ساس يسوس فهو سايس…

Posted: الأربعاء,13 يوليو, 2011 by ياسين شمباتى in سياسية

جاء فى معجم (الشمباتى ذو البيان الآتى) ان المصدر ساس ومنه يسوس فهو سائس او سيّاس او سواس ومنه سوسة,او سوأة وتكون فعلا لازما لصاحبها..ما علينا ولندخل الى لب الموضوع :-

*قال وزير المالية ان ايرادات النفط من شمال السودان تكفى حاجة البلاد ,, قلنا سمح,وهى سياسة استباقية,,,ثم جاء مدير جهاز المغتربين وصرّح بان ايرادات المغتربين تطغى على ايرادات النفط! قلنا اهااااااااااااااااااا العوجة جات, وهى سياسة (الكلام ليك يا المنطط عينيك),يعنى اسه ما لقيتوا الا المغتربين المساكين ديل تاكلوا من لحمهم!؟اللهم فحوالينا لا علينا ,,وهى سياسة الردع….
*الترابى فى زيارة رسمية لمصر بعد 23 عاما من الحرمان وكما قال المطرب /صلاح مصطفى :بعد الغياب بعد الليالى المرة بعد العذاب_او كما قال_ اسه عليكم الله دى ما شفقة بت مسيمس؟؟ ما تخلوا (الجماعة) يمكسوا بعدداك تمشوا عليهم,لزومو شنو تخربوا عليهم من بدرى كدة!؟؟ ودى سياسة الضر…
*العمال والمواطنون الاستراليون غاضبون جدا من رئيسة الوزراء وذلك لتمريرها (ضريبة الكربون) ويطالبونها بالاستقالة واجراء انتخابات مبكرة! والمسكينة تجاهد من اجل اقناع كتلتها الحزبية داخل البرلمان من اجل مساندتها ! مسكينة المرا دى,انا لو محلها اقدم استقالتى واجى السودان وانضم للمؤتمر الوطنى والساعة ديك امرر البمررو من ضرائب وزكوات وجبايات ومكوس,قال استراليا قال…ودى السياسة الجد…

*قال رئيس الجمهورية بان البنك المركزى بصدد اصادر عملة جديدة! ما بسالك يا هناية! ودى بمناسبة شنو كمان؟؟وحيسموها شنو ياربى؟درهم ولا داونق؟؟ لكن هى جنس عملات وعمايل..ودى سياسة تدمير الاقتصاد الوطنى…

*واحد يتصل هلى قناة بتاعت اغانى فى برنامج لاهداء الاغانى واول ما يفتح الخط معاهو يبعث تحاياه لى اهلو ويعزيهم فى مصابهم الجلل! وعجبنى المخرج البلعو كلامو بقطع الاتصال..طبعا دى ما سياسة لكن مغيوظ منو سااااااااى الزول دا..

*حاج ماجد سوار_وزير الشباب والرياضة_ يصرح بان الاوضاع فى جنوب كردفان ستستقر قريبا! اسه الزول دا الحشرو هنا شنو!؟ ودى سياسة (الكوجين)..

*الصادق المهدى يصرح بان تجربة قطاع الشمال فى الحركة الشعبية لم تكن جيدة! وانتا وينها تجربتك مع المجربين؟؟عليك الله قوم لف…ودا كلام زول ما بعرف سياسة سااااااى…

*دخل ابن السماك رضى الله عنه على ابى جعفر المنصور الملقب ب(السفاح) وعلى انفه ذبابة كلما هشّها عادت اليه,,فاراد السفاح ان يهزأ بابن السماك وان ينال منه,فقال له: لماذا خلق الله الذباب يا ابن السماك؟ فرد عليه: ليذل به الجبابرة! الله اكبر…غايتو كان لقيتو ليك ذبابة فى وش زول ما تقولوا دا جبار,امكن حلو ساااااااى! ودى سياسة الاسلام الحق..

ونلتقى…

تعليقات
  1. ابكرون قال:

    كويس يا دوك بالله اعمل لينا ملخص زي ده اسبوعي واكفينا شر التنقل بالرموت ما قصرته …الصدق عامل مهموم بالدستور ….دستور يا اولاد ماما …تبا له من زعيم معارص …سووووري معارض

  2. ياسين شمباتى قال:

    الحبيب ابكرون..سلام..
    ههههههههههههههههههههههههههههههههه,,,اريدك واريد جنونك او كما قال عاصم البنا..قلت لى الملخص مفيد؟والله انا كل يوم اقول اكتب فى موضوع واحد,بعدين لقيت ليك الشغلة بتجر قلت الكبسولات دى سمحة..
    لكن ما لكتنا شوية عن تعرض الصادق دا ! اممممممم

  3. ود المهدي قال:

    يا شمباتي ياخوي الناس ديل ما عندهم التعددية في كل شي يعني
    بتاع الزراعة ممكن يكون وزير مالية وبتاع الادب (دا لو عندهم) ممكن يكون
    وزير نفط وزي ما قال you do not have to be the head to be the Boss
    وهكذا دواليك – واي واحد ممكن يشتغل في اي حتة (هم بالله قاعديين
    يشتغلوا حاجة مفيدة) وعش رجبا تري عجبا

  4. ياسين شمباتى قال:

    ود المهدى….سلام..
    يعنى القصة جبانة وهايصة,او كما اقترح على احد الاحباب ان اغير عنوان البوست الى(ساط يسوط فهو سواط) !
    والعاقبة عندكم فى المسرات..

  5. طارق أب أحمد قال:

    شمباتي
    البشير يوقع اتفاقية سلام نهائي لدارفور مع فصيل لم نسمع به من قبل

  6. ياسين شمباتى قال:

    طارق..سلام..
    والله انا قبل كم يوم لما سمعت عن الوثيقة النهائية دى قلت اكيييد العدل والمساواة وحركة تحرير السودانين بجناحيها المعروفين ح يوقعوا,اكان امس القى ليك التجانى السيسى! والله بطنى طمت بشدة واكتر ما قرفنى واذانى المذيع/محمد كبير الكتبى! الزول دا بقدر احترامى لمادتو وصوتو الا انى احتقرتو امس بشدة لانو كان واقف فى صف الحكومة عدييييل كدة! اين المصداقية والشفافية والحيادية ياا انتا !؟؟ لعنة الله تغشاهم…

  7. طارق أب أحمد قال:

    يا حبيب ما فى مصداقيه و يبدو إنو قطر ذاتا بطنها طمت و قطر يعنى الجزيره فالكتبى داير يطبل علشان يخلص و يمشى يشوف أكل عيشو

  8. ياسين شمباتى قال:

    لالالا دا كان محروق خالص من الحركات الدارفورية وقال هو ذااتو ما عارفهم دايرين شنو!طيب وكت ما عارف ما تسكست ساى ياخ! قرف يقرف يومك..
    كسرة: كيف اصبحتوا ؟؟

  9. ياسين شمباتى قال:

    المقطع الفوق دا كيتا فى ناس الحكومة ! بس كدة..

  10. افليقا قال:

    الحبيب شمباتى :
    اهديك المقطع التالى ولنبحث عمن سرق ثورتنا :

  11. ياسين شمباتى قال:

    الحبيب افليقا..سلام..
    وكل سنة وانت طيب..
    لكن الزول الفى المقطع دا بشبه لى حد كدة! والسرقوها ما ناكرين لكن البقنع الديك منو؟؟

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s