ليالى النيل وطيب العناصر …

Posted: الأربعاء,24 أبريل, 2013 by قرن شطة in إجتماعية

 ..كان مساءاً عبقريا …سعدت فيه بلقاء اصدقاء وأحبة طال بنا العهد وتباعد بنا الزمان الى لقائهم..ليلة قرب النيل تضمنت محاسن ومن كل روضة عينة  ..ومن كل عينة زهرة ، واليكم تفاصيل ماجرى: شوفتا وإبتهجت بلقاء الزوووووووول (تمانية واوات) الرجل القامة والذى لايدرى بأنه يدرى فقط يحتفى بلقاء اصدقائه....والاخ اب أحمد الرجل المثالى والشاعرى والذى فى الغالب تخونه الإتجاهات فتاتى الرياح بما لاتشتهى سفنه وأحياناً بما تُحب مراكبه…التحية له وهو مغادرنا الى جيبوتى ، اتمنى له اقامة سعيدة هناك…والكاتب الهميم المصوب دائماً الى الصميم والذى من كثرة أحماله أصبح يمشى ضالعاً متعثرا…اخونا عديل كده الفاتح جبرا ..اتمنى له دوام الصحة والعافية…ثم راينا ضمن ماراينا الأخت الغالية والتى كنا نفترضها (إى إفتراضية) رايناها رآى العين بعدما كانت فكرة…الأخت سمسمة وماهى بسمسمة وهى تبدو اكثر من ذلك ولكن الله غالب…لها التحايا …وأخونا المفوه والذى اصبح فى التفُكر يصبح ويمسى..افليقا الرجل الودود..فقد اصبح بين قوسين …قوس فى الخرطوم وقوس فى أرغين…له منى الود…..وكما كان معانا الرجل الكريم المضياف صاحب الفيس فود وليس الفيس فوت…ود الزبير عليه السلام، إن شاء الله لاتفوت ولاتموت يا ود الزبير…وكان ود المهدى بنسله الشريف وحضوره الهادى…واخونا سهيل صاحب الطُرف والنكات والذى اضحكنا باشراقاته المتبلة بكل شطوط وبهارات السودان وربما الدول المجاورة ايضاً…ثم بين اليقظة والاحلام كان أخونا التركى…يا فتاح علىَ من شوفتك….سودانى الملامح تركى المبتدى والمنتهى…والمحاسن ضمت اخونا دكتور عزت والذى كان يُقال عنه  بانه (بقى رتش) ثم فُقد الامل وتعطل الرجاء فبقى حاجة تانية…جايز “سوتش” والله أعلم …الدكتور متلفعاً بصبره ومتدثراً بأمور البيئة والتى لايهتم بها الا من آتى الله بقلب سليم! ثم كان السيد البشاوى والذى فى حالة تارجح وفقدان بوصلة ظن أن مبنى الإتصالات هو الكعبة عينها على نظام أين ماتولوا وجوهكم وكده…الحدث الذى سرنى إيما سرور وعرفت بعد طول توهم أن البلد لازالت بخير…تعرفت بشياب – وكا يقول مذيعى الجزيرة – مايسمى بشباب شارع الحوادث فسمعت عن مساعيهم الحميدة لحلحلة أزمات البشرية السودانية والتى أصبحت فى حالة ضيق (غير مسبوقة) لكم التجلة ونحنا أصلاً الفينا إتعرفت “ونحسبكم” ظاهرة مشرفة بل وفريدة فى هذا المجتمع الذى تفسخ ثم إهترأ وغاص فى وحل العوز والفقر…نسأل الله السلامة ونحنا تحت الخدمة أو فوق الخدمة فالامر سيان سادتى…

هناك اصدقاء فقدناهم ولم تواتيهم الظروف لحضور تلك الليلة و التى وكما قال الشاعر الامدرمانى محمد بشير  عتيق : اتوجت قياصر وإتلالات كواكب من أطيب العناصر… لهم التحية.

تعرفون اخوتى انى تركت الكتابة زماناً ، وقد ايقظ القلم من سباته لقاء الاصدقاء هذا ، وكنت اريد أن اكتب مقال وقد كتبت عنونه (الروح تروح مامشكلة…بس المشكلة..) وهو لم تكتب فيه حتى ولاكلمة واحدة بيها إصبر شوية… عن شىء حاص فى الفكر وصدقة القلب وقد يجيب لينا (الهوا) ووراء الهوا صديقى المناكف ذو الاحاديث والآيات ود الخلا ولكن اكتفى بذكرى ليلة أمس على النيل ، واعداً بالرجوع الى المسالة ذات الاهوية والكتاتيح فى القريب ، ونحن أصلاً بقينا فى مهب الريح فاحسن تشيلنا وتستريح ونحنا ذاتنا نستريح…التحية لكم ايها الاحبة ودمتم بعافية….

قرن شطة

23 – 4 -2013

تعليقات
  1. ياسين شمباتى قال:

    احبكم احبكم ,, احبكم كولكك كدة علة بعضكم ,,
    لك التحية ايها الحبيب الاديب ,, وحفظ الله الود ,,,

  2. تحياتى ومحبتى للجميع – وجمعنا الله فى الود والحب والخير انشاء الله.

  3. قرن شطة قال:

    سلام ايها الاخوة الاشاوس ..فى الحقيقة كنا دايرين نشوف الصور التى تم التقاطها على النيل لتكتمل الصورة ولا موكده؟

  4. عزت قال:

    سلام يا أحباب
    عكس ما انك بتكون متوتر بعد ما تجي تقعد جنب زوجتك وهي جاية من بيت عزاء والا فرح تكون في المناسبة لقطت ليها مناسبة أخرى قادمة…. برضو زي اللقاءات دي بيكون دايما وراها لقاءات تانية… هسة نحن على شرف ناس الحوادث وما يسمى بجنيه الجمعية شغالين لقاءات وربنا يحقق المقاصد….
    والله اشتقنا لقلمك ومناكفات صديقك اللدود يا قرن فهلا اتحفتمونا

  5. مطوفشة قال:

    رائعوووووووووووووووووووووون بكل ما يحمل معنى الكلمة

  6. زوووووووول قال:

    اولا اشكر الروائى الرائع قرن بن شطه على الواو الهواده الذى زادنى اياه من غير ان استحقه .. انتو قايلين الواوات دى هينه ولا هينه ؟ عموما كانت جلسه رائعه جدا استمتعنا فيها بحكاوى البشاوى وقفشات اب احمد وزانها ود المهدى بوقاره المعهود وقهوته الظابطه وسهيل بنكاته ومعلوماته الغزيره جدا عن الاتحاد السوفيتى السابق رغم انه حضر متأخرا بعض الشئ بامر وزارة داخليته وهكذا اعتقد انا ويعتقد قرن شطه (ولا موش كدا يا قرن ) كذلك حضر جلستنا الهلالبى الرائع جدا ـــ على غير العاده طبعا ــ صاحب الفيس فود مصطفى ودالزبير الذى اتحفنا باغنية لا اتذكرها جيدا ـــ طبعا اخوكم ملط فى حتة الغناء دى ــ لكنها تتحدث عن العرس او حاجه من الشاكله دى …. كذلك التقينا بالبروف جبرا فى نيو لوك رائع جدا حيث لم يبق من اللوك القديم الا لفة العمه .. النيو لوك الجديد جعل صديقنا ود الزبير يشبه البروف بعد ارسال لحيته بالشيخ ابراهيم السنوسى .. بعضنا علق بان البروف يقترب رويدا رويدا من اسلاميى النظام ولا نستبعد ان نسمعه قريبا يردد عبارات من شاكلة جزاك الله خيرا ونحسبه ولا نستبد ان بحدثنا عن الابتلاءات فى قضية خط هيثرو .. كذلك التقينا بعد طول غياب باخينا الذى لم تلده امنا الرجل الخلوق الودود جدا عبدالودود افليقا والذى حضر برفقة ساره وحمودى وعبودى وكذلك حرمه المصون سمسمه كانت ليله ولا كل الليالى ضحكنا فيها كما لم نضحك من قبل .. تحيه لكل من حضر بنفسه وتحية لم حضر بقلبه وتحيه خاصه جدا لصديقى اللدود ود الخلا الذى حرصت كثيرا على اصطحابه الى شارع النيل يومها لكننى عجزت عن ذلك تماما وتحيه لاهلنا فى قطر والامارات والسعوديه والبحرين وليبيا وبلاد الواق الواق

  7. زوووووووول قال:

    عفوا نسيت ذكر رئيسنا وحادى ركب زاد المسيرالدكتور الذى كان ريتشا ولكنه اصبح غير ذلك بسبب سياسات داخليه وخارجيه …. كما التقينا على هامش الجلسه مع شباب شارع الحوادث الذين حرص الدكتور على استقطابهم الى صحيفتكم الموقره (سوداننا) وتفائل كثيرا بحضورهم الى اجتماع دار المسير املا فى ان توكل اليهم كثير من مهام العمل الخيرى الذى تضطلع به زاد المسير والذى يقومون به هم كذلك بالتنسيق مع البروف المدهش الفاتح جبرا وحتما سيستفيد الاولاد من تجارب الدكتور الثره فى الاداره والعمل الطوعى وكذلك سيستفيد الدكتور ونحن والنظمه من طاقة هؤلاء الشباب وافكارهم النيره لمساعدة اهلنا …كسره بايخه :الغايب عذرو معاهو يا دكتور

  8. ودالخلا قال:

    سلام ياقبيلة،،
    أحبتي الأعزاء وأسدقائي الألداء، كما يقول المثل الحديث ذو شجون فقد أثارت كلماتك ياصديقي قرن شطة في نفسي كوامن الشجن وأيقظتني من ثُبات طال أمده، وعدت بي يا صديقي للأيام الخوالي فيا ليتنا عدنا أو عادت الأيام…
    التحية لك وعبرك للحكيم نيام وللصديق أبكرون ولكل الأحباب دوك عزت وودمدني وودالزبير والتركي وسهيلا ولكل الأصدقاء بسوداننا ولرواد سوداننا وكل من يأتي ماري بي بيتنا حبابو وحباب اليوم الجابو….

  9. neiam قال:

    ياليتنا عدنا او عادت الايام
    ترم ترم ترررم
    او عادت الايام
    وبينما كنا
    نتمني للجنة
    لكننا تهنا
    في زحمة الاوهام
    في زحمة الاوهام
    ترم ترم ترررم
    او عادت الايام
    كثيرا ما اسائل نفسي لماذا نحن شعب يعيش في الماضي .
    كل شعوب الدنيا تعيش في الحاضر و تصارع من اجل مستقبل مؤسس البني التحتية موثق القواعد معروف الابجديات يستطيع اي خريج من كلالي الهندسة حديث عهد بالخرصانات المسلحة فطير الراي خمير الفكرة في فهم ال بيرنغ و الشرينغ و الكليرنغ ان يستوعب كنهها و يبت في امرها الا نحن متي ما تحدثو عن اختراع او فكرة في مذياع نسبقهم و نلجمهم بنشيد
    امتي يا امة الأمجاد و الماضي التليد
    ثم جاءت الأمجاد و ملأت الشوارع و شغلت الناس فهل غادر الشعراء من متردم
    أم هل عرفت الدار بعد توهم
    يا دار عبلة بالجواء تكلمي
    وعمي صباحا دار دانقة و اسلمي
    هسع الكلام دا الجابو شنو بس براك داير ليك سبة ربما يقول قائل او قائلة ..
    ولكن الامر ليس كذلك بل هو اقرب من ذلك حيث اني انا الفقير الي مولاه اب دربا عريض حاولت جاهدا ان اري لماذا لم نطور دانقتنا علي غرار بقية الدناقي و كلما عدنا او عادت الايام نعود الي الامس حيث كانت لنا ايام..
    لله الحمد ان اصبت و ان اخطأت فلكم المعذرة….
    تحياتي و احتراماتي للجميع..

  10. زوووووووول قال:

    بالله يا ادمن رجعنا زوووووول زى ما كناخلينا من قصة سودانى دى (ارجو حذف التعليقين ال تحت ديل يا مدير )

  11. قرن شطة قال:

    الاخوة الاشاوس الرائعون ….سلام …هو اتضح انكم اكثر من اشاوس رائعون!!! طيب مادام اصلاً فينا شوية حيل مانبدأ الكتابة ونحرك القصة دى شوية! وكان دايران انا بهبش ليكم ود الخلا وبعمل رايح ايذاناً بفتح النيران من كل الجبهات وحتى الصديقة! تحياتى وماتنقطعو بالله….سلام

  12. neiam قال:

    الاحبة اتمهلوا حبة..
    يبدو ان تعليقي قد افتهم علي غير ما كنت اعني حقيقة..واذا كان الفهم بتاع الانتو دا مسرين اليهو ممكن تمسحو التعليق و كمان تنسوا نيام نيام ظاتو ان شاء الله..
    الذي ارمي اليه حقيقة ان الاحبة يقوموا يغيبوا بمشو مصر بمشو السعودية ماعارف ما بمشو ماعارف لكن المهم ما بظهروا و لمان يظهروا بعد ستة سبعة شهور يبدو يسالموا زي النازلين من قطر نيالا (طبعا للشباب زمان كان في قطارة) ..
    وبعد السلام و التحايا القلبية الحارة يغيبو تاني ستة شهور و يجو يسالموا..
    انا قلت لي نفسي يا اب دربا عريض انتو حتظلوا تتسالموا و تمشوا و تجو راجعين تسالمو اها حدو وين الكلام دا …
    يا تتسالموا و بعدها continuation و يا تتوادعو و بعدو separation اما اذا كان الموضوع دا جاب ما جاب فانا من هنا استودعكم الله واحسبو انهو قد افتهمت …
    اما اذا سال سائل ماذا اعني بتطور واقع و ماهو نوع التطور و كيف فعندي ما اطرحه في تلك الحالة…

    • ياسين شمباتى قال:

      ياحبيب قول بسم الله !
      مافى زول فهم فهما ماهو ياهو ,,
      لكن على العموم انا السائل عن ماذا تعنى بتطور الواقع ؟
      كع ,,
      اشتاقك جدا يا عزيز …

  13. ودالخلا قال:

    سلام ياقبيلة،،،
    الصديق الصدوق أخي العزيز نيام، سَعِدْتٌ أيّما سعادة بمهاتفتك وسماع صوتك، وقديما” أيام الجوابات كانوا أهلنا الكبار بيقولوا الجواب نصف المشاهدة، أما نحن في عهد الإتصالات الإسفيرية فنقول الإتصال الهاتفي ثلاث أرباع المشاهدة لأنه بسماع الصوت والإحساس بالطرف الآخر، ولمن يكون بالفيديو كول كمان فتلك مشاهدة كاملة ياصديقي،،،
    أوافقك يا نيام في الدفع بالصحيفة وأن ندعو لها أولئك الرائعون الغائبون في البعيد هلا عدتم أو عادت الأيام..

  14. neiam قال:

    ساعود نصف الليل ينشرح الكلام
    و يذوب ترتيلي مع وقع الظلام
    قل للنفوس الخائفات من الدجي
    الله يسكب عطفه سرا ليرتاح الانام
    ـــــــــــــــــــــــــــــــ
    احبتي يامن في القري و الحضر
    ومن في المدن و الحفر (شمبة عديل كده)
    و من في الخلا و السفر
    ومن هو سارب او مدبر
    انتظروا المفاجأة ..بل انتظروا الكنز الذي عثرت عليه و اريد ان اتقاسمه معكم..
    لانكم احبتي في سفري الدنيوي و ارجومن الله ان نكون احبة دار السلام…قولو يا مهون..

  15. ياسين شمباتى قال:

    يااااااامهون ,,
    ومنتظرييييييين بعد انتصاف الليل !
    اممممممممم,,,

  16. neiam قال:

    طول بالك يا حبيبنا …انتا صبرا يبل اللابري ما عندك..لسة ما اخدنا الضو الاخضر..دا فلم كبير…انا امباره يسوي مس كول انتا ما يسما…مزاج ما اندك انا كمان مزاج ما اندي..اقول ليك كلام..هذا المنشرك ما اندنا…

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s