الحماية اللازمة لأفراد البعثة ورفضها دخول قوات أمريكية من “المارينز” للقيام بهذه المهمة.
    وأشار الدكتور ربيع عبد العاطي عضو القطاع السياسي بالحزب في تصريحات صحفية عقب اجتماع القطاع اليوم الأحد، إلى أن الخرطوم تعد من أكثر العواصم على مستوى محيط السودان العربي والأفريقي أمنا، وقال إن مثل هذا الحديث محاولة للتشكيك فى هذه الحقيقة.
    شفتو الكلام ده كيف !!!! أنا من هذا المنبر أرفع طلبي لمنظمة الإتحاد الأفريقي و الجامعة العربية والأمم المتحدة بتغيير إسم جمهورية السودان لجمهورية المؤتمر الوطني … و حق الخروف عليّ !!

  16. ياسين شمباتى قال:

    المندهش…
    هههههههههههههههههههههههههههههه,,ما جمهورية ,, دى (اقطاعية المؤتمر الوطنى) ! بااااااااااااااااع…
    بعدين (ربيع) دا لسه خالينو ينضم على كيفو !
    قااااادر الله,,
    ويا خرطوم جوطى جوطى,,,

  17. نيام قال:

    بما انو المارينز معظمهم افارقة و بعضهم سوادنة فانا اقترح لحفظ ماء وجه الحيكومة و تفويتا للفرصة علي السادة الامريكان المبيتين لنقل سفارة الاستيت من بلادنا الحبيبة و التي يا دوبك ضاقت السفراء الخواجات الجد جد اقترح السماح لمرانزة من اصول سودانية و خاصة مرانزة شوايقة بحراسة سفارة الاستيت…لانو لو مرانزة جعليين احتمال يشوتو السفارة ظاتا…

  18. ياسين شمباتى قال:

    هههههههههههههههههههههههههه,,ما بسولوم شفخانة كمان ويشغلوا فيها تمرجية ؟ وى وى وى

  19. AFLAIGA قال:

    نيام : ده من منطلق انو الشايقى ان نجح للمارينز الامريكية وان سقط للطورية

  20. المندهش قال:

    الأخ نيام ثرو شمباتي
    ما عندكم أي مشكلة وعندنا السوابق منذ أربعة سنوات وبعد ممانعة وغنج وافقنا بتكوين قيادة القوات الهجين في دارفور، والتي يصل عددها إلى 20 ألف جندي و التي يقوم بقيادتها قائد إفريقي و التمويل والسيطرة والإشراف بوجه عام للأمم المتحدة يعني زي ماتقول كده من ( بت حرام ) من ام أفريقية وأب أبيض
    د/ شمباتي …. وداعاً للغربة .. حيعملوا ليكم شفخانة بس تعال إنت سااااي ،

  21. ياسين شمباتى قال:

    الحبيب المندهش..
    ههههههههههههههههههههاااى,,كان ليهم !! المطرطش منو البرجع فى العهد السادى دا ؟؟ ياخ ديل ضلموا البلد واخفوا معالم الارواح ودثروا الاخلاق,,,حسبى الله عليهم…

  22. نيام قال:

    المندهش:
    ياخوي ديل ولا دايرين سابقة و لا مسبوق ديل هم ظاتهم سابقة…وحيعملوها حيعملوها اقول ليك حاجة كمان حيقولو للامريكان شكوهم لينا شوايقة و جعلية …وكمان اقول ليك طبعا الامريكان شاربنهم موية حيقوموا يعملوا ليك ليهم معسكرين مرينز و يسمو ليك المعسكر الاولاني المرانزة الفوق و المعسكر التاني المرانزة التحت وحيقولوا نزولا لاحظ (نزولا) علي رغبة الحيكومة فان حكومة الاستيت تدع امر وضع اختيار الحراسة للحيكومة السودانية… و طبعا في النهاية كلهم مرانزة…
    وطول يا زمن اقصر يازمن يتكامجوا المرانزة الفوق مع المرانزة التحت و تتدخل السلطات السودانية فيقوم الامريكان يقولو نقسم بين المرانزة علي طريقة نيفاشا و يصبح المرانزة الفوق ارض تابعة للاستيت و المرانزة التحت تابعين للامم المتحدة شفتو كيف؟؟؟

  23. ياسين شمباتى قال:

    البشاوى..
    ههههههههههههههههههههه,,اتم شنو يا زول ؟؟امممممم

    نيام…
    ياااارب نكون احنا الفوق !!

    • بت وراق قال:

      انت عارف ياشمباتي الوصل الحال لى كده شنو زي كلام اخونا نيام الكان نايم وصحوهو في زمن الانقاذ يكون الكلام فى موضوع معين فجاء يدخلوا ليك جعليين شوايقه هدندوه جنوبين فور دينكا والموضوع يجوط شقلوا الناس بالقبليه ونسوهم دينهم عشان كده تلقى دايما ردات الفعل غير متزنه

      • الد مدنى قال:

        بت وراق الله لا تاجرك … شليله مفكراتك تسوطي شمال يمين … عفوك يا نيام الما بعرفك بجهلك وامسحها لي في وشي … عاجبك كده يل بت وراق .

  24. AFLAIGA قال:

    بت وراق :
    كلامك كلو سمح بس نيام ماعرفتيهو ده صاحى من زمن عبود هو قاصد حاجه تانية وبعيد عن القبلية وطبعا هو ما حيرد ومعذوره المابعرفك يجهلك حسن النيه معروف عنك يا بت القبايل اقرئى لنايم لتتعرفى عليه من قرب .

    • بت وراق قال:

      اخي افليقا
      سلامات وتحيه وموده
      انا لم اقصد بان نيام هو الكان نايم وصحى ابدا انا قصدي انا مفهوم التعامل بالجهويه والقبيله هو الكان نايم وصحى في زمن الانقاذ ولم اقصد نيام الشخص والانسان الفي المدونه
      وله العزر مني اذا فهم كلامي بقير القصد المطلوب

  25. ياسين شمباتى قال:

    ههههههههههههههههههههههه,,,اصلكم ما بتمشوا دغرى ! نجررررررر…

    بت وراق وافليقا…سلام وشوق ومحبة,,,

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s