مسكين أفليقا… حبكم الح يقد مكنتكم

Posted: الأحد,24 نوفمبر, 2013 by عزت in اخرى

لى شهرين ومشتاق للبلد شارع النيل والهوا والعرضه أصلك ياسودان فى البال مرضه شوق للبيت والناس فى امبده وشوق حرّاق للبوش والباكمبا ام جنقر ولبن اللفه شوق تمباكنا وآخر سفه…

يا سهيل والله السودان ده مع شوية كرامه وعزة…  أرض الخير والناس السمحه؛

الفوراوى وست الشاى سوق امدفسو… قدّر ظروفك وووووووواااااااى يا سهيل الصبر كِمل شيل الموزه كدارى من البوسته لأمبده مرورا بمزاير شارع الدومه وفول الهجره ومبارات سبايل ودنوباوى البارده وضل شجر المسالمه والا بوش وصير الكوتش فى خور ابوعنجه…

والعزبه القديمه وقشلاق الحاج يوسف ودردوق ونبته والا بلح المحس والا منقة الشايقيه وغناهم والا شارع هجليج كيجا مفرق درنقاس حلة برنو كيلك خرسانه والا جبال النوبه والا رمال ابزبد ولا ديسكو جوبا وكوبرى كيت والا زنداويه نهيدا طبنجه والا عسل انقسنا وخنازير باو والا سجارة الصعيدة وفقرا مايرنو والا جنينة الروصيرص والا عسل الدمازين والا مارنجان اربعه لغات والا مدنى الجمال والا جبنة الدويم وجبل جخيسات والا غرب الجبل ومندرا وقهاوى العرب وسع سكه طول بالك خمسه دقايق وخور ابوحليف وسماحة الجموعيه والا فاشر سلطان والا جنينة المال والعطرون والا نخل نجالا والا جبيت الرجال والا بورسودان الشبوره والمرسى…

والا كوارع على ابزيد والا لبن لقيمات سوق اللفه وتبش دردقو عمك ادم فى البوسته امدرمان والا فول كوبر السبنما وسوق خدار بحرى والا سوق حمام امدرمان والا سوق الناقه والا كمونية فارات الدلاله ولادا بالكوريلا وجيب بالهايلوكس وكوستر باب اربعه وريحة المورده وموبايل ماسوره من حجوج يا بشه… (البيشاوي)

والا سوق الشمس وابومريومه وحلاة الفلاته فى عششم والا طليحة المناصير والا بيوت جبل البركل والا يا اللورى تشيل منو غير بنات نورى والا امونى… ليه تشيلى الباغى وهى فاضيه عليكى تقيلى
والا دهب القعب والا قولد الصديق والا بنات زورات قلبى موقد نار والا سماحة بنات حفير والاعظمة ارقين ومينا حلفا والا صاى وردى وجناين شمبات وصهريج المناره وكررى…

والا شارع الستين وعبيد ختم من برى للجامعه والا الشريف الهندى واسيادنا المرغنيه وسيد صادق الامير والا مهاتاما السودان نقد والا منشية شيخ حسن والا ازهرى وبك خليل والطابيه المقابله النيل والقبه والبرعى وودحسونه وحفير الشكينيبه
وشيخنا الهديه وابوزيد
والهلاليه ونسيج حصاحيصا وحاج عبد الله والشبونات والعمارات من هجو لاعند كاسر والجملونات للسعدانه
والا امبدات وراس الشيطان والحلبى وحلبه الرابعه الشقيانين المكافحين والا الثورات وسماحة التخطيط وشموخ البنيات والا الاستاذ والجمهوريات والاولى منبت الثورات
والا الصحافات سقاطة الشيخ ومربع السوق وبريمه وجبرات وبلال وعبد الحى والحزام الاخضر  والا اركويت وبلابلو الغنايات وسوق الخيمه والشرقى ولفة جوبا والمعموره والجريف والقلعه والشتات والا طحنونة وسوق العزبات والشجره والرى والكلاكلات وام عشر والدخينات والاحتياطى والسجارات وطيبه والعسال المستودعات والقوز والرميله والسكته الجميله وابوحمامه والسجاته وموقف الرطانه ونمره تلاته وسكه حديد والسوق الفديم والجديد والعربى وسوق الزنكى والقهوه وزقاق السفاره ونيفاشا والافرنجى والمقرن وهيلتون والروتارى والجيش واشلاقو وعساكرو والكوبرى والديااااامه وحى الزهور ونوادى الرطانه والجامعه ..

وخش بحرى ابداها النقل مر تانى وخش السروجيه وعبود والديامه والدنقل وسعد قشره وكوفير علويه والمستشفى والمحطه الوسطى والحلفايا والكدرو ودروشابات وسامرابات والكيلو وجناين المنقة للجيلى
طولنا شديد ده بعض الاتذكرتو بس لكن سنعود من كل فجاج الارض نعود

…………………………

من المحرر… ياخ كولها شهرين… لحقت

تعليقات
  1. عزت قال:

    الكلام الفوق دا قالوا حبيبنا (أفلبقا) بالواتسأب لأحبابو ناس سوداننا ونقلتوا من هناك بدون اذنو ولكن كلام يستاهل عيونكم الحلوة وأمنياتكم لأفليقا بأن يجمع…

  2. زوووووووول قال:

    شكرا دكتور عزت .. تحايانا للاخ افليقا

  3. aflaiga قال:

    شباب :
    نجيكم واتساب تجونا مدونه
    تحياتى والاشواق معليش بعيد عن الواتساب فترة سنعود

  4. aflaiga قال:

    ستريكر : خور الخور هههههههههههههههههه

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s