مقتطفات بسيطة من مؤتمر الوزير الحمبليطة….

Posted: السبت,9 يونيو, 2012 by ياسين شمباتى in اخرى

امس الجمعة الثامن من يوينو من العام 2012م فى مساء غير كل الامسيات امسكت بالريموت كونترول ووقعت به على قناة السودان لافاجأ بمؤتمر صحفى لوزير الدفاع (الما يغبانى) !

طبعا استغربت وقلت ياربى (الحشرات) احتلوا ياتو مدينة تانى !؟ ولا يكون اسرائيل ضربت بورتسودان _كالعادة_و لا يكون فى طيارة هليكوبتر نزلت فى جبرة ونزلوا منها جماعة ركبوا ركشة دخلوا بيها الحزام الاخضر وورجعوا تانى , لكن حيرتى ما طولت وعرفت انو المؤتمر عن مفاوضات اديس ابابا ,,,, لكن لمن اعملت فكرى لقيت انو الكلام دا ما منطقى ! وزير الدفاع مالو ومال المفاوضات , دى ما شغلة الساسة , ولا هم خلاص معينهم نضب ولا حاولوا يجنبوا الجماعة المحترفين المخضرمين ولا القصة شنو ؟المهم زولك طلع رئيس الآلية الامنية السياسية المشتركة للمفاوضات ! مقدرة والما عاجبو يرجع ورا ,,ورا,, ورا ,, لسع ورا هنااااااااااااااااااااك…

*اها زولك بدأ بالترحيب بالاعلاميين واشاد بدورهم وبحرية الصحافة , وكان نفسى صحفى والداهو امو ومرضعاهو لبنها يطير ليهو فى حلقو ويقول ليهو : بالله يا سعادتك قفلتوا كم جريدة ومنعتوا كم موضوع واعتقلتوا كم صحفى !!؟ طاااااااااااخ ..

*بعدين فجأة اشوفو يعاين يمينو لى فوق ! والصوارمى معاهو , قلت ياربى فى موية نقطت فوقهم ولا فى زول بفلع فيهم ! اكان القاهم بعاينوا لشاشة العرض !! عليك الله دى ما فضيحة ؟؟مش كان ممكن يختوا الشاشة او المنصة فى وضع يقيهو شر لفة الرقبة الممكن ما ترجع تانى زى (فلانة) لما مشت الشمالية !! وى وى وى…

وصاحبك انفعل معاها لمن طلع برة المنصة ! والميكروفونات تعبااااااانة وشكلو النظام الصوتى ضارب زى مؤتمرو دا , ياخى دى القاعة الكبرى لوزارة الدفاع ما معقول تكون مبهدلة بالشكل دا..

*طبعا شماعة انو الجنوب بيدعم الحركات الدارفورية بدا بيها وقال انو الجنوب بنكر دخول الدبابات عبر حدودو,يعنى ح تكون نزلت من السما ؟؟ طبعا اتمنيت انى اكون موجود عشان اقول ليهو : آييييي نزلت من السما زى عربات خليل ودباباتو ! تيييييييييييييييييييييييييييييييييييت.

*شيل لينا الكتابة دى بالله ! طبعا بخاطب فى الراجل المسئول عن اللابتوب وشاشة العرض .

سوق سااااااااااااى .

*دى دولة الجوار الاديناها حق تقرير المصير بكامل ارادتنا ,,, طبعا دا كلامو مؤنبا وموبخا الجنوبيين , لكن انا بقول ليهو : كضااااااااااب , الحق دا شالوهو رجالة وحُمرة عين !
*ون/ون/سكستى فايف !! طبعا الراجل قاصد 1/1/56 ! بعدين ما قادر يقرا الانجليزى كويس,طيب ما تتكلم عربى ساى وتريح نفسك وتطلعها من الحرج دا ! سكستى فايف سيجنال تو ! كااااااااااااااااااااااااااااااك ..

*واتطرق لى انو دولة السودان الجنوبى زودت عدد المواقع العايز تضيفها ليها , طبعا هى كانت اربعة ودلوقت عملوها تسعة او عشرة ! ودا اسمو (من يهن يسهل الهوان عليهو) , واظنهم سمعوا نصيحة د/كمال عبدالقادر بخصوص محجوب عرقى ! هيييق …

*غايتو فى اخر المؤتمر عرفت انو دا ما مؤتمر , دا ونسة ملجة ساى ! وصاحبك وقع استعطاف واستجداء فى الصحفيين انو يقيفوا معاهم ويقوموا بواجبهم الوطنى ! هاك الوطن دا .

اصلكم الشعب والاعلام ما بتعرفوهم الا فى الزنقات والملفات الوسخة دى .

*قبح الله وجهك ووجه من جاء بكم بليل وعاث فى الارض فسادا , وشوّه الله وجوهكم وزادها ابدالا ولا ارقدكم مضجع خير ابدا .

                                                          ونلتقى ….

تعليقات
  1. شمباتي
    بعد موقعة ذات الطيارة جات بالليل وكانت الأنوار طافية، اتوقع أي حاجة
    ياخ دا قال مهندس يومداك، قال شنو، بنسبة 13.24 تلتاشر واربعة وعشرين من عشرة ولا تعليق

  2. ياسين شمباتى قال:

    ههههههههههههههههههههههههه,, طفاهو صلاح !!
    غايتو السواق بتاع الطيارة دا عمليتو جبانة وانا ماخد منو موقف ! آيييييييييييي

  3. سهيل قال:

    شمباتي .. الراجل دا حيموت خالي ذنوب من وراك .. خليهو شويه

  4. المندهش قال:

    أنا غايتو زي أبو ريالة ده إطرشني ما سمعت بيهو لا في العرب ولافي العجم
    لما أتذكر إنو وزير دفااااااع لمن تجيني دوخة وخمة نفس وطمام ووووووو
    معقول وزييييير وكمان وزير دفااااع
    وتنطبق عليه النكت التي ذكرت في وزير الدفاع الإسرائيلي عامير بيرتس بعد هزيمتهم من حزب الله اللبناني
    فالوزير عامير بيرتس تحول إلى رمز اليهود المغاربة، فبعد الهزيمة أمام حزب الله، طلعت نكتة، بتقول:
    أحد الصحفيين الإسرائيليين سأل “بيرتس”: لقد قلت قبل الحرب إن بيريتس، سيجعل حسن نصرالله ينسى اسمه، فما رأيك الآن؟! فأجابه: من هو عامير بيريتس؟.

    “عامير” غضب جدا من هذه النكتة، فعاجله الإسرائيليون بنكتة جديدة:قاضي حكم على إسرائيلي 13 سنة سجن لأنه وصف الوزير عامير بيرتس بالأحمق. وكتب في حيثيات الحكم:
    3 سنين لإهانة موظف عام أثناء تأدية عمله، و10 سنين لكشف أسرار الدولة.

  5. عزت قال:

    يا شمباتي غلتان وثم غلتان انت راجل ما دخلتش دنيا… البيوقفك شنو في قناة السودان ومع عبد الرحيم كمان….

    • المندهش قال:

      تصدق أخي عزت أنا برضو شفت البداية بتاعت المؤتمر وبالرغم أن الصدفة لا تتكرر ولكن والله برضو بالصدفة جات قناة السودان بالغلت سااااااي

  6. ياسين شمباتى قال:

    سهيل..
    لع ما بخلى ما بخلى !! ياخ دا ورم عديييييل,,,الله لا كسبو عافية …

    المندهش…
    هههههههههههههههههههههههههههههه,,اها اسه انا ممكن يقولوا على كشفت اسرار الدولة ؟؟طبعا لا لانو العالم كووووووولو شافو ,لكن عليك الله شفت الريالة المسحها بالملفحة ! اى والله لما لحقوهو بى صندوق مناديل كبييييير !
    الهى لا تبدلنا لا تحولنا…

  7. ياسين شمباتى قال:

    عزت…
    اخشها بشنو !!؟ وكمان ح يرفعوا الدعم عن المحروقات ! اجيب ليكم بنزين من وين انا ؟اهئ اهئ اهئ

  8. بت وراق قال:

    سلامات للكل
    اولاً :- انت ياشمباتي ذاتك شليق شلاقه قناة السودان شنو البتجي ماري بيها والله انا مشفراها عديل كده عشان لا امر بيها ولا تمر بيى
    ثانيا :- قلت لى شنو صحفي امو ولاداهو ومرضعاهو لبنه والله ابو رياله دا يدخلو بيت الاشباح يطرشوه موش لبن امه دا يطرشو لبن امه الرضعو ابوه
    ثالثا :- انت الدنيا دي ادخله والبنزين بنتسلفه ليك من دفع الله واااااااااااااو

  9. بت وراق…
    هههههههههههههههههههههههههههههه,,حنضلتيها معاى لكن ! دا كووولو عشان برنجية !!؟
    هو جفع الله كان عندو بنزين كان اتبجح كدة؟؟دى جعجعة ساى…
    انا شوفى لبن ام ما ينطرش ! كع كرع رع

  10. بت وراق قال:

    بري ماتشوف حنضل طول عمرك بس انت متحسس براك ههههههههههههههههه والله البرنجيه وجعتني في مصراني
    قلت لى السواى ما حداث يعني دفع الله دا هواء ساي
    والله تقعد تتابع في ناس وزير الدفاع ديل الا تجيك زبحه وانت لسه (مشروع دنيا جديده)

  11. ههههههههههههههههههههههههههههههههههههههههه,,اتاريك مبيتة لى الشغلة !
    بعدين انا مشروعى خلاس باااااااااااااااااااااااااااااااظ,,اهئ اهئ اهئ

  12. AFLAIGA قال:

    شمبوتى اتنكاااش : انت الوداك تحضر شنو قناتنا انت ما عارف المغسه ولا غاوى مغسه
    اعتقد انو الوزير كان متوقع انو وفد الجنوب يقول ليهو خريطتنا بتبدا من نمولى الى جنوب نمولى شويه وهاك الباقى هديه
    من واقع اى مفاوضات رفع سقف التفاوض حتى فى السلخانه بيقولو ليك الكرشه القافله بى ميه وفى النهاية بتشيلا بى عشرايه والنسوان يابو بنضفوها !!!

  13. افليقا…
    بشرتنى ب(الكرشة) البقت غالية دى,كان كدى النحافظ على كرشتنا للزمن !
    ما احمد البلال قال ليهو كدة,ما كل رفع سقف يعنى العداوة وانما هى استراتيجية تفاوضية,,عمك لمن انحرج !

  14. نيام قال:

    السادة الداقوست
    تحية مملؤة بالشوق و العبق
    تزان بالالق
    و الحب و الترحاب و النسق
    حبيبتي تعطرت و صافحت يداي
    مددت كي اقبل الخواتم
    الممهورة الودع
    تمنعت عصية علي
    باسوردها امتنع
    الاحبة اهل الدانقا لمدة تزيد عن الشهر وانا احاول هاتف الادمن ولدنا الباشمهندس استرايكر وهاتفه ما تمحك
    و الدانقا تتمنع علي و تضحك
    حتي اسعفني بشاوي بهاتف الباشا الجديد فاليكم ارسل اشواقي قبل تعليقاتي و امانيا السعيدة لمن تعشعش و من هو عاشٍ او امل في العشعشة يا باشمبا..هذا اولا..
    اما عن الجمبليطة فحدث و لا حرج ..فقد سئل كيرنل باول عمن هو العسكري العبقري في نظرك فاجاب بانه الذي يجيد الصمت حتي لا تفهم كيف يفكر…اما عن جمبليطتنا فليته اجاد الصمت حتي تجف ريالته…
    ولكن لكل عملة وجهان يا شمباتي فلولا جمبلطة الحمبليطة وعموم الحمبلايط فان الانقاذ لا تكاد تطاق فهو كمهرج السيرك كلما احس الناس بالضجر خرج عليهم مهرج من خلف الكواليس كسر حاجز الرتابة…

  15. هههههههههههههههههههههههههههههههه,,,,ظهرت بعد غيبة وابهجت النفس يا حبيب…
    لكن تهريجو شييييين وشوف عينى الريالة سالت لما مسحها بى ملفحتو ! عليك الله شفتو ولا لا؟؟كما نلحقوهو بى علبة مناديل ! واااااااااااااااااااااااااى…
    وعن العشعشة فركز فى باسويردك احسن ليك ! هيييييييييييييييي

  16. AFLAIGA قال:

    شمبوتى : كرشة شنو البتحافظ عليها خليها هى تحافظ عليك اول !! هههه
    يعدين اخر اخبار من بلاد العم فهد بتقول انو انت بقيت تيوبلس عديييل من جوه !! اجب بلا او نعم ؟؟
    اما الرياله والتمتمه فديل الواحد من الخجل ما قادر يقول ما قادر اوصف
    الريالة لها سببان احدهما عضوى والاخر نفسى
    اما العضوى فهو احد مراحل التحول للمنقولية الا ربع بس ربك ستر فيصبح المريض شبه سليم شبه متخلف !!واحد مراحل اتضاح الصرع
    اما نفسيا فحسبك فى كتب التاريخ ان فلانا ارغى واذبد دلالة على الهيجان والانفعال

  17. المندهش قال:

    الأخ AFLAIGA
    صباح الخير .. إختلف معك في القول بأن فلان أرغى وأزبد وهي صحيح تنطبق على الهيجان و الغضب
    ولكن الكلمة لاتعني بأي حال من الأحوال الريالة ، الشخص الذي يريل أو أبو ريالة يقصد به الطفل الصغير أثناء مرحلة التسنين ، وعندما يكبر ويريل يكون الشخص ناقص نمو عقلي أي دلاهة و عوير او متخلف عقليا أو …. سمه ماشئت

  18. ياسين شمباتى قال:

    افليقا…
    نعم !! وى…
    وعن عضوية الريالة فاحيلك الى ناس الكيمياء (نادوس وعبدوز) ديل صعبين جدا فى حتة الترييل والمخاواة ديل !..

    المندهش…
    هههههههههههههههههههه,,طيب انت كدة قربت البعيد بس !! افليقا دا بيرو غريييييقة…

  19. بشاوى قال:

    ياشمبتة — هون عليك يارجل — والله عبدالرحيم دة يومبيطق فيك عرق انت ياخرابة مقاشر الزول دة مالك – القصة كلها لت فى عجن قالو اول مااحتلو السلطة انو الصادق كلاموكتير – هسة منو فيهم الماسك خشمو ؟ اذا كان بتاع الدفاع الفتة بيتكلم عن مفاوضات وبتاع الصحة يتكلم عن الامن القومى وبتاع التعليم يتكلم عن الملوخية – عايرة ادوها سوط

  20. ياسين شمباتى قال:

    البشاوى…
    ههههههههههههههههههههههههههه,,الملوخية السمحة دى !؟
    والنائب دااااك بتكلم عن شنو الما بعرف داك !
    وهى ما عايرة ! نادى لى ابو الحروف عليك الله ! وى وى وى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s