موجه جديده من الاعلانات تغزو صحفنا الاعلانيه وتسرى بسرعة البرق نحو الصحف الاجتماعيه والسياسيه ثم الاذاعة والتلفزيون . اعلانات لطالبى الزواج واخرى لتقوية القدرات الـ…….. .
فتاتى للبحث عن شريك الحياة . هل انت وهل انتى جاده فى البحث عن شريك الحياة ام تضيع وتضيعين الوقت. نحن نوفر لك / ى قاعدة بيانات ضخمه . مهندسين اطباء رجال اعمال ، سيدات اعمال ، ارامل ، مطلقات ويوجد لدينا زواج تقليدى ، عرفى ،مسيار وكل ما يخطر ببالك .مع تلفونات ملحقه بالاعلان .
ليس هذا فحسب بل ان المتجول فى مواقع الانترنت يجد مواقع لطلبات الزواج مدعومه بالصورة والصوت . شابات فى مقتبل العمر ينشرن معلوماتهن الخاصه والخاصه جدا عبر المواقع الاسفيريه المختلفه . وقصص عن احتيالات بالجمله كان ابطالها ازواج متوقعون تعارفوا عن طريق الانترنت .
ومن باب حب الاستطلاع دخلت الى احد هذه المواقع فوجدتها طويلة صفراء شعرها سبيبى وجامعيه بل لها دراسات فوق الجامعيه ومن اسرة محترمه ومحافظه كمان . فقلت فى نفسى اذا كان ذلك كذلك فلماذا اضطرت لعرض نفسها كسلعة بائره على الانترنت وتذكرت نكتة الشيخ عائض القرنى الذى طلب منه احدهم امرأة تحفظ القران بالسبعه روايات بالاضافه لصحيحى البخارى ومسلم فاجابه الشيخ بقوله :
هذه مواصفات امرأة تصلح للامامه ولو وجدناها لبايعناها اماما للمسلمين .
ووجدته رجل اعمال ويجيد اللغة الانجليزيه والالمانيه والروسيه والعبريه تحدثا وكتابة وفوق هذا فهو رجل اعمال مرموق ولم يسبق له الزواج . لا بالله رجل اعمال ومرموق ويبحث عن شريكة حياته عبر الاسفير .
مكاتب الزواج التى جائتنا فكرتها من مصر كما اعتقد انتشرت فى الخرطوم كانتشار النار فى الهشيم وما عليك بعد قراءة الاعلان سوى الاتصال ثم زيارة المكتب ودفع مبلغ يتراوح بين خمسين وخمسة وعشرين جنيها ثم كتابة ملفك الخاص الذى يحوى مواصفاتك وعنوانك ومواصفات من تحب ان تراها شريكتك فى الحياة والباقى عليهم .
والاسئله التى تطرح نفسها .
هل تعرف اخرين تزوجوا عن طريق الانترنت او عن طريق مكاتب الزواج الوليده ؟؟
وهل تعتقد ان زواجا يتم بهذه الطريقه سيكتب له النجاح ؟؟
وهل تعتقد ان هيفاء التى تعرض نفسها للزواج على الانترنت يمكن ان تكون كوكو القبيح صاحب الشنبات الطويله والعضلات المفتوله والعكس ؟؟
وهل تعتقد ان اصحاب المكاتب المتخصصه فى الزواج يدفعهم حبهم للعمل الانسانى وحديث المصطفى صلى الله عليه وسلم (تناكحوا تكاثروا فانى مباه بكم الامم يوم القيامه ) ام انهم يسعون للكسب الرخيص باستغلال هذا الوتر الحساس جدا ؟؟
كسره :
جاء فى الاخبار ان الرئيس الامريكى المفدى !!! امر بفك الحصار الانترنتى المفروض على السودان وكوبا وايران وسيتيح هذا الاجراء لمواطنى تلك الدول الاستفاده من خدمات قوقل ومايكروسفت . طبعا اخوكم ما فهم حاجه لانو عمك قوقل دا قاعد معانا من زمن طويل ومستفيدين منو اقصى فائده بس لو فى حد عارف حاجه يقول لينا .
سوداننا 
سلامز
مع التطور التكنلوجي و حكاية الألفية التالتة دي البحث بقى بالنت و الفيسبوك
زمان كانو بيقولو
نظرة فابتسامة فموعد ف لقاء
بس مع ( شباب الزمن دا ) بقت
أدد.. فشات .. فموعد ف لقاء
و هنا بيبدأ تكسير الواح التلج للمحبوبة الوهمية او الافتراضية و هاك يا
انا بي لقاك مهتم بس كيف تلاقيني
يا عابره عبر الدم شايلاك شراييني
لو عمري يتقدم واضمن تلاقيني
انا بعدو ما بندم لو مت في حيني
و
ليه بالصور أنا برسمك
و يطمنوني و اطمنك
انا نفسي مرة افهمك
الحب مش البوم صور
و
طمني عليك .. قول فين ألاقيك
مشتاق لعنيك .. و بموت من شوقي ليك
طبعا بعد اللقاء الاول هي بتكتشف انك ماسورة الشركة و زول بتاع حنك و نقة ساي و لسة ما بقيت على العرس فبتقوم هي تمسك بيك زمن لحدي ما تلقى العريس الجاهز كان مغترب ولا من إياهم و انت تشيل و تعزم
كان بقى اول الشهر .. كانفوري راس
و كان بقى نصو .. شارع المطار سفر
و كان بقى على آخر الشهر .. حبيبي مفلس محمداكم
و الاكتر انك تكتشف انها ماسورة اطناشر بوصة .. لا جمال لا علم ولا اي حاجة تانية …. فالأكيد انك توقف الاتصال بيها .. تتجاهل مسكولاتها و مسجاتها … و تشوف ليك شغلة تانية
انشا الله تشتغل في السياسة …
الزوووووول سلام
كنت قد كتبت مقالا عن هذا الموضوع.ز ألخص لكم بعضا منه ….طبعا يا حبيب لازم الناس تواكب مش في تجارة إلكترونية، و في بريد إلكتروني، و قالو ا كمان في حب إلكتروني، و بعيد عنك قبلة إلكترونية، اذا لا بد من الزواج الإلكتروني و الذي كان بدايته من خلال مكاتب تستخدم الكمبيوتر في التوفيق بين الشباب، الفتيات من راغبي الزواج، لتقوم بدور إلكتروني جديد هو الخاطبة الإلكترونية، لتحل محل الخاطبة التقليدية.
طبقت هذه الطريقه بالخارج ولاقت نجاحا… فما الذي يجعلها ممكنة التطبيق عندنا رغم مجتمعنا العربي و الاسلامي و اختلافه عن المجتمع الأوروبي هل هو ضيق الفرص للقاءات المباشرة، ما المكاتب و الجامعات مليانه بنات و أولاد….. لكن أعتقد ما زال الرجل عندنا يعتبر زميلته في الجامعة رصيفة و مماثلة له في السن فقد لا تكون شريكا مثاليا لا سيما في ظل قلة المعروض من الوظائف و المتغيرات الكثيرة التي تعترض طريقة….. و تعتقد أيضا البنت بأن زميلها أيضا هو مشروع زوج فاشل اذ كيف لها أن تضمن بأنه سوف يتخرج مثلا فضلا عن ايجادة وظيفة كما لم بعد الأستاذ مشروعا ناجحا أيضا في ظل سهام المعجبات من جميع انحاء المدرج و المدرجات المجاورة و الذي غالبا ما يشتت أفكاره و في النهاية يلجأ لأخواته في الحصول على الزوجة.
فالكمبيوتر هنا يمكن لاجراء هذا التعارف فقط وبعد ذلك ربما تجري الامور بعيدا عن الكمبيوتر كأي زواج آخر فهو يعتبر خاطبة ولكن على الطريقة العصرية واعتقد انها اكثر تطورا وتنظيما من الخاطبة التقليدية.. و قد سمعت و شفت زواجات تمت عن طريق المنتديات….
لكن ربما يدفع طالب الزواج و يضع معلومات غير حقيقية عنه كرجل الاعمال الناجح الماعرس لليلة دا و داير ناس المكتب يشوفوا ليهو عروسة…. أكيد دي مكنة ساكت (مكنة مصطلح شبابي يسأل من معناها مشاكل) … فالغالب معلوماتو غير كدا و يحب أن تنهال عليه الطلبات لأن به نقصا ما و يحس بأنه مرغوب…
فالكمبيوتر يعج بالمنتديات و المدونات و المواقع الشخصية و التي أعتقد و من وجه نظري انها أفضل من تلك التي تخصص لطلبات الزواج مباشرة فالمشارك في هذه المنتديات و المواقع تجذبه المواضيع و المداخلات فيها و ربما لو داوم في احداها و انتظم في ارسال مشاركاته و مداخلاته ما يحقق غرض التعارف الذي لا يرمي لغير ذلك في البدء و رويدا رويدا ربما يفتتن أحدهم بمداخلة “كاربة” لاحدى المدونات و الا العكس و يحصل التقارب و التي قد تكون دون أن تقصد في مداخلتها قد أشارت لخطوبتها التي “طرشقت” لعدم التوافق بينها و بين خطيبها المتزمت الذي يريدها أن تبقى في المنزل و لا تعمل فهي نعم مقتدرة و لها شقة تمليك اشتراها لها والدها هدية لاتمام الزواج و لكن لم يتقدم الأمر من ذلك و بقيت الشقة في انتظار فارس آخر.
هنا يقوم واحد عزابي يرمي أضانو و يوجه مداخلاته نحو تلك البت بغرض استمالتها و جرها نحو السكن معهم اذ تغير الحال الآن و صار تصريف الآية “لتسكنوا معهم” و ليس اليها.
عموما لا أؤمن بأن الكمبيوتر هو مجرد آلة مجردا من الاحساس يمكن أن يخاطب العقل فحسب فوراء الكمبيوتر انسان له عقل و قلب و احساس قد يصل الى ذلك التقارب مع الطرف الآخر و قد يكون حظه أو حظها أكثر من غيره/غيرها و تتوج تلك العلاقة….
و أبشركم بأن بطاقتي جاهزة و مجدده.
الزول أبو سبعه واوت سلام وكلام
والكلام عند أم العروس وهي بتاع/ت
دكان الزواج أقصد مكتب الزواج
_____
موضوع عمك قوقل دا يحول إلي إسترايكر للنظر والإفاده
بصراحه ناسك ديل-مكاتب الزواج- ديل ما عندهم مودوووع
أما موضوع ناس قوقول و المايكروسوفت دا فهناك بعض الامكانت بتاعاتم ليست متوفرة لدينا كفتح بريد الكتروني في قوقل و الاستمتاع بقوقول كروم(متصفح تمام نزلتو في ماليزيا و لمن جيت أشغلوا في الخرطوم قال لي حيلك) و بعضا من برامج الخرط و كدا و نفس الحال مع مايكروسوفت…و طبعا السودان ما زال لا يستطيع التمتع بمزايا التجارة الالكترونية و لا القبلة الالكترونية ذاتو….
الغريبة كانت الحرب مشتعلة بين الصين و أمريكا اذ الأولى تتحكم في برامج قوقل و ناس أمريكا دايرينها مفتوحة في الصين و نحن مقفلنها علينا… حظوظ
بعدين يا الزوووووول وين الطماطم هنا ؟؟
الاخوه عزت ومشاكل وعبد الرحمن ود احمد سلاااام
اشكركم على المرور من هنا . وعندما طرحنا اسئلتنا الحائره كنا نرجو افاداتكم ونعلم اننا سنعثر على بعض ما اشكل علينا .
المهم الموضوع جدير بقتله بحثا . ويا عزت قصة المنتديات دى فكره رائعه لكننا لم نعثر بعد على الواحده العندها شقه واخدت شاكوش . والمنتديات افضل الف مره للتعارف (لاى غرض) من مواقع الزواج التى يدخلها بعض المتطفلون والعابثون والعابثات والزهاجه .
ويا مشاكل انت من زمن الواحد يمشى كانفورى يا اخ الكتوف اتلاحقت واحتمال ربنا يفتح عليك بواحده توديك امواج وسيدى بيه وكانفورى زاتوووووو . بس الله يكافيك شر الجماعه اياهم اما المغتربين فينطبق عليهم قول حرم النور نحن زمننا فاااااات سمحه السياسه وسمح المال العام نحن زمنا فاااات .
والقوقل والمايكروسوفت دايرين المزيد فقد كنت وما زلت اعتقد اننى بامكانى عمل ايميل على الجيميل وهو تابع لقوقل . لكننى اعتقد اننا لم يصيبنا كبير ضرر من الحصار القوقلى لاننا بامكاننا ان ناكل مما نزرع ونبحث مما نقوقل او نعرب (موقع عربى للبحث ) وهكذا لن يزيدنا الحصار الا قوة .
اما الطماطم يا دكتور فقد تشابه علينا البقر من كثرة التجار فبعضهم يعرض الطماطم واخرون يعرضون الزوجات والازواج كما ان رابط الرخسه متوفر فى كل ولا نستبعد ان يأتينا زمان يصيح فيه الباعه المتجولون (اقصد الخطاب ) ويصيحون العريييس العرووووووس .
الله يسمع منك يازووووول ونكمل الربعين الباقيين من الجواهز ديل (الوجبات السريعة)
وياليت يكون في عروض (تزوجت واحدة واحصل على الثانية مجانا) ياسلام
هجار سلاام
بترجى بله يا هجار
كسره: بله هو صراف المعلمين فى منتصف التسعينات والذى كان الساده الاساتذه ينتظرونه لقبض المرتبات وفى النهايه يقبضون الريح .
الزووووووول السمح سلام
الحبان في كل مكان سلامات
تتعدد الأسباب والزواج واحد، وقد فرض إيقاع العصر السريع وسائل ووسائط جديدة قد يجردها البعض من المصداقية لكن لا جدال أنها تفسح مجالات واسعة جدن للحوار والتعارف والتخاطب وربما التزاوج، وأعرف صديقاً عزيزاً من نيجيرياً تزوج بفتاة رومانية بعد علاقة إلكترونية وثيقة إستمرت عدة أشهر وتوجت بالزواج بعد أن سافرت العروس له وتزوجته من حر مالها وهكذا الأمر مع صديق مصري تزوج فتاة باكستانية بعد علاقة إلكترونية وعاش الجميع في تبات ونبات وخلفوا صبيان وبنات أماأن تحكموا بالفشل على هكذا علاقات فليس عادل صحيح أنه مخالف للتقاليد والأعراف الإجتماعية لكنه موجود وحقيقي وآخذ في الإزدياد وليست العلاقات بين الجنسين فقط بل العلاقات الإنسانية الواسعة وما علاقاتنا الوثيقة جدن جدن مع معظم أقطاب الدانقا إلا نتاج لهذا التفاعل الإلكتروني.
أبو عصمت ((أبشركم بأن بطاقتي جاهزة و مجدده)) يا ربي البطاقة برضو إلكترونية وبت عم الجواز الإلكتروني القادم أم تقليدية هههههههههههها
ولدنا الباشمهندس .. مشاكل ..
الآن عرفنا سبب إنشغالك بالسياسة ……. وياسرعرمان …!!!!!!!!!!!!!!
مخير سلااام
اهو انت كدا يا مخير جبتها من الاخر ودا الشغل زاتووو .لكننا لم نحكم عليها بالفشل ونتمنى ان يفتح الله تعالى على صديقنا هجار مثل ما فعل اصدقاء مخير وتجيهوا واحده كدا ان شاء الله امريكيه زاتو وتتزوجه بحر مالها .مالو كتيره على الله ؟؟.
فقط يا مخير كنا وما زلنا نتخوف من بعض ضعاف النفوس الذين يلجون الى هذه المواقع فيتلاعبون باعراض المسلمين واعراض الكافرين كمان .
كما اننا لا ننكر فضل هذه التقنيه علينا حيث جمعتنا باناس خيرين ومستنيرين ينطبق عليهم قول حبيبنا صلى الله عليه وسلم عن اصدقاء الخير ((ان احسن اعانوه وان اخطأ ذكروه … او كما قال )).
بالله يا سلاوى انت ما عارف انوالسياسه بقت مصدر دخل وكدا ؟؟
مخير
لو فى امكانيه تخلى صديقك المصرى دا يتداخل معانا هنا فشان نستفيد من تجاربه وكدا .
ولا شنو يا شمباتى ؟؟ هو شمباتى وييين
سلام ياقبيلة،،
زووووووول ورواد منتداه الكرام!!
واضح أنك طرقت موضوعا” حيويا” جادا”، ومن الأهمية بمكان حيث أنه من الممكن جعله كجزء من البرامج الانتخابية وكأحدي العلل والأمراض التي باتت تجتاح مجتمعاتنا المحافظة والتي ماعادت كذلك ياصديقي!!
والشاهد في الأمر أن هذه الغرف المسماة غرف الدردشة والشات، ومواقع الزواج الافتراضية هذه ، تعتبر مواقع غير سوية علي الإطلاق، لما فيها من محاذير شرعية تقود الناس نحو الهلاك الا ما رحم ربي.
وهذا الكلام من واقع هذه المواقع حيث تجد الجرأة والتفلت وعدم الحياء الذي يجب أن يكون زينة المرأة، وتاج الرجل، وامرأة بلا حياء لا خير فيها إذ أن الحياء من الأيمان، وهذا الأمر يعرفه الكثير من الناس ولا يحتاج لتفسير أكثر.
كذلك تجد هؤلاء الأشخاص الذين يدعون الرغبة في الزواج يعلنون عن أنفسهم بأسماء مستعارة أو وهمية وهذه أول خطوات الغش والخداع والتدليس، إذ أن هذا الموضوع يحتاج للوضوح والصدق والإخلاص.
والمشكلة تكمن في مدى جدية المعلنين من خلال هذه المواقع، لا سيما الشباب والذي يتصفح هذه الإعلانات إنما يتعامل مع (أشباح) لا يدري ما حقيقتها، ولا يعلم الصادق من الكاذب، ولذا ينبغي أخذ الحيطة والحذر في التعامل مع هذه الأشباح. ومعلوم أن الإنترنت من الوسائل التي يمكن أن تستخدم في الخير، كما يمكن أن تستخدم في الشر، ولكل منهما مبتغوه، وواجبنا كمسلمين اليوم الاستفادة من هذه الوسيلة في نشر الخير والفضيلة. والواجب كذلك الحذر أشد الحذر مما من شأنه أن يكون سبباً في الفتنة والوقوع في حبائل الشيطان.
أسأل الله لي ولكم الإخلاص في القول والعمل، وأن ييسر لكل رجل وامرأة، يبحث ويجتهد في أعفاف نفسه بالحلال، الشريك الصالح الذي يكون عونا له على الطاعة وعلى كافة أمور دينه ودنياه.
اهلا حباب ود الخلا
وعلى طريقة اذاعة لندن نقول : هذا راى اخونا ود الخلا لكن الاخ مخير فى اسلام اباد يختلف معه وبالتالى دعنا نستمع لمخير .
وبالنسبة لى فانا اعتقد ان كثيرين جدا لا يتعاملون مع مثل هذه المواقع بالجديه اللازمه كما ان بعضهم يصدق فيما يكتب ويشتشت ولهذا وجدنا بعض الناجحين امثال اصدقاءنا النيجيرى والمصرى (صديق صديقك صديقك )
زول والسمار الكرام السلام عليكم جميعا …
تزوجا بعد علاقة دامت طيلة سنوات الدراسة الجامعية لم يمض عليهما ثلاثة سنين والا قد كان منفصلين …. بعد أشهر قليلة تقدم كل منهما لمكتب زواج وكتب كل منهما أوصاف شريكه المثالية وكانت المفاجاة ان جمعهما المكتب مرة أخرى … بتسالنى النهاية ؟ قررا ألا يفترقا الى الأبد …
نحن مانشين المواقع لوجود ضعاف النفوس بها فالتكنلوجيا تأتى بحسناتها ومساوئها ويستفيد من يستغل فوائدها … يجب أن نحل المشاكل بدلا عن بترها .. أعتقد انه من الأجدى ان نسعى لدراسة تقلل من مخاطر الناشزين … لكم التحايا
سلامز
دعني أختلف معك للمرة الأولى يا حبيبنا ود الخلا
فمواقع الشات و – أنا مدير لأحدها في الانترنت و عضو في كثير منها – لا تحمل هذه الصفة على الإطلاق ( غير سوية ) فهي وسيلة للتعارف بين الاعضاء و تجاذب أطراف الحديث في المواضيع المطروحة للنقاش و التي تهم فئة معينة مثل فئة الشباب .. فيها كثير من العمل الخيري مثل زيارات دار المسنين و اطفال المايقوما و غيرها من دور الرعاية … أيضا يمكن أن يكون موقع للتعارف بين الأزواج المحتملين …. ليه لا ؟؟
السلام عليكم
كل هذه الوسائل لها محاسنها ولها مساوئها
والحذر واجب لان الماكرين موجودين في اي مكان واي زمان
يا اخوانا كلنا عارفين انو اسرنا كلها اسر محافظه جدا- وحتى لو جاهم عريس لي بتهو بيتعرض لسين وجيم- شفتها وين-اتكلمت معاها كيف شغال شنو اهلك من وين- المهم وبد داك يروحوا يجمعوا معلومات لحدي جدو الخمسطاشر-ولو عجبهم بيدوهو ولو ما عجبهم بيقولوا ليهو البت دايرا ود عمها
فما بالكم بعريس ياتي عن طريق النت او عن طريق مواقع الزواج سوى اعلنت في جريده ولا غيرا
حقيقه نحن الان في زمن صعب زمان كان الدنيا بي خيرا والامان موجود لكن الان الزمن اتغير وكثر الاجرام
اما بخصوص غرف الدردشه-فصارت متاحه ولو اصلا البنت متربيه تربيه صحيحه ممكن تستخدمها في حدود
والف شكر للتكنلوجيا لجمعها لنا واياكم- خير اخوة وخير اباء مرشدين لنا محافظين على القيم الساميه النبيله بيننا
لكم التحيه
صديقي مشاكل، أختلاف الرأي لا يُفسد للود قضية، ولكن ما اعنيه بالطبع تلك الغرف التي بنيت علي باطل، وما بُني علي باطل فهو باطل يا صديقي، ولكن أن تكون هنالك غرف سوية وتحمل صفة السوية فهذا شاذ والشاذ لا حكم له وهذه غالبا” تكون غرف جماعية ومنتديات مكشوفة للعالمين، وغرف الشات المقصودة ياسيدي تلك الغرف المظلمة والمغلقة والتي يكون فيها التناجي بين شخصين والشيطان ثالثهما، وهذا لا جدال فيه ولا فكاك منه ، ومهما حاولت أن تثبت للعالمين أن النجوي بين أثنين هي سوية ، ولا يمكن للشيطان أن يكون ثالثهم فذلك سراب ووهم..
عليه أوفقك في كلامك الأخير وواضح أنك تقصد نقاش جماعي ومواضيع كُلية مطروحة أمام الجميع والكل يشارك والجميع يدلون بأرائهم في جماعية، ولكن الأنفرادية هي التي تقود الناس للمهالك، والكلام هنا يقودني للأجابة علي تساؤل الزووووووول عن سر رفع الحظر أو الحصار الانترنتى المفروض على السودان وكوبا وايران ومدي ما يتيحه هذا الاجراء لمواطنى تلك الدول من الاستفاده من خدمات قوقل ومايكروسفت، يعني يالزوووووووول أنت مفتكر أنو دي مساعدة لينا وكده؟؟
يا أخي دي واحدة من أساليب الغزو الفكري التي أحتوانا بها هؤلاء القوم ونحن في نشوة وسُكر بأنهم أنعموا علينا بهذه المنحة الدسمة وهي سما” زُعافا” يحمل في طياتها فناء هذه الأمة وأندثارها، وسترون العجب الُعجاب يا سادة!!!!
سلامز
كويس طلعنا متفقين في الموضوع ..
لكن أقولها لك .. كل مواقع الشات التي تفتح الباب على مصراعيه لدخول الصوت النشاذ لا تجد لها من المداومين الا القليل ..
فهي كالزبد يذهب جفاء … و معظم الشباب المحترم عندما يجد هذه الغرف غرف بلا أهداف لا يدخل إليها و إن دخل سرعان ما يخرج منها …
فهي كاللبن تماما .. تفور و تنطفيء
الأخ/زول وجميع المعقبين
السلام عليكم
معليش يازول علي الواو الواحدة (بخل كدا)
صراحة الموضوع جميل والنقاس فيه قد يدخلنا ابواب كثيرة ومتداخلة بين المعرفة والتكنولوجيا والدين، لكن الواضح جدا انه في الآونة الاخيرة اصبح من لا يتعامل مع غرف الشات وهذه المواقع هم قلة قليلة جدا, وربما تكون هذه المواقع ومكاتب الزواج هي ناجحة الي حد ما في كثير من الدول والاروبية تحديدا لثقة الكثيرين في قاعدة البيانات الضخمة التي يمتلكها المكتب ولصدق المشاركين فيها (يعني الخواجات ما كذابين) عكس كل الدول العربية لانها مرتبطة بالسمعة والوضع الاجتماعي (بالله ود ناس فلان او بت ناس علان صورهم قالوا ليك فى الانترنت ).
وفي مرة سابقة قرأت فتوي لشيخ سعودي يجوز النظرة من خلال الماسنجر للذين يودون الخطبة بأعتبار انها ليست وجها لوجهه, والتلفون ايضاً يعنبر من اهم وسائل الكذب الاسفيري (دا مارقم علان او فلانه) وبعد داك الموضوع يجر .
دا كلو كوم ونظرة الرجل السوداني لهذه الامور كوم تاني فهو لا يثق بتاتاً في هذه المكاتب والمواقع وطبيعي جدا عندو الادلاء بمعلومات خاطئة والدخول عندو اكيد لحب الاستطلاع مااكتر. في ذات مرة اتهمني زميل لي بأنني معقدة لمجرد انني لا امتلك حساب علي موقع الفيس بوك . صراحة الموضوع له اكثر من اتجاه وهو موضوع حيوي جدا .
انا قاعدة فى امزونيا زي ما بتقولوا فى الخرطوم (الكلام دا للحاج السلاوي )
لنا عودة
ما شا ء الله مشاكل مع اواصر وقمة الروعه
لم يبق لنا ما نقوله غير الترحيب بالاخت اواصر (الصداقه)والاستمتاع بما تسطرون .
كسره : لكن يا التركى لقيتك خترى كلوو كلووو
التركى : قلتا ليا لفوا وتانى رجعوا الميس
زووول ابو 100 واو
عارف الايام دي الدخول لايميلك القسري من مواقع اعلان الزواج بقت حكاية خاصة موقع بنت الحلال والغريبة كميات من السودانيات مختلف الاعمار ومواصفات الزوج اي جنسية بقينا زي المغرب ….ولسه الله يستر
فك الحظر الامريكي للنت للثلاث دول عمل استخباري بحت من قبل الاستخبارات الامريكية يخدم اهدافهم وتكتمل الدائره بالفيس بوك ….وانصح الشباب بعدم وضع صورهم الشخصية في الفيس او في اي موقع ومجرد وضع صوره اي صوره عبر النت تحفظ منها صوره في السيرفر الكبير بامريكا وكلكم شاهد كيف استخدمت جوزات مزوره باسماء حقيقية وصور في عملية اغتيال محمود المبحوح في دبي……
.ثانيا الفيس يطلق مواقع (كانيتا) وتحديد الحب ..زوالمزاج والشنو ما عارف وغيره وتشترط عليك مثل هذه الاشياء بانها ستاخذ معلوماتك المخزنه وصورك …..الحذر ثم الحذر….ثم الحذر ….معليش للابتعاد شويه عن النص….
سلام تاني ياقبيلة،،
وطماطم ياطماطم ياؤوووووووووطة يا حمرا
هاك الخبر الطازة وطماطم ده:
وزير شئون المساواة العرقية البرازيلى يزور السودان
الخرطوم : وصل إلى السودان وزير شئون المساواة العرقية البرازيلى فى زيارة للسودان تستغرق عدة أيام .
وفى تصريحات لوكالة السودان للانباء “سونا”، أكد معاوية عثمان خالد الناطق الرسمى باسم وزارة الخارجية أن زيارة الوزير البرازيلى والوفد المرافق له تعد مهمة، وتاتى فى اطار تطوير العلاقات بين البلدين ، وهو أول وزير برازيلى يزور السودان.
وسيلتقى الوزير البرازيلى بعدد من المسئولين بالدولة لبحث أوجه التعاون المشترك بين السودان والبرازيل والقضايا ذات الاهتمام المشترك.
أول وزير برازيلي يزورنا بتاع شنو ما عارف داك،،،
يا أخي نحن ناقصين وهو أصلو الحكاية شنو؟؟
وطماطم ياطماطم….
اللوووووز الحبيب
التعليق نزل بى قدرة قادر على موضوع شبيه من شمباتى
زمان كان فى فنان دايمن لامن ينطرب فى الغنا يقوم يهتف (خليك مع الزمن ياااه )
أها لو جينا للزمن القبل زمن أبهاتنا تلقاهم كانوا بحبوا و يعشقوا نسوان الفريق الما شافوهن الا فى بيت ((اللعبه)) بيت لعرس و هن جالسات على البروش و ظهورهن قبالة الفنان بتاع الحقيبه
زمنا كان الحب بالرسائل أيام كنا طلبه
وتطور لى الحب بالتلفون أيام الثابت
كم من زيجه تمت و نجحت كان الرساله أو التلفون هو المسنجر
حتى وقت قريب كان المغترب يختار قرينته عبر شريط فيديو ود الجيران الجا من السودان و معاهوا شريط حفلة بت عم خالتو
نجى لى الكمبيوتر
و الحديث هنا عن النظريه و ليس التطبيق
ليه القلم عندو عقل و المزمار عندو روح و العود له أحساس و الساقيه بتبكى و البندقيه وحش كاسر
و الكمبيوتر آله بارده لا بتحس و لا تشعر
فقط تصفح منتدى سودانيز و أى منتدى كبير آخر ستجد عدد هائل من الكوبلز جمعهم هذا الأختراع الرائع و للزميله السابقه هنا فنجان قهوه خير مثال
لقاء المحبين على النت هو لقاء لعقول فبل أن يكون لفتنه المظهر و هذا يدعم شفافية الفكره
الزوووووووول وسُمّار الليالي تحية
أنتو عارفين الطماطم الرقدت (هبطرش) دي وبقوا يسوقوها بالإنترنت دي معناتا بتكون (مضروبة) و(مفجخة) كمان أخير الواحد يمشي يشتريها من أهلها الزارعنها وراعنها .
زووووووول:
(seven o’s)
الحقيقة الموضوع موش طماطم طماطم طماطم دا بتيخ بتيخ بتيخ و كمان بتيخة مقفولة موش علي السكين لانو لمان واحد يلبس احسن كرفتة و اشيك بدلة و يظهر في الفيس بووووك او الماسنجر و يتفشخر بانو رجل اعمال او رجل صحافة او عنتر سياسة ممكن ايوهه و ممكن لاه…وخاصة في عالمنا العربي و هو متشابه في بنيته و تركيبته فيه ادعاءات كثيرة …و هذا لا يمنع من نجاح بعض الزيجات و اهميتها..
في المجتمع الغربي الحياة منفتحة و المشاركة متاحة و القلة التي تلجاء لمثل هذه الزيجات هي نسبة فاتها الزواج لاي سبب من الاسباب او من توفي زوجها او زوجته و هو لا يجد وقت كافي للتعارف نسبة لان ال time factor مهم عندهم و حاسم…طبعا عندنا الحاجة دي ما عندها دور …الا في شريحة المغتربين عن البلد لمدد طويلة و صعوبة التواصل و التعارف بالنسبة لهم او انقطاع الصلة بالمواعين الاجتماعية التي تتيح مثل تلك الفرص…وقد نجحت زيجات كانت المصداقية سببا اساسيا في نجاحها اذ تحري الطرفان الصدق في ال C.V. عموما اتمني لكل عريس التوفيق و ان يجد بتيختو حمرة و كمان (حلاة و حَمار)…
زووووووول
باقي الرهط الجميل
السلام عليكم ورحمة الله وبركاته
انا اليوم شمطتتنا قايمة مع المدام في شان الطماطم دي يا زوووول لقيت اخوي منزل موضوع الطماطم الطماطم قلت ليها اها حلوها تعالي نشوف الزوووووول في صفي ولا في صفك ، قرينا الموضوع قامت الشكلة تاني دورت بي جلاجل لانها يا دوووب قالت عرفت انا ماخد موقف انحيازي جدا للطماطم اليومين ديل ليه ؟ الله يجزاك خير يا زوووول قولنا تحلها عقدتها زيادة ، نرجع لطماطمك
هل تعرف اخرين تزوجوا عن طريق الانترنت او عن طريق مكاتب الزواج الوليده ؟؟
لا ما عارف لكن عارف لي واحد تزوج في الاستاد وطفش من البلد وكل يوم في الجرائد اسمه مطلوب
وهل تعتقد ان زواجا يتم بهذه الطريقه سيكتب له النجاح ؟؟
لا اظن بل اكاد اجزم انه لن يصل مرحلة الزواج ممكن يمشي لي حته كدا اجارك الله منها
وهل تعتقد ان هيفاء التى تعرض نفسها للزواج على الانترنت يمكن ان تكون كوكو القبيح صاحب الشنبات الطويله والعضلات المفتوله والعكس ؟؟
اول حاجة ممكن يكون راجل عديل كدا مش هيفاء إن اختيار المرأة الصالحة للزواج يعتمد على التحري عن اخلاقها وحسن سيرتها ومنبتها الطيب و شخصيتها وارادتها وسلوكها كيف نقدر نعرف الحاجات دي من الاعلان يا زوووووول
عن عائشة قالت قال رسول الله صلى الله عليه وسلم تخيروا لنطفكم وانكحوا الأكفاء وأنكحوا إليهم *
عن أبي هريرة قال قال رسول الله صلى الله عليه وسلم إذا أتاكم من ترضون خلقه ودينه فزوجوه إلا تفعلوا تكن فتنة في الأرض وفساد عريض * ( حسن ) الارواء 1868 ، الصحيحة 1022 . – أبن ماجة
الأخ كناني سلام كتير…
يبدو أن بعض الأسر تحاول المخارجة للبنات دونالنظر فيما ذكرت من أحاديث أو في بعض الأحيان تركب راسها ولا تقبل رأي الأسرة وتقول يا وليد يا أنتحر وبعدين تشيل شيلتها….
ممكن أحسب ليك مية زيجة فاشلة بسبب العناد
زووووووول
باقي الرهط الجميل
السلام عليكم ورحمة الله وبركاته وصباحكم بألف خير
الله المستعان هل كثرت البنات حتى أصبح الماعاوز يشتري يتفرج أنا سأحكي قصة إبن عم لنا متزوج من بنت عمته وقرر يدبل فإذابه يقع في واحدة لقاها في النت وعرسها لم شفتها وعرفت أنها أكبر سناوأقل جمالا من بت عمتو وكمان رزق منها ببنت لأنو الأولى جابت ليها ثلاث بنات وكان نفسو يرزق بولد
سعدت بقراءت مداخلتك يا ود الخلا عقبال ما ترجع تكتب تاني
زووووووول ما بالغت بتسأل عن شمباتي يوم الثلاثاء ده بطلع من الحفرة الأربعاء وزي ماقال أحد الماخلين في أحد المواضيع (أول ما تلقى شمباتي كتب مداخلة أو موضوع أعرف أن اليوم أربعاء)
ابكرون يا استراتيجى سلااام
اعتقد انك وفيت موضوع فك الحصار الانترنتى وهذا ما دعانى لحذف صورتى الشخصيه من موقع الفيس بوك وشكرا كتييير .
نيام نيام
والله حقيقة الموضوع بتييييخ عديل كدا واهو تلقا بتاع البتيخ فاتح احسن واحمر واحده ويجى يبيع ليكا واحده بيضاء ومسيخه وهذا ما يفعله المعلنون لانفسهم فى مواقع الزواج .
ويا اب احمد والكنانى ماشى عليكم فكونو معنا
(إن اختيار المرأة الصالحة للزواج يعتمد على التحري عن اخلاقها وحسن سيرتها ومنبتها الطيب و شخصيتها وارادتها وسلوكها )
الكناني سلام ممكن نزيد ليك باقي الولاد بحتاجوا مساعدة شوية………شغالة و الا ما شغالة عندها بيت و الا شقة عندها باسبورت (اكيد ما سوداني) و كدا ….. طبعن دي بتظبط السي في
سلامز
يبدو ان الأمر اختلط على البعض في هذا الموضوع
غرف الشات هي غرف للتعارف المبدئي فقط .. ولا تتم أي زيجة بداخلها .. بل يتحول التعارف كما نسميه في هذه الغرف من ( اون لاين ) إلى ( اون لايف ) … و بعد ذلك يرى كل شخص الآخر و يمكن ان تمتد العلاقة لتصل إلى الزواج أو تستمر صداقة و معرفة أو تنقطع .. حسب ما يراه الأعضاء في هذه الغرف .. إذا هي فقط للتعارف المبدئي
يجب على الجميع سواء في السودان أو خارجه أن يعترفوا بأن الزمن قدح تغير .. فما يصلح لجيل الأربعينات و الخمسينات و الستينات و السبعينات لا يصلح لهذا الجيل في مختلف النواحي … و لا يجب أن يرفض أي جيل من الأجيال القديمة ما يتبناه الجيل الجديد من قيم و أفاكر بل يجب عليهم أن يكونوا مساندين له و يشدون من أزره .. يقفون موفق الآباء الناصحين المدركين .. لا موقف الرافضين لكل شيء … و بدون أسباب منطقية
أو سيخرج هذا الجيل الجديد من ( جلباب أبي ) … دون أن يكون للجيل القديم أي سلطة روحية على الجيل الجديد .. فحذاري حذاري
(فقط تصفح منتدى سودانيز و أى منتدى كبير آخر ستجد عدد هائل من الكوبلز جمعهم هذا الأختراع الرائع و للزميله السابقه هنا فنجان قهوه خير مثال)
أب أحمد سلام عارف كلامك ذكرني واحد داير يعرس ليهو بت أكبر منو و قاعد يقنع في حبوبتو
– يا حبوبة الرسول صلى الله عليه و سلم عرس السيدة خديجة و هي اكبر منو
– نان لليلي نسوها ليهو !!
الزواج الأسفيري هو المستقبل وعلينا تقبل هذه الحقيقه التي سوف تضحى وأقعاً وقريباً جداً …. ماعارف كتبت موضوع الزواج الأسفيري ده هنا ولا في قريه تانيه المهم يا زوووووول وين الطماطم لحدي هسه أخوك كايس الطماطم وبمناسبه الطماطم نعزيكم في أيداهور وده موضوع داير ليهو بوست براهو لأنو حتى في التعزيه ماعارف أعزيك كيف في زول من خارج المله ………… شفت اللخبطه دي والخرمجه العى أصولها وتاني بالمناسبه دي ………………. عاد إليكم من جديد كبيرمخرمجي المدونه .
نقطه بوز شديد
الرحله كيف يا شباب
أيها الزووووووووووول …سلام
صورتك ياتا الفى الفيس بوك ؟ يعمينا ما شفناها ..
ولدنا الباشمهندس مشاكل ..وبقية صفوة الأخيار ..
( فما يصلح لجيل الأربعينات و الخمسينات و الستينات و السبعينات لا يصلح لهذا الجيل في مختلف النواحي … و لا يجب أن يرفض أي جيل من الأجيال القديمة ما يتبناه الجيل الجديد من قيم و أفاكر بل يجب عليهم أن يكونوا مساندين له و يشدون من أزره .. يقفون موفق الآباء الناصحين المدركين .. لا موقف الرافضين لكل شيء … و بدون أسباب منطقية ..)
أوافقك الرأى فى مقولتك أعلاه ولكن هنالك من الثوابت التى لاتقبل القسمة على إتنين ومن خبرة الكواشف ما تدحض الكثير من قيم وأفكارالشباب الحديثة ..أنا لا أحمل ولا أعمم على كل الشباب ( يوجد من فئة الشباب من هم على درجة كبيرة من الوعى والإدراك الفكرى ) ولكن الشىء الملاحظ وللأسف الشديد هنالك قصور من نسبة عالية من الشباب فى كثير من الأمور سوف أتطرق إليها فى بوست منفصل إن شاء الله..وغالبية شباب اليوم يرون أنفسهم وكانهم قد عرفوا كل شىء واستوعبوه فصاروا لا يقبلون النصح ممن هم أكبر منهم سناً وأكثر دراية وخبرة فى الحياة ..
أعود لموضوع الطماطم ( الأحمر ) واقول انه ليس موضوع عبثى يتم خارج أطار الأسرة..حتى وإن تغير الزمن وصارت الفتاة بحكم خروجها للدراسة والعمل قد تعرف إلى شاب أو رجل ويرغب فى الزواج منها على سنة الله ورسوله ..فيجب بعد ذلك إتباع الأمور الشرعية التى ينبغى مراعاتها فى شأن الزواج ..لأن الزواج ليس حياة بين رجل وإمرأة إنما حياة اسرة وتصاهر وصلة رحم وإرتباط اسرى ابدى ( بإفتراض ما سيكون ) .. نحن لا نرفض التغيير والتجديد فهو سنة الحياة ولكن نرفض ما يتعارض مع ديننا وقيمنا وعاداتنا الحميدة الخالية من الغلو وتتعارض مع الشرع ( فما كل عاداتنا حميدة )…
وبشرك الله بالخير فقد نبهتنا إلى نية خروج الجيل الجديد من جلباب الاباء ولن يكون لهم سلطان روحى عليهم ..إن لم نتجاوب أو نتفاعل مع افكاركم الحديثة .. وتطالبنا بالحذر من ذلك ..ومع إحترامى الشديد لرأيك ..أدعو الله ألا ينكون على ظهر البسيطة فى ذاك اليوم وذلك الزمان ..
وخلوا بالكم يا ايها الكواشف من الطوفان القادم الذى سوق يقضى على الأخضر واليابس .
وبرضو خلونا النشوف آخرتا شنو !!!
سلااام للجميع
والله الطماطم دى يا دكتور عزت ما هينه كولو . شايف جابت لينا الكنانى وكمان جابت لينا شكسبير زاتوووو.يلا علينا جاى الصفيحه بالف ومعاها اتنين هواده .
الكنانى : سلااااام
ومرحبتين حبابك وجيت الطماطم جابتك لينا وشوقنا خلجان عديل كدا . اما الاعلان عن الزوجات والازواج فهو موجود منذ زمن النبوة وحتى يومنا هذا كما فعل عمر بن الخطاب حين عرض ابنته حفصه على الصديق ثم على احد الاخيار من صحابة الرسول (ص) . وهذا ما يفعله بعض الرجال اليوم حين يرون من يظنون فيه الخير والصلاح . كما عرضت نساء صالحات انفسهن على الرجال وفى مقدمة هؤلاء تأتى من عرضت نفسها عليه صلى الله عليه وسلم ((وامرأة مؤمنة ان وهبت نفسها للنبى ….. الخ ) .
وهكذا هى طريقة اسلم من التعامل مع من لا نعرف وكما تفضلت صديقى اذا جائكم من ترضون دينه وخلقه فزوجوه . فكيف نعرف خلق الطماطم والبتيخ المعروض على قارعة الانترنت . تسلم يا كنانى .
عمنا سلولو :
والله كنت خاتى صوره بتاعة رجال اعمال وكدا لكن زوولك ابكرون دا خوفنا وقلنا قبل ما نلقا جوازات مزوره باسمائنا وفيها جريمة كتل ولا غسيل اموال وفشان كدا خلينا صورة الاموره السغنتونه دى وصورة سيد اللبن .. سيداللبن وبس .
ودالزبير سلاام
يا اخ الفرق شنو بين الطماطم البكورك بيها البوكس فى نص الحله والطاطم البكوركوا بيها فى نص الانترنت دى .
اما ايداهور فهو فقد كبير وكبير جدا كلاعب وكانسان لكننا لا نقول كما قال الاذاعى يوسف السمانى اللهم ارحمه بقدر ما قدم للمريخ وادخله الجنه .
مشاكل :
صدقت فهناك اجيال ترى ان تسير الاجيال التى خلفها بنفس الملامح والشبه وكثيرا ما تلقى واحد عمك يقول ليكا انت ولد سغيرونى حتى بعد ان تبلغ الاربعين . لكن يا شاب هناك الكثير من المواقع ال خارم بارم مع قليل جدا من المواقع الجاده . ولا شنووو يا ود الخلا .
ود البركه ود/ عزت :
المراه الكبيره دى مرات مرات تكون احسن من السغيره خسوسا لو كانت تعرف انك عارف انها اكبر منك وبالجد كدا بتحطرمك (؟) شديد ودى تجربة لصديق عزيز جدا جدا كان كثيرا ما يحاول اقناعى بزواج واحده جلكينه (فسر يا سلاوى ) .
سلامز
معظم أعمامنا و أهلنا من الحرس القديم ما قادرين يفهموا او ما قادرين يتأقلموا على الوضع الجديد
كل جيل بيظهر بي آمالو و طموحاتو و لغتو و مشاكلو و همومو و أفكارو .. ماف تقييد بطريقة جيل قديم أو أفكارو .. لازم يلقوا لي نفسهم حل … يحاولو يدخلو في الطريقة الجديدة او ح يكونو خارج التغطية
عمنا بشار سلااام
والله يا عمنا افتكر الواحد يخلى الطماطم دى كلو كلو لا المفجخه ولا بتاعة المزارع الطازه .
مشاكل والحرس الجديد
كما تفضل عمنا السلاوى نسأل الله الا يرينا يوم نركن ابهاتنا واعمامنا من الحرس القديم على الرفوف تماما وكما قالوا اكبر منك بيوم اعلم منك بسنه يا مشاكل وناس الجيش قالوا بهبتلية معروفة عنهم : اقدم منك ارجل منك .وللسلاوى وود الخلا وبقية الحرس العتبى .
اخوكم زووووووول بسبعه واوات عضو سر اللجنه المركزيه للحرس الجديد .
سلام ياقبيلة،،
الكناني وودالزبير والصادق ودالبركة وبقية السمار الأكارم بنو الكرام حبابكم وليكم وحشة وعدتم بنا لسابق القمردينة وزمنها الجميل وحلو النقاش الهادف والمفيد فيما ينفع الناس، وأما الزبد فيذهب جفاء.
أعود والعود أحمد لصديقي وحبيب ألبي مُشاكل المُشاكس فيما يقول ويناور فيهو وأقول ليهو نوافقك في كثير ما ذهبت أليه ياسديقي في أن كثير من الذي كان يصلح لأعمامك لا يصلح لجيلك، ولكن مع التحفظ والوقوف مليا” عند كلام عمك أو جدك السلاوي في أنه هنالك من الثوابت التى لاتقبل القسمة على إتنين ، وأهمها الدين والأخلاق والسلوك القويم فهذه لا ترتبط بزمن أو جيل معين وهي صالحة لكل الأجيال والأزمان، وعليه يجب علي الأجيال التالية الأنصياع لها والأنقياد لأوامرها والا فعلي الدنيا السلام..
أعلم جيدا” أنك في قرارة نفسك ودواحلك مقتنع تماما” بما يقوله لك أعمامك هنا ولكنك تحب المناكفة، ولا أعتقد أنك مقتنع بما يقولون عنه السودان الجديد،،،
تحياتي يا أصدقائي لكم جميعا” وشكرا” لك يالزوووووووول المرقت لينا الناس العُزاز ديل…
ولدنا مشاكل ..سلام مرة تانية ..
بل على العكس تماماً .. نحنا أعمامك ديل اللى هم من الحرس القديم ( معظم أعمامنا وأهلنا من الحرس القديم ما قادرين يفهموا …. ) ديل شايفين كل حاجة وفاهمين وناقشين كل حاجة أكتر الجيل الحالى ..
ويبدو إنك أستعجلت الرد ولم تتريث فى قراءة مداخلتى اعلاه التى ذكرت فيها أننا لسنا ضد التغيير والتطور الذى هو سنة الحياة ولكننا نطالب المحافظة على القيم والخصال الحميدة التى توارثناها اباً عن جد والتى لا تخفى على أحد ..فنحن كذلك قمنا ببعض التغيير عما كان عليه اباؤنا ( عليهم رحمة الله جميعاً ) ولكننا لم نتخل عن الجيد من العادات والخصال القديمة التى فى طريقها إلى الإندثار اليوم ..غيرنا طريقة الملبس ولكن فى حدود الأدب واللياقة والمظهر العام الجميل .. لم نتشبه بالنساء تحت أى ظرف من الظروف … لا فى قصات شعر أو ملابس ..إستمعنا إلى الأغانى الجنبية ولم نتخل عن فننا السودلنى الصيل..سافرنا إلى خارج امازونيا ولم تتغير طباعنا ولا عاداتنا ..
أنظر حولك اليوم وقل لى ماذا ترى ؟ هل ما تراه فى الشارع اليوم هو التطور والتحديث والتغيير الذى يطالب به شباب اليوم .. إلا من رحم ربك ؟ اين إحترام الصغير للكبير ؟ اين صلة الرحم .واين ..واين؟.
ولدنا العزيز مشاكل ..مرة اخرى أقول لسنا ضد التطور والإنفتاح ولكن بضوابط تحفظ لنا كياننا الجميل الذى ورثناه ونريد ان نورثه لكم جميعاً معشر الشباب من بعدنا ..ونحمد الله أن جعلنا نعيش العصرين ..العصر القديم والعصر الحديث بكل محتوياته من تقنية فهذا يمكننا من الحكم على الأمور افضل من فئة الشباب الذين نتمنى لهم كل الخير …ولكن دون إفراط أو تفريط ..
أعتذر للأخ الزووووول صاحب البوست إن كنا خرجنا عن الموضوع ( المودوع) الأساسى ولكن الشىء بالشىء يذكر..
واكرر المقولة الأزلية .. إن إختلاف الرأى لا يفسد ما بين رواد المنتديات من محبة وإخاء
أبو عصمت .. ابكرونا ..سنكل .. بشار ..اب احمد ..ودالخلا ..ودالفتيحاب ..نيام.. اين انتم ؟
وصداقة .. إتفقنا ؟
أبو الحجاج
إتفقنا تب
___________
لكن إتفقنا بتاعت الكواشف ولاّ بتاعت ندي القلعه -مع الاعتذار للملهم-
يا الزووووووول معليش خرمجتي السويتها في حنان صفيحه الطماطم
أتفقنا؟؟؟؟
ولدنا عبد الرحمن ..
مودوع إتفقنا دا اسال عنو ولدنا التانى خالد المدنى ..ممكن يقول كل حاجة عن السمسم الكبار …
إتفقنا ؟
ياحاج لكن خالد مدني دا داااافن دقن
وما باين كلو كلو
يكون
خاشي الخلوه مع شيخي داك الساكن الـ…….-أقصد الفواره –
إتفقنا
علا السمسم الكبار فيهو الصمغ
وللا ككيف ياحاج؟؟؟
سلامز
بالتاكيد حديث اصحاب الخبرات على العين و الرأس .. فهم الساس و هم الراس
لكن حديثي عن التطور لا دخل له بالأخلاق و القيم .. إنما أتحدث عن الأساليب و الطرق
مثلا في مرحلة من المراحل .. كان التعارف شيئا عصيا و صعبا على الشباب و كان مجرد وقوف شاب مع شابة في الطريق يعتبر كأنه عيب و حرام حتى من دون الدخول في تفاصيل المحادثة .. مع تقدم الزمن و دخول الجامعات و المدارس المختلطة .. أصبح واقعا لا فرار منه .. فأصبحت الجامعات وسيلة للتعارف و التلاقي .. الآن و مع ظهور الإنترنت جاءت طرق و وسائل أخرى للتعارف كغرف الشات و الدردشة و المواقع الإجتماعية … فهذا ما اتحدث عنه .. و ليس التغيير في الأخلاق و المباديء .. فهي ثابتة راسية شامخة … ( أصلها ثابت و فرعها في السماء )
مع تقديري و حبي
الزوول : اتخيل انا برضو قلت الموضوع موضوع طماطم ونحن نتنفح فى هذه الايام المباركات عبق الرخسه الشديده ورقاد الواطه للغالية الطماطم حتى ان خدود ناس حمودى احمرت وتوردت ولا ينقصهم سوى رؤية اللحم الغالية !!!
اها خشينا لقينا الموضوع عن الطماطم التانى دااك وما ادرااك ما دااك ؟؟
واوافق العم سنكل انو بار ورقد واطه شديد فقط لانو ده موسمو وهو موسم الشتاء !!!
الله يجازيك يا طماطم الشتاء !!
ولنا عوده لو الله هون ..
سلاوى ومشاكل سلااام
ولا يهمكم لم تخرجوا من المودوع ابدا قولوا ما يحلو لكم
(( ونحمد الله أن جعلنا نعيش العصرين ..العصر القديم والعصر الحديث بكل محتوياته من تقنية )).
كدا نفهم انك مخضرم يا حاج السلاوى ولا كيف؟؟ واصل بدون فواصل يا عمك . نستمتع كثيرا بما تسطر وانت مسخن فخليك على كدا وقول اى حاجه ولا يهمك اصلن ولاد الزمن دا كدا .
عبد الرحمن احمد سلاااام
والله الصفيح دا خليتو كلو مويه من تحت وخفجت شديد لكن ما يهمك خفج مع ود مرزوق خراب السووق .
افليقا مرحبتين حباب
تحياتنا لناس حمودى بس خليهم يبتعدوا من الطماطم شويه وراجين عوداتك يا عمك.
مشاكل مع تقديري وحبي،،
ولكن يا عزيزي مجرد وقوف شاب مع شابة في الطريق العام ولا يربط بينهم شئ أو رابط ولو حتي الرابط العجيب، فهذا عيب وحرام وهو يعتبر وقوف في الممنوع ويستحق مخالفة فورية،،،،
أما بالنسبة للاخلاق والمبادئ الرسخة وراسها في السما دي فأين هي يا أبني، هل تظن أن الذي نراه اليوم من ممارسات وسلوكيات في الملبس والمعاملة بين الأولاد والبنات في الشارع أو في الجامعة بالصورة البائنة للناس دي فيها حفظ للاخلاق والمبادئ!!!!!!
عزيزي الفاضل الحديث في هذه الدوائر ممنوع ومسكوت عنه ولا يستطيع أحدهم أن يقول (بغم) أو البغلة في الابريق، والا سيتم وصفه بالتخلف والرجعية التاريخية، والجنون (وعمك ده جانا من وين، بالله نزلو هنا وأديهو قرشو!!) وهكذا يا صديقي تدور الدائرة والناس في غفلة وتنسرب الأخلاق من بين الناس كما يتسرب الماء بين الأصابع، تراه ولا تستطيع الأمساك به!!!!!!
ودالخلا سلااام
شكرا فقد وفيت واديت الحقيقه كما ينبغى فانتشار الجامعات ومواقع الشتشته لا يبيح اطلاقا وقوف البنت مع الولد وزى ما بقولوا ابعد البيضه من الحجر .ودايرين نسمع مشاكللل
زوووووول..سلام..
اذكر قصة قرأتها على الانترنت انو فى زوجين كل واخد دخل فى موقع للتعارف وبدا يحكى مشاكلو الزوجية ويصور نفسو ملاك وانو مظلوم ومتعذب وكدة,,المهم كل واحد ارتبط بوليف واتفقوا على اللقاء لترتيب اجراءات الزواج بعد الانفصال من الشريك الاول,وكانت المفاجأة انهما تقابلا وجها لوجه!! وكان الطلاق الحتمى والكراهية العمياء..
لا انكر ان الانترنت له مساوئه كما له محاسنه,ولقد عرفنا بالعديد من الاخوة والاخوات الافاضل,,لكن ايضا هناك الغثاء..اما عن الزواج ونجاحو مالو يعنى,,امكن بعد يتلاقوا ويتعارفوا يحصل تفاهم وكدة..لكنه كوسيلة للطرح والعرض فدا غير مقبول وغير محبب الى النفس..
ولنا عودة باذن الله لانو الموضوع دا كبييييييير..
شمباتي
في فيلم مشهور لتوم هانكس إسمه يو هاف الميل فكرته قائمه على إنو إتنين ساكنين في نفس العماره وشقق متلاصقه وبيكره بعض في الواقع وبيتقابلوا في غرف الشات وبيلقوا الحاجات البتربطهم مع بعض كتيره وهاك يا حب وهيام ولمن يتقابلوا في المصعد يقربوا يدقوا بعض وهو فيلم كوميدي جميل جداً
انصحك بمشاهدته ده لو لسه بتشوف أفلام .
بالمناسبه إتوقعتك تكتب لينا عن إضطراب الأطباء وتهديد الرئيس اليوم بفصلهم لكنك لم تفعل ولو يفعل غيرك هنا ذلك وده موضوع مهم وحيوي جداً
هوي يا زووووووول توليفة الشتشتة دي جبتها من وين الله يجازي محنك … انا كل ما تكتب ( غرف الشتشته ) التي افسدت عقول وقلوب شبابنا اقراها ( غرز الشيشة ) والتي هي بريئة من اي اسفاف … عاش زغلول وسلوم واشبيلية وفاخر العنب .
عبد الرحمن ثرو من هيثم مصطفي للسلاوي : دقني دي زي النبت الشيطاني كلما تضربها المقصات تزداد عطرا … اما عن السمسم الكبار فهو ببساطة : محبوس .
سلامز
الحبان في كل مكان
يعتبر كأنه عيب و حرام حتى من دون الدخول في تفاصيل المحادثة
فهي وقاء من كل قيل و قال …. نحن نحكم على الناس من دون ان نعرف في ماذا يتحدثون و فيم يقفون
بالتأكيد – و هي من المسلمات – ان وقوف شاب و شابه في مكان و من دون عذر يعتبر عيب في مجتمعنا السوداني … و لكن في الجامعات المفتوحة و اماكن العمل لا يمكن ان نطبق هذه القاعدة و لو اجتهد جميع العلماء .. فهي حتمية
لا أعتقد ان هناك إختلاف بين ما سطرته و بين ما كتبته أيها العزيز ود الخلا في مسألة الأخلاق و القيم و لكن نقطة التعارض هي طريقة أو وسيلة التعارف … ففي الأجيال الجديدة هناك طرق مبتكرة و متطورة مع تطور العلم و العالم و هذه الطرق لم تكن متاحة لمن هو في الأجيال السابقة .. مثلا غرف الشتشتة كما قال الزووووووول هي إحدى وسائل التعارف كما هي الجامعات و أماكن العمل .. يجب علينا ان نعترف بها وسيلة و ليست غاية في حد ذاتها
اما في موضوع الملبس و ما يعانيه الشباب من ظلم بائن من الشيوخ فيمكن أن نتعرض له في توبيك آخر
تشكرات أفندم
شكرا”يا أبني وصديقي وشعبي مشاكل، علي ما أثرت من العفارة والعكارة وأنت تروم بهذه المواضيع، بس أثارتني كلماتك الأخيرة (اما في موضوع الملبس و ما يعانيه الشباب من ظلم بائن من الشيوخ فيمكن أن نتعرض له في توبيك آخر)، وتحسست غدارتي، وربما مدفعي الرشاش، لأن الذي أراه من أنواع الملابس والهشك بشك الذي يرتديه هؤلاء يجعلك تشعر بالقرف والغثيان وتبحث عن أقرب مزبلة لتلقي فيها بأمثال هؤلاء، لن أسأل كيف خرج هذا أو خرجت هذه فلست أدري من يكون هو أو هي؟؟ من بيت أبيه وأمه بهذه الحالة، هذا أذا كان أصلا” لديه مأوي كريم آمن يأوي أليه وليس يعوي فيه يا صديقي..
قال لبس مظلوم ظلم بائن من الشيوخ، أوعاك تكون قاصد أديهو شنو، ولا البنطلون الماعارف شنو داك، ولا اللبسة الجديدة النازلة لتوها وهي لبسة للخروج من المنزل والأندياح بها وسط الأنام وتخجل أن تري بها الواحدة نفسها لنفسها داخل غرف النوم المغلقة والمظلمة كمان (ما فيها نور عديييييييل كده)، أسمها شنو كدا ما عارف…
شكرا” لك يا صديقي العزيز وأعلم أنك تريد أيصال عدة رسائل متقاطعة ومتشابكة للعديد من الأجيال، وأعلم جيدا” أصالة معدنك ورفعة أخلاقك وكريم حسبك ونسبك، لله درك يارجل…
ود الزبير..سلام..
طبعا حضرتو لانو دا فيلم لا يفوت وتوم هانكس ملك الكوميديا والميلودراما..اما بخصوص اضراب الاطباء فلقد كتبت قبلا موضوعا شبيها ابان ازمتهم العام الفائت,,ويمكننا تجديد البوست فقط,لانى والله مغبون مغبون ولو كنت فى البلد كان ارتكبت جريمة!! دا رئيس شنو اناما عارف!! ودى وزيرة شنو انا ما قادر اتصور..لكن كلو بحسابو..
سلامز
ما أردت أن انبه له الجميع هنا .. هو مسألة الفجوة الكبيرة بين الأجيال – و هي مسؤلية الأجيال القديمة – إذا لم يحدث تواصل بينها .. في الأفكار و التذكير بالقيم و المباديء .. و أيضا عدم الإستخفاف بالشباب و مقدراتهم .. بل يجب تطويع هذه المقدرات لما فيه فائدة المجتمع من حيوية و نشاط و تقبل للأفكار الجديدة
اما إذا كان ديدن الأجيال القديمة هو النقد و الإستخفاف .. هنا تظهر الفجوة .. و عند إتساعها لا يمكن التحكم فيها و تضييقها … و بذلك يصبح الشباب فريسة سهلة الإصطياد لأصحاب الأفكار الشاذة الهدامة التي تتربص بالمجتمعات الإسلامية المحافظة … و هذا ما نراه الآآآآآآآآآآآآآآآآآآآآآن
المشكلة إنو الشباب يا إبنى هو اللى رافض تقبل التذكير بالقيم والمبادىء الأصيلة..وبيعتقد أن هؤلاء الكواشف من الاباء دقة قديمة عفا عليها الزمن ويجب أن تتاح الفرصة للشباب لكى يبرطعوا زى ما عاوزين …هذه هى المشكلة الحقيقية وهذا ما نراه الآن فى الجامعات والمدارس والشارع ..نحن نذكر دوماً بهذه المبادىء والقيم وننادى بها ولم ولن نقصر فى ذلك مادام هنالك عرق فينا ينبض لأننا نحس ونشعر بالمسئولية الملقاة على عواتقنا جميعاً ( المقصود طبعن كل اعمامك ..الكواشف ).نحن لا ندعى الكمال ولكننا نريد أن نحافظ على ما تبقى لنا من خصال حميدة لا زلنا نتحلى بها دون الشعوب الأخرى..ونستخف بالشباب ونثور عليهم عندما يلوون أعناقهم ويتهموننا بالتخلف والرجعية وأننا دقة قديمة …والمثل عندنا فى السودان يقول : الماعندو كبير ..يشترى ليهو كبير ..
وهذه الفجوة التى تتحدث عنها عليكم أن تسدوها بالإستماع ولو 50% لما يقوله اباؤكم وامهاتكم ..لأنكم ستواجهون بعد حين بقفزة أخرى من شباب آخر ( ابناؤكم ) قد ترفضون تصرفاتهم وأراءهم ومبادئهم التى لا يعلمها إلأ الله كيف ستكون وإلى اين ستقودنا وتقودكم .
نسال الله حسن الخاتمة لنا وإياكم ..وربنا يحميكم من أصحاب الأفكار الهدامة والشاذة .
طيب يا جماعه
وكت كلكم دافنين دقن وخالننا نبرطع برانا
الطماااااااطم الطممممااااطم علينا جاااااااى
سلامز
فيما يتلعلق برفع الصور في المواقع الإجتماعية زي الفيسبوك و التاجد .. فيا صديقي الزووووووول لمن ترفع صورة تاني ماف طريقة تتمسح حسب علمي من السيرفر الرئيسي
يعني حتى لو مسحتها من البروفايل ما ح تتمسح من ادارة الموقع .. الخوف نلقى جوازك المرة الجاية في قطر لمن تتم عملية اغتيال ( الزول داك ) و يكون جواز مزور … الله معاك
75% من البنات الناشرين سيرتهم على مواقع الزواج أما للتسلية أو جادات لكن عوانس او شخصيات وهمية ونادار ما ينجح زواج عبر النت بشكل عادي وجميل الا في حدود ضيقة ، رغم الشبكة العريضة والكميات المهولة من كل جنسيات العاالم لكن تحقيق نتيجة ملموسة من وراء تلك المراسلات يظل شيء نادر
حين اراد الحاكم ان يعرف راي اشعب الاكول في طبقين ايهما الذ واطيب اجاب اشعب كيف لي ان احكم على غائب ….
فالحكم على بروفايل اي من من طالبي تلك الخدمات سواء اليكترونيا او عن طريق وسيط امر يحتمل الخطا والضواب فطالب القرب لم يرى المطلوب وطالب الوظيفة والخدمة يحلم بالمثالية …
اما مكاتب الزواج او غيرها فهي منظمات ربحية تستقل جهل البعض وطمع البعض وضعف نفوس الكثيرين فهي مبنية على دراسات سوقية ولهم هدف واضح هو المال سواء نجحت العلاقة اولا فانت تدفع والحشاش يملا شبكته .
وقد تكون تجارة مغلفة في الرقيق الابيض (الدعارة)
ونرجع لي اصلنا وكيف تزوج اباءنا وامهاتنا واخوانناا ونعمل مقارنة بين ما يحدث اليوم على صفحات الويب وما عايشناه على الطبيعة
اما طالبي تلك الخدمات من الجنسين فلابد من وجود عامل نقص يقودهم الى اقله قلة الايمان ، والقسمة والنصيب.
ومن كد وجد…