الاخوة الزملاء المدونجية السلام عليكم ورحمة الله وبركاته… خاطبنى الزميل العزيز د اسامة ( قرن شطة ) بان النادى السودانى الاسبانى وهو بالمناسبة رئيسه – بانهم بصدد اقامة اسبوع الفيلم الاسبانى بالتضامن مع السفارة الاسبانية بالخرطوم وان الدعوة عامة لجميع الاخوة المدونون وسوف بكون الزمان من السبت الموافق 26 والى 31 مارس من الساعة السابعة مساء بكلية السلام الجامعية للغات غرب عمارة سكر كنانة وجوار طرمبة النيل.
ولمزيد من الاستفسارات يمكن الاتصال بدكتور اسامة مباشرة على رقم الهاتف : 0912481376
سوداننا 
شكرا يا دكتور
والله فرصة الواحد يشوف ليهو ناس نضاف وسمحين في دار الخيالة بدل ما ناس العقيد وعلي عبد الله صالح ما عملوا لينا وجع وش…
معاك من سبعة مساء… وما ضروري زاتو كان مافي ترجمة…
عزت بالله عاين لي معاك للون النحاسي الضارباهو (الشمش) …وسال من شعرها الذهب وتدلى وما اندفق…المتاوقه (وقف تأمل) دي الحاجه الوحيدة الما عايزه ليها لغة….مش ؟
يا عزت بللاى هى إسمها الخياله
زمان أستاذ العربى كان بقول لينا إسمها (السوء نما)
قرنوف
الترجمه كيف إسبانيولى مافى
منتظرين ، كاميرة الحاوي توثق ،،،
الاخوة الكرام
سلام…
مرحب بيكم وان شاء الله تجدوا ما يعجبكم من سلسلة الافلام والتى تعرض لمدة ستة أيام ، وعلى كل توجد ترجمة على الشريط بالإنجليزى ونعمل على ان توجد فى المستقبل ترجمة بالعربى وجايز حتى بالعامية السودانية او الرندوق …تخيلوا فيلم إسبانى يتكلم (محنكاً) بالسودانى!!! مرحب بكم مرة اخرى..
العزيز د. قرنوف
سلام ومحبة واحترام
ياخي نحي جهود النادي ونبارك لكم الأنشطة الثقافية المتميزة، وياخي نسابتك ديل ليهم معزة وبني وطني أحوج ما يكونوا للتعرف على ما هو أكثر من البارشا والريال، فثقافتهم حقاً ثرية وأدبهم راقي وفنهم رفيع، وبالجد ما سائلين في جيرانهم سواء فرنسيين أو إنجليز أو ألمان، نتمنى أن يعكس لنا أبوعصمت وبقية الحبان إنطباعاتهم ، ولو الله أحيانا ورجعنا كاراكوبيا قطعاً سنسعد بحضور هكذا برامج
الاخ العزيز / مخير
سلام..
كنا نتمنى حضورك لهذا الاسبوع السينمائى ولكن للامور مساراتها….سوف تكون لنا نشاطات مستمرة إن شاء الله وعلى مدى العام..نراك فى مرة من المرات ونجدد لك الدعوة..
كانت أمسية استثنائية شاهدنا فيها فنا راقيا لم نحظى بمشاهدته مسبقا… فالفيلم الذي شهدناه في افتتاح أسبوع الفيلم الاسباني ما خلانا قدرنا (نغمض عيوننا) خلال تتابع أحداثه السلسة التي جسدها ممثلون مقتدرون وسط موسيقى متفردة، حيث تناول قصة جريح وجد فاقدا ذاكرته أثناء الحرب العالمية الثانية وتبين لنا بعد 40 عاما بأنه كان عازف بيانو ومؤلف مسرحيات
reported missing أثناء تلك الحرب…
شهد تلك تلك الأمسية الرائعة بجانب الضيوف الأخ (البيشاوي)…
ولكم أن تلحقوا فيلما أيها الأعزاء خلال هذا الأسبوع…..
شكرا (قرن شطة)
الاخ د.عزت
الشكر ليك انتا والاخ البشاوى فقد شرفتمونا بحضوركم ، ونتمنى ان يزورنا خلال الاسبوع باقى الاخوة ومرحباً بكم فانتم أهل بيت ومننا وفينا….
اخونا قرن شطة ..فى رواية أخرى اسامة ..
كنا نود أن نكون حضوراً معاكم ولكن شاءت الأقدار ان يكون موقعنا الجغرافى حاجزاً بيننا وبينكم ..لاكين زى ما قالوا فى المثل الجايات اكتر من الرايحات..
بالمناسبة الدخول بالملابس الرسمية ولا عنقالة ساكت ..؟
غايتو نتمنى إنو ابوعصمت يكون شاف لروحو وشاف لينا معاهو المناظر الجميلة والناس الحلوين..
وأمنياتنا ليكم بقضاء أوقات جميلة مع أهلنا الإسبان الراقين فى كل حاجة .
الاخ / حاج السلاوى
سلام..
كنا نتمنى تكون بيننا ولكن للظروف احكام…وزى ما قلت الجايات اكتر من الرايحات وان شاء الله فى الإجازة الجاية تلقانا فى منشط آخر وتشاركنا..
تحياتى لك وللاسرة ودمت