جلسن شوف يا حلاتن…حقيبة الفن

Posted: الأربعاء,31 ديسمبر, 2008 by عزت in اخرى

اغانى الحقيبة ( حقيبة الفن في السودان )

تمثل 90% من الاغانى التى تتداول هذه الايام بواسطة المغنيين الجدد وسميت بهذا نسبة لانها كانت تسجل على الاسطوانات الغير ليزرية القديمة والتى كانت تشغل بواسطة مشغلات توجد داخل حقيبة ومن هنا اتت التسمية ووهناك العديد من شعراء للحقيبة امثال
ابوصلاح – الجاغريو – العبادي – بطران – خليل فرح -
عبد الرحمن الريح – سيد عبد العزيز – عبيد عبد الرحمن
عتيق – عمر البنا – محمد علي الأُمِّي محمد ود الرضي

 

لكم بعض الحقيبيات و كان عندكم في حقائبكم شوية لا تبخلوا علينا و كل عام و انتم بخير

hagiba 

انـت حـكمة ات آيـة و لاّ انـسـان انت صاحي ولاّنايم ولاّ طرفك من طبعو نعسان

انـت روحـي انـت انسان عـيـنـي يـا صــاحي وانـت احـسـان
انـت نـادي انـت هـادي انت ميسان انـت ظـافـر انت ضـافر اسـود وفـرسان
انـت شـادن انـت لادن انـت فـتّـان انـت ضـامر انـت سـامر انـت هـتّـان
انـت نـادر انـت نـاضر انـت بستان انـت صـافي انـت نـافي زور و بـهـتان
ياحـيـاتي يامـمـاتي هـاك سـطران الصـبـابة ومـر عـذابا و قـلبـي اقـران
انـت سـاهي انـت لاهـي انـت بطران فـي دلالك فـي جـلالك ياسـامي وكـران
ياصـفـايـا يا وفـايا هـاك بـرهـان عـن غـرامي و طول

ياخي دا جننوا جن !!!!

 

ما بخاف من شئ برضي خابر = =  المقدر لابد يكون

ان أتاني الهم جيشو دافر = =         باقى يا خلاي صبري وافر

يلقى عزمي التام ليه خافر = =  يلقى قلبي شجاع ما جبون

بالعداء معروف ما ببادر = =         ما بخون الجار ماني غادر

ما بقول للناس مثلي نادر = =         بل بقول للخالق شجون

 

عمر البنا

يا حليف الخدري التايه في نعيمك

ما دام هاجرني أرسل لي نسيمك

و أنعش لي روحي بي ند جسيمك

أو طيب المسك الفايح من تبسيمك

 

أبوصلاح

قال لزم جرحك مدة الأزمان

لا روايحي تطبك لا و لا لقمان

البداوي جروحك شايفه يا سقمان

في عصير الند البنضحوا الرمان

 

 

أبو صلاح

من جنوني البيك هلوسن      كيف عيوني الليل ينعسن

فيك ثلاثة و عزن قسن        ماء و خضرة و وجها حسن

 

محمد بشير عتيق قال

قوم نرتشف خمر الهوى —           ونذكر احاديث الغرام

علي شاطئ النيل السعيد

الطقس معتدل الهوا          —–     قوم يا حبيبي نمر سوى

في خميلة و العالم نيام

الروض حلا و بسم الزهر — البدر في افقه ازدهر

مضى اسمه في شاطئ النهر

و القمر يهتف باهتمام —- من كل فن يبدي و يعيد

 

عتيق

الحب لذيذ بالمرة

يحوي الألم و اللذة

و كؤوس الصبابة المرة

فيه مسرة و فيه مضرة و فيه مبرة

فيه صفاء و فيه جفاء و فيه وفاء

أنسام الليل الغرة و المهج العليلة الحرة

 

الحب للحياة الزامي فاتح سبيل للظامي

ذو الغرض النبيل السامي

فيه كتبنا و فيه خطبنا و استوحينا منو أدبنا

الحب النبيل الروحي و الشخص الجميل كم يوحي

 

عتيق

أما بعد قد أرسل اليك كتابي

يتضمن جزيل حبي و معاني عتابي

من فرط اشتياقي اليك يبس ورتابي

و انتي ضنينة بي سلسال رحيقك تابي

 

استمرأت في حبك شقاي و عقابي

بس يا فاتنة ليه تتجاهلي و تتغابي

و على كل حال ما دام كشفت نقابي

عن حبك محال انكص على أعقابي

 

أنا يا فاتنة من حبك حرمت نصابي

و من ازمات جفاك اتراكمت أوصابي

و مهما كنت في نظرك عجوز متصابي

الشايف القمح ما بشتهي القصابي

 

خليل فرح:

قوموا خلوا الضيق في الجناين

شوفوا عز الصيد في العساين

يلا نطرد نقنص نعاين

النهار ان حر الكمائن

كلبي يا جمجم اصلو خاين

شوفوا كيفن يبرى الملاين

هبا شالا و كشح المراح

 

و انت يا حبيب يلا قوم و استفيد من اجازة بكرة و أغزي الجناين بس ما براك !!!

About these ads
تعليقات
  1. ابوالمنذر قال:

    ابو عصمت …
    ال جبره وال سوداننا.. والمحبين والمريدين…
    كل سنه وانتو طيبين … ليس بمناسبة ما يسمى راس السنه ولكن دعوه قلبيه مكنونة بالفؤاد نجددها برحيل عام واستقبال اخر ونسال الله ان يكون عام2009م :-
    كلكم تامين ولامين
    القمه العربيه رقم …فى القدس عاصمة فلسطين تحت رعاية سماحة اسماعيل هنيه رئيس الدوره …
    دارفور سلام ..جوبا امان..
    مصر يا اخت بلادى ياحبيبه (ده كان متين)…
    السودان رئيس منظمة اوبك وهاك ياابداع والسودانى ان لقى الطراوه فهو موهل لقيادة الشعوب…
    نحن ياابوعصمت ….
    عرب ممزوجه بدم الزنوج الحار ديل اهلى
    ديل قبيلتى لمن ادور افصل للبدور فصلى
    اصحاب قلبى والايمان وسافر فى بحور شوقن زمان عقلى
    اقول بعضى..!! القاهم تسربلو فى مسارب الروح بقوا كلى..!!
    محل قبلت القاهم معاى معاى زى ضلى
    ولو..ما جيت ..من زى ديل كان اسفاى واماساتى وا ذلى
    ,,,,,,,,,,,,,,,
    الحب لهيب فى الجوف زى الزناد مقدوح
    حب السودانى ان صفت الحياة عفيف شفيف صادق وما شعر الحقيبه الا دليل الاصالة فى زمن الاصاله وابداع سودانى فريد ما لقى اعلام وفرضت علينا عامية الاخرين بالاعلام لتبقى عاميتنا الفصحى مجهولة من غيرنا مما تسبب بجهل العالم العربى لدواخلنا العميقة واحاسيسنا الصادقه ..ليقيم فننا سالبا امثال عمرودياب وغيره جهلا ….
    خواطر متفرقه جات متداخله وعزرا لعدم وحدة الموضوع..
    وكل سنه…
    القاك ياحبيب عمرى وتلقانى
    وتلقى الريد معاى
    لا نسيتك ولا نسانى
    لابنساك ولا بقدر ولا عايز بعد حبك احب تانى…
    يا……….. ســــــــــــــــــــودانى…………….

  2. البشاوى قال:

    ابو عصمت
    جننتنا ورجعتنا لى زمن العديل والزين ياربى ناس نيام والسلاوى لما يشوفو الكلام
    دة كيف يكون حالهم اظنهم يقرو ويجعرو ويتذكرو الزمن القبيل كان باسم
    دمت عزيزى موثقا لكل ماهو رائع وجميل وزادك الله صحة وعافية

  3. حاج أحمد السلاوى قال:

    أبو عصمت .. سلام ..
    تنفعوا ثنائى محترم .. جداً .. إنت والأخت نونو ..وأهو كلو حقيبة فى حقيبة ..

  4. مش كدا بالله يا حاج
    انت تكتب لي
    و أنا أكتب ليك

  5. البشاوى قال:

    السلاوى
    فسًر أبن أوضَح
    ماذا تعنى بما قلت لابا عصمت يارجل أنسيت أن العواطف لها اهتمامات بالمدونة
    بغرض الايقاع باخوان سعيد فخبرنا اين نضع هذه الثنائية من الازدواجية

  6. لا هو بكون قاصد ثنائية في حفظ و قرض الشعر… مش يا حاج

  7. حاج أحمد السلاوى قال:

    يا قبيلة .. سلاااااااااااااااااااااااااام .
    وما تفهمونا غلط يا جماعة.. الأخت نونو لاحظنا إنها لديها العديد من نصوص قصائد الحقيبة الخالدة التى طالما أتحفتنا بها بين الحين والآخر .. إنتو نسيتو ولاّ شنو يا جماعة ؟.. واليوم أخونا أبو عصمت ما قصّر وادانا جرعة إضافية من هذه الحقبة التاريخية من الفن السودانى الخالد اللى ما زال كل مبتدىء الغنا لازم يغنى اغنية أو إتنين من أغانى الحقيبة عشان الاس تسمع ليهو وتعرفو .. وبصراحة كدة كلنا نعشق نصوص الحقيبة لأنها تحوى كلمات رائعة على مدى الأزمان .. يعنى إلى اليوم تسمع أغنية من الحقيبة تفتكر إنها إتعملت فى إحدى حسناوات هذا العصر …
    وبالطبع يا أبو عصمت كان القصد هو الثنائية فى نشر هذه القصائد فى هذه المدونة …ونربأ بأنفسنا أن نتربص بكم جميعاً ..والبشاوى عارف ..وودالخلا ضى القبيلة برضو عارف… بس حبو يداعبوك شوية ..والدنيا أول راس سنة …وإحتفالات بالإستقلال ..وياااااااااااااا بختكم..
    ربنا يديم عليكم المحبة فى الله ويجمعنا معاكم فى ابرك الساعات ..
    وكل قصيدة والجميع بألف خير …وما تقطعوا الجوابات ..

  8. طبعن على مر العهود و الأزمان مر بالسودان ثنائيات كثيره و ثلاثيات زي البلابل طبقت شهرتها الافاق مثل ثنائي الدبيبه و الجزيرة و النغم لكن ناس ثنائي العاصمة كانوا أحلاهم ففي حفلة شاغلهم واحد (لاطي) عندما وجدهم يغنوا في (ناس ناسيانا) و قام بشر فيهم و قاليهم: دي غنية يغنوها اتنين!! هك ..هك

    انما يظل اشهرهم ميرغني المأمون و أحمد حسن جمعة و الذي الى عهد قريب كان يعتقد البعض انهم شخص واحد لدرجة أن موظف المطبعة غلط في طباعة كرت زواج بت ميرغني المأمون و كتب … كريمة ميرغني المأمون و أحمد حسن جمعة…

  9. BakriMusa قال:

    لك الله يا ابا عصمت .. انت عوض بابكر ببقى ليك شنو ؟؟؟؟؟

    ( أذكري ايام صفانا )
    كتبت بأمدرمان سنة 1942 لحن وغناء كرومه
    ــــــــــــــــــــــــــــــــــــــــــــــــــــــــــــــــــــــــــ
    أذكري ايام صفانا وأذكري عهد اللقا والليالي الفي حبور
    اذكري ايام صفانا والليالي الفيها متبادلين وفانا
    اصطفينا ظروفنا والحظ اصطفانا
    جئنا بي كل اقتراح من حديث يشفي الجراح في مغازله وانشراح
    القمر بضياه الق والنسيم يهدينا أرواح الزهور
    الرياض مبتهجه ضاحكه اقحوانا
    والزهور فرحانه تستقبل اوانا
    رائعة يانعه وزاهية في توب أرجوان
    النهر اقترب والطيور تسجع طرب عامله موسيقة قرب
    ونحنا صار مجلسنا عامر في مرح في نشوة في غبطة وسرور
    كنا داخل روضة مافيش حدنا سوانا غير ان القمر يهتف بي هوانا
    من اغاريد فنه يسمعنا اسطوانه
    اما ارواحنا الخفاف رافله في اثواب عفاف زي عرايس يوم زفاف
    والنجوم بعيون تسارق
    في اشتياق تنظرنا من خلف الستور
    يا أمير الحسن يا سامي المكانة في عواطفك حبي لو فاقد مكانه
    اهدي لي تفاحه بس او برتكانه
    فهي غير شك مرضية منها اقتبس الضيا بل اذوق طعم الحيا
    انت ملهمني الأغاني
    انت مصدر فني احساسي وشعور
    ـــــــــــــــــــــــــــــــــــــــــــــــــــــــــــــــــــــــ
    وراجعين بعد تقفيل السنه ـ

    ودمتم سالمين

  10. ابكرون قال:

    السلاوي : تحية من (الدوخة)….انت اسه مالك في زول سألك ولا هبشك براك تتلفت زي الحرامي مش يا ود الخلا….
    عزت : الحقيبه دي نبضنا واحساسنا وهي المصبرانا علي الورم ….وما عايز انفتح في الحقيبه وياريت الادمن استرايكر
    ينزل لينا شعار الحقيبة وسلامها الجمهوري في مقطع صوتي صغير وهي رائعة ود الرضي …ملوك امدر

    ملوك ام در
    الليلة كيف امسيتو
    يا ملوك أم در يبقي لينا نسيتو
    الخيال لي جسمي وخليلي أسيتو
    ومالو لو بي طيف الخيال أسيتو

    جلسن شوف يا حلاتن
    فزر في ناصلاتن
    قال لو لي جن هوي حبابن
    الحبايب حبايبين
    يالله
    الناعسات كاحلاتن

    والله ما بريد غلاتن
    ما هم لي جن هوي حبابن
    يالله

  11. علي سنكل قال:

    والله يا بقا ريتش موضوعك ( سمع وشوف ) منو قرايه وثقافه ومنو غربال وفرز كيمان.
    شوف ناس قروب (أ) جو مارقبن كيف !
    واحد ورا التاني.
    حتى أبكرون الكنا ما عارفين سبب قعادو في الأمازون شنو، طلع رجع ( الدوخه) دايخ من دوخت الخرطوم.
    بس الباقي لينا تعليق من بشار ونيام وجبرا ذات نفسو . .
    إنتو ود الزبير معناتو خلى بورسودان نوهائي؟

  12. شكرا يا ناس قروب (أ) و هاكم دي

    ضاع صبري اين ياوصـلي..
    قلبــي بنارالغرام مصـلي
    ياعـهود امالي أنفصــــــلي..
    مابقيـف من النـويح أصلي
    عقلي يوت كل ساعة ينقص لي..
    فيك ضاع ياطـيبة الأصلي
    أيه ده ليل والبدر واضـح لي..
    ام ده دعسـك محيو فاضــح لي
    يالعيون عاد روقـي وحـلي..
    خفي رمشك ده المجـرح لي
    زاد من نار الصدود وجلي..
    يامعاني الشـعر والزجــــــــلي
    باهي جيدك والخــديد مجلي..
    ترى ده الهـلاك في الأعين النجـلي
    ليك نسايم الشوق دوام رسلي..
    في هواك كم ضايع مثــلي
    ماسليتك وأنت كيــف تسلي..
    وأنا صرت ميت وميت والدموع غسلي
    مالي ياليل الهم تجمع لي ..
    ديمـه يا نيراني تشــتعـلي
    يابدر بالله أســطعـلي..
    وياسـهيل أرجـوك تسمعلي
    ترمي محييك في الكـــفل تعلي..
    تفني قامتك بالصـدير تعـلي
    ياحمام بالله أسـجع لي..
    ماله ضـــايع في الخيال فعلي

    عبيد عبد الرحمن

    كسرة: هسه سهيل دا الجابو هنا شنو

  13. nono قال:

    التحية اصحاب المدونة/
    النصر لغزة / اللهم اعز الاسلام المسلمين ازل الشرك المشركين

    و انت يا حبيب يلا قوم و استفيد من اجازة بكرة و أغزي الجناين بس ما براك !!!

    بالمناسبة/انشاءالله عواطف طبقة نظرية الاستاذ جبرا غذة الشيطان

    لو دايرين من شعراء الحقيبة ركزوا علي ابو صلاحححححححححححححححح وعتيق
    لانة دشديش شديد؟؟؟؟؟؟؟؟؟؟؟؟يا ابو محمد

    شوف العين قالت ده لا لا

    صدت من تيها ودلالا

    ريدتك ساكنة الجوف خِلا لا

    والأعضاء امتزجت خِلالا

    وبراق سنك شقَّ لالا

    ولحظك صاب أحشاي قلالا..
    يعني للكمونية دة هبشة

    *ليك جوز عين نعسان وكاحل

    وخصراً يميل*************** وصدر راحل

    ولي وجدي اللي جسمي ناحل

    بحر الشوق ما ليهو ساحل

  14. ودالفتيحاب قال:

    الاستاذ عزت بقارتش
    السلام عليكم ورحم الله
    خليت الجماعة رمو العمم وشرطو المركوب للرميات والابيات التي اثارت الشجون لان الحقيبة لها طعمها ,
    وبي بنانك ازدهت الزهور زادت جمال ونضار وطيب
    الروضة في موضع خصيب حضنوها وتلاقو النهورترى فيها انواع الزهورمن كل لون اخذت نصيب
    ده كلام عجيب…والله
    تحياتى للجيل الجميل

  15. د. عزَت و الأحباب و الأ صدقاء,

    كل عام و أنتم و المدونه فى تقدم و أزدهار
    الموضوع جميل لدرجة أنو الواحد كل ما يقول يدخل يشارك , يدخل يعمل كوبى بيست , كوبى بيست

    لا أعلم سر حبى للحظك الجراح التى كنت أراههن حتى وقت قريب بأنها لم تؤدى من فنانى الحداثه بل و لا يستطيع اى كان أن يؤديها أو يغير فيها , ألا أن زعمى على مايبدو ليس صحبحا الأن

    رحم الله مستودع الحقيبه بادى الذ كان يؤدى كل أغنيه بنفس الأسلوب الذى تؤدى به من قبل كل فنان على أختلافهم

    وأطال الله و أبق لنا الفنان الموثق عوض بابكر

  16. قيل عن شعراء وفنانى الحقيبه أنو الشاعر يبدا الوصف من فوق
    الشعر سواد الليل ، العيون فنجان ، الخشيم رمان , السدير برتكان ، الخصير شنو ما بتعرف داك ثم هووووى يااااا ليلى هوووووى

  17. يا ناس بحرى

    ما فى واحد أتذكر الفنان الرائع أيوب فارس عليه الرحمه
    فنان أصيل يعشق الفن و بحرى و أبو صلاح

    لا توجد له تسجيلات بالأذاعه نسبة لأنه رفض أن (يقطع الكبرى لأمدرمان )

    توجد له مكتبه ثره لدى محبيه فى بحرى وقد قام البعض منهم بعمل مشروع مكتبه لجمع و توثيق أعماله الراقيه التى يتغنى بها أغلب فنانى الحقيبه آنذاك و حتى اليوم

    يا دكتور على ما أظن أنكم من كنتم من سكان بحرى و قد تكون ليك معرفه أكبر بالفنان

  18. hamsasw قال:

    تمثل 90% من الاغانى التى تتداول هذه الايام بواسطة المغنيين الجدد

    ليه نحن زعلانين لما شبابنا الحلوين يحفظو حقيبتنا ويغنوها تاني بصورة تمشي مع سنهم وايامهم الحلوه

  19. hamsasw قال:

    د / عزت
    وين شي عجيب في غرامك يا فريع ياسمين ( بوجهك الكوكب يجهرني ساعة يبين بقامتك اليايات الفي الصدير لاعبين )

  20. د. عزت مساء الخير
    بس عايز أستلف منك المساحه دى لغرض إنسانى بحت قد يساعدنى د. شمباتى على إنجازه

    وهو كالأتى يا دكتور شمباتى من يوم الموضوع بتاع يا أفلايقا أنا داير أطالعك من اليوم داك و الزول ما ظهر باللهى قول ليهو ياخى الموضوع أتنسى عليك الله أمرق باخى هو نقد مرق إنت خايف من أب أحمد ياخى أنت أظنك ما بتعرفوا دا ما بخوف كديسه

  21. د.ياسين شمباتى قال:

    الاخ طارق اب احمد..والله زولك ما كنت قايلو كدة..كنت بتكلم معاهو قبيل فى التلفون وهو مزنوق بشدة فى العمل وباذن الله ح يرجع ليكم على الاتنين كدة او الاحد..بس براحة عليهو..

    غايتو كان رجع الا تجروا,,لانو ح يكون شرفان شديد..

  22. شباب سلام

    من الأسكلا وحلا قام من البلد ولى دمعى اللى ثياب بلا
    بى داهى العذاب حلا وبى تذكارك بتسلى دمعى اللى ثياب بلا
    قلبى ذاب وإختلا وين بدر الكمال هلا دمعى اللى ثياب بلا
    جبل أولى حبيبى غشا وحصل القطينه عشا دمعى اللى ثياب بلا
    يا قلبى الطفش و فشا الما ليت ينكفشا دمعى اللى ثياب بلا

    أها أنا وصلت البابور لحدى القطينه واحد يواصل بيهو للرجاف والراجل يقدر يرجعوا

  23. يا أب أحمد سلام
    الحقيقة جيت لقيت الوابور واقف في القطينة قمت فتشت جواهو لقيتك نسيت أهم بيتين يا خ معقول تنسى الظبي القطعوا فيها القصيدة عشان كدا قمت عدت ليك القصيدة لمن وصلتو الرجاف بس رجيعو دا الا ود الخلا

    من الأسكلة و حلا
    قام من البلد ولى
    دمعى اللثياب بلى
    صفر ودع البابور
    حاجزين قمرة ا ثنين دور
    البابور مر بالمجرور
    شال ظبيا سكونو خدور

    جبل ا ولياء حبيبى غشى
    حصل فى القطينة عشا
    يا الطفش وفشا
    والما ليتو ينكشفا
    حل زى الصقر خوى

    كالبدر الدويم ضوى
    عاد لا حول لا قوة
    حبيبى حليلو فى الكوة

    صباح الخير على ام نفلين
    احيى البيها محتفلين
    سيد الحسن رب اللين
    شرف كوستى والجبلين
    بقدومك كدوك اضحى من الكساد ارباح
    وانا من نياحى صرت ابح كانى فى مبرك المزباح

    سلام متوالى ما غبا
    ما مر النسيم هبا
    ال لى العفاف ربا
    يخجل كامل الرهبا
    صب يا دمعى لا تكون جاف
    يا البقيت رجاف
    البدر الخفا الأنجاف
    اليوم شرف الرجاف

  24. hamsasw همسه سوي دي زي لو بهمسه عموما فعلا شي عجيب لمن أبو صلاح يوصف غايتو دا لو كان بعد الشريعة كان جلدو أربعين جلدة

    اجـسـامـنـا لـيـه جـسـمـيـن
    روحـنا واحـدة وليه اتقسمت قسمين
    شئ عجيب في غرامك يا فريع ياسمين
    انـا ياحـبيبي تجدني علي هواك امين
    وفؤادي يحجزو عن افكاري في التخمين

    وحواسي تحسد نظري لحسنكم تضمين
    و شمالي تاخدو الغيرة اذا جلست يمين
    فيك يا حبيبي اثنين اللي المنام سالبين
    هم شـالو نوم عيني و للضمير تاعبين

    بي وجهك الكوكب يجهرني ساعة يبين
    وبي قامتك اليايات الفي الصدير لاعبين
    من المنام ما معاي و لا ستة من ستين
    عـندي التلت من عقلي وعندك التلتين

    شـايقاني بسمة فاهك در عقيدو متين
    لـولاها مالي صالح في الزلال و التين
    يـالفريد فـي ظرفك زي صداقتك وين
    مااظن تكون ولا بدعت قبل في التكوين

    عـلي صـحيفة قـلبي تـدونت تدوين
    و ديـن محـمد حـق لا يقبل التلوين
    يامـن اسرت فؤادي ملكتو في اليدين
    يـامـلفـت الانـظار يـاناير الخدين
    نـحـن الجميع مادمنا قلوبنا متحدين
    تـبقي الصداقة قرابة و نكسب الودين

  25. يا دكتور والله لقيتك مبالغه
    ياخى الحته بتاعت يا قلبى الطفش وفشا الما ليتو ينكشفا دى محيرانى عمرى كلو صدق أنا كتبتها زى ما كنت بسمعها

    كمان البيتين الأتفضلت بيهم لم تغنى فى تسجيل ميرغنى وجمعه
    الأغنيه لها قصه لطيفه على ما أذكر أن الشاعر أخد شاكوش و لذا قرر يسافر الجنوب حتى ينسى الموضوع و بعد أن تم القريض لم تعجب القصيده أحد الشعراء فقال له المقوله المشهوره أنا وصلتو الرجاف أنت أبقى راجل ورجعوا

    لا أستحضر الأسماء والتفاصيل لد أرجو التكرم بالمساعده من الناس الذهنها صافى وما أتلحس زى حالتنا

    هى أيضا دعوه لتوثيق الملح و الطراثف التى تسببت فى كتابة هذه الأغانى وكل أغنيه لها مناسبه على سبيل المثال أغنية الأوصفوك التى إحتكم فيها إثنين من الشعراء إلى عتيق وكل يجزم بأن قصيدته هى الأفضل(قطعت القصيدتين غى فتاه مليحه إنزوت عند رؤيتهم لها ولكن هده الثوانى كانت كافيه لكى ينجر كل واحد قصيدته ) إحتكما ألى عتيق الذى فصل بينهما بأن
    الأوصفوك قط ما أنصوك و,,, وراح يوصف ويعدد فى جمال البنت اللى عمرو ما إلتقى بها

  26. حاج أحمد السلاوى قال:

    الأخ ابو عصمت ..وكل الصحابة …وعشاق الحقيبة
    غايتو يا ابو عصمت البوست دة كشف جِنس حاجات كانت مستورة اصلها ما معقولة …كشف الناس القلوبهم رهيفة وما بتتحمل الهبشة ..وأول ما تجيب ليهم سيرة العيون والشعر والشنو ما بعرف داااااااااااااك تلقى الواحد جسمه كلو إترقط وقعد يتذكر الأيام الخوالى …اتاريهم كانوا قاعدين على الهبشة..ونحنا قايلين القبة تحتها فكى …وإنت زاااااتك يا أبو عصمت طلعت ما هين تب ..ويا ما تحت السواهى دواهى ( أو العكس .. يمكن ) وحافظ كمية كبيرة من الغنا الجميل دة ..وكلكلم طلعتو حقائب يا ناس قروب (أ) …ربنا يديكم العافية والصحة عشان تكملوا باقى الكبكبة والكنكشة ( .. إنت معاى .. يا ابكرون ؟؟ ) وبعد داك كل قرد يطلع شدرته ..
    إنتو يا جماعة الخير مش ملاحظين الغياب الطويل لأخواتنا وبناتنا الحرائر .. ناس الغبشة وسماسم وهمسة شوق ومهيرة وبنات بحرى .. وكل البقية منهن …حتى أختنا نونو خلت قصائد الحقيبة واتجهت إتجاه أخروى.
    الدينمو .. افليقا .. ليك وحشة وطوّلت الغيبة …سمعتو …ولاّ جابوهو ليك …ولاّ …… ؟

  27. ابكرون قال:

    والله يا حاج السلاوي عندك جنس محن..قلته لي شنوووو ؟ ( أخروي)..
    طيب مني ليك ولعشاق الكلام الحلو هااااكم دي ويكون كويس لو شرحته للشباب ديل كيف بسووا ويدقوا اللول ———————————
    زاد اذاي ياصاحي

    ..لعبيد عبد الرحمن…:
    ——————————
    زاد أذاي يا
    صاحي واعتراني نحول
    طرفي دامع وصاحي بالسهاد مكحول
    حال علي الحول
    والموانع بينى وبين حبيبي تحول
    قلبي قال ممحول
    صبري ضاع ياجافي وخصمي صار ممحول
    العلي ما بزول والأنين يابدري والحنين مابزول
    الجسيم مهزول
    منيتي وآمالي ونومي في عيون زول
    يانسيم مرسول لي حبيبي
    لعلك منو عالي تنول
    أمشو ليهو مثول
    علّي أنظر حسنه أقبّل المعسول
    يافضول أقول رفعة قامته
    وحسنه وصفه شرحه يطول
    من ندى المسطول
    كم يواعد ويمطل يومي طال ممطول
    القوام معدول
    والوريد كالدمية والأسيس مسدول
    الكتيف مهدول
    بعضه نام في بعضه تقول حرير مجدول
    سوو ا ليه اللول دقوا ليه اللول
    كان يرقص ردفا من خصايصه كسول
    ايه يفيد القول
    وايه يفيد من شعري فيه مهما أقول
    منه حالمة عقول
    الوصول للبدر ياخي ما معقول

    زاد أذاي يا صاحي واعتراني نحول
    طرفي دامع وصاحي وبالسهاد مكحول

  28. ياشعوب سلام

    مواصلين ال Copy Paste ومرفق مع الكوبى التعليق الظريف الذى يسبق القصيده

    يعنى يا أبو عصمت ما تجى بعد كم سنه كده وتقول لينا الغنا شنو البعرف داك

    أبكرون يا أخى أنا ما شاب لكن ما بعرف الكلام القلته دا ( بسووا ويدقوا اللول )

  29. ياخ جدودنا زمان ديل كانوا حكاية… طبعا لكل غنية ليها قصة و لكن ظنيت أجملهم و التي كانت ملعوبة ون تو و لا في الأحلام القصة بتاعت البت الكانت دايرا تكشح المويه و عندما فتحت الباب لقيت اثنين في وشها قامت زاغت لي جوه

    الأول قال: حاول يخفي نفسو … هل يخفى القمر في سماهو

    التاني متلقى حجج برضو قال ليهو: أبدا لا و طبعا لا… شفناهو شفناهو

    و هووووى يااااا ليلى هوووووى زي ما قال أب أحمد

  30. علي سنكل قال:

    والله يا عزت فتحت ليك سيره عاد الله يقدرك على سدها، قدر ما سكتنا ليكم يا ناس (أ) ما دايرين تسدوها.

    قال ليك كان العبادي جالساً في بيت عرس وعجبتو واحده من الحسناوات فطلب من العريس أن يرقصها ، وكانت العاده أن تطلب من العريس ذلك تأدباً إذ لا يحق ذلك لغيره.
    فعلاً طلب العريس منها الرقيص فقامت والتفتت تجاه البنات لتعدل توبها عشان طبعاً صدرها ما يبين للرجال وهي تعدل توبها. وكان بجوارها شافع صغير إسمو إدريس ود طه ، وهي قايمه طولها قلت ليكم إستدارت لفه كامله حول نفسها فضربت الشافع الصغير ده بعجزها فسقط أرضاً.
    فأنشد العبادي:
    قصيبة التقنت اللي الخولي بتجلاها
    تبرد في البقوني وفي الشتاء رفاها
    برمح الغرام شاقا الكبد خافساها
    أنا يا ريتني بي رفسة دريس ود طه

    • اسامة قال:

      علي سنكل

      الابيات التي ذكرتهاعن العبادي

      قصيبة التقنت اللي الخولي بتجلاها
      تبرد في البقوني وفي الشتاء رفاها
      برمح الغرام شاقا الكبد خافساها
      أنا يا ريتني بي رفسة أدريس ود طه

      لم اجد من يؤكدها لي … فضلا ممكن تذكر لي اين وجدت هذه الابيات و نسبتها إلي العبادي؟ او قوة مصدرها؟

      و السؤال الثاني كلمة بتجلاها لم اجد لها معني و إن كنت وجدت معاني للبقية الباقية و الخولي هو رئيس المزراعين؟

      انشاء الله تكون مواصل و تقرأ كلامي هذا

  31. ابكرون قال:

    المخضرم الاخ طارق : صباحك فل
    زي ما معروف رقيص السباته (السباته دي يا مشاكل ومن في قروبه عباره عن بُساط او برش يبسط او يفرش لرقيص البنات) …
    الغناي او الغنايه ترقص البنات او العروس بي رتم معين او (دق ) دلوكه معين وتتبعه اغاني خاصه للرقيص زي : (اللول لول العروس بت السرور العظمه الخ)…
    فهنا شاعرنا (الممسوخ شدييييد) عبيد عبد الرحمن في قصيدته زاد ازاي يا صاحي….يطلب من الغناي او الغناية ان تدق او تسوي اغنية اللول عشما ان تتحرك (محبوبته وقاتلته) ويشاهدها وهي تبدأ بالرقيص وذلك بتحريك ردفها الذي وصفه بانه (من طبايعه كسول) ….منتهي الوصف الحسي الجميل….والله اعلم
    تورته نفس يا طارق….بس ما يطلع لي زول (بواو واحده) يقول لي ردفا دي شنو ولا دلوكه شنو …سمح ؟؟؟

  32. ابكرون قال:

    سنكل : وادريس ود طه ده ماااااات

  33. علي سنكل قال:

    أبداً يا أبكرون ما مات لكن طه ذاتو أغمي عليه.
    حمد الله ع السلامي ، صاحبك بي جاي جا راجع قاطع مويه ونور وعارض حقو في الأمازون للبيع.

  34. aflaiga قال:

    salam wa shog shadeeed
    - as soon as poss
    we will write

  35. علي سنكل قال:

    aflaiga
    تكتب أيه؟
    أول حاجه تورينا كنت فين؟ وبتاكل أيش؟ وبتنام فين؟ ومين كان بيغسل لك هدمتك؟

  36. ابكرون قال:

    سنكل : اكيد كانت (هركولة درم …) وادريس يكون زي الرفسه حصان وغاب من المدرسه اسبوع…واظن العبادي ذاتو ما كان بستحمل حادث التصادم ده
    صاحبي نفسو قصير ومحسكن طوالي ولو باع زي قولك ومرق وجا علينا (اسحن ) ليه…

  37. حاج أحمد السلاوى قال:

    غايتو الناس العجايز ديل عنهم جِنس مِحن..يفشوا غبينتهم بس بالكلام ..ما صدقوا لقوا ليهم نفاج سغيرونى يدخلوا منو .. قاموا عملوه بوابة عبد القيوم …وقعدتو توصفوا فى الصدر وفى العجز وفى الرقيص وعملتوها حِِجة عشان تعيدوا وتتذكروا أيامكم التى ولت من غير رجعة والشنو ما بعرفو دااااااااااك.. سيبوا الحاجات للشباب زينا وقوموا شوفوا ليكم بِرش صلاة ولاّ تبروقة واطروا الله … يا عجايز.. يا كراكيب … والله إنتو فُتّوا الأخت نونو بيغادى قبل ما تتجه الإتجاه الأخروى … يا ابكرون ..

  38. aflaiga قال:

    amu ali
    i mean iwill write to answer your qustions
    can i get out- beb reb – and come in – toosh reb – with out answering yours and others ?????
    can i ??
    absloutly i couldnt

  39. aflaiga قال:

    shabab ;
    - lets forget about the 5 w & h
    why – where – who – when – what – how
    lets say
    dont do it again
    and lets ask god all of wee to give us agood new year 2009
    im so sorry
    till we comunicate in arabic

  40. حنين قال:

    السمار الكرام والمرطب العزيز .
    سلام وحمد الله على سلامة أفليقا بالشوفة .
    والله ياناس قروب أ شايفكم منداحين فى الموضوع ومندمجين ورجعتو خمس وعشرين سنة بى أحاسيسكم ومشاعركم وعواطفكم . ورمية طبق البوخة وقام ندا يهتف نام من الدوخة . ومن جناين الشاطئ وبين قصور الروم حيى زهرة روما وأبكى يامغروم .

  41. مشاكل قال:

    افليقا
    شوقنا بحر
    دموعنا مطر

    منتظرنك بأحر من سبعة المريخ

  42. مشاكل قال:

    مش كدا يا حنين
    الجماعة رجعو كان خمسين كان ستين سنة لي ورا
    اها نحن كان رجعنا غير محمود عبد العزيز ما بنعرف زول

  43. ابكرون قال:

    افليقا : انت في الكنغو برازافيل ولا وين ؟؟؟؟ بس اوعه تكون في الهناي داك …؟…والله فقدناك في الإجازة كان علي الاقل حركته كسالي بورداب الخرطوم انهم يتحركوا يزوروا ابكرون في بيته لكن معليش الجايه….!
    السلاوي : يا صغير (يا تتي) يا قروب z …. انت لازم تجيب سيرة البحر ده يا ود الخلا ما تحصل الزول ده

  44. أها يا مشاكل
    بعد السلامز
    أشرح ما ليس تحته خط

    قصيبة التقنت اللي الخولي بتجلاها
    تبرد في البقوني وفي الشتاء رفاها
    برمح الغرام شاقا الكبد خافساها
    أنا يا ريتني بي رفسة أدريس ود طه

    وما تقول لى غير عم د. عزت ما فاهم شى

  45. عزت ذاتو كان ما شرح سنكل ما كان عرف الرفسة… لكن يا سنكلوني الواحد هسة ما ظنيتوا بشتهي رفسة زي دي تقوم تكسر فيهو مخروقة و الا حاجة

  46. حنين قال:

    يا مرطب .
    ليس من رأى كمن (إنرفس) الاول بكون متلزز والتانى بكون متألم شوية …

  47. حاج أحمد السلاوى قال:

    يا جماعة .. الفاتح أخونا وين ما ظاهر ؟…ولا عرفنا رايه شنو فى المولد دة الشغال ليهو تلاتة ايام ؟.. أدوهو رمية من رميات الحقيبة الكاربة يمكن يخش معاكم … غايتو يا ابو عصمت طلقت النارية فى العجايز ديل وخليتهم يجقلبوا ساااااااكت .. ربنا يستر .

  48. د كتور . ود الخلا . أبكرون و سنكلونى

    الله بس يستر وأخوكم عبد الرحمن المسيعد ما يدخل عليكم هنا يا خى دا لو بس قرا كلام ود الخلا أحتمال كبير ما يلقى سودانى يقدر يترجمو ليهو

    بي ضنبو (هييع!! عفيت منو العشاري أبزييق)!!

    ودى بيشرحوها إزاى يا

  49. aflaiga قال:

    عزت البكاى ثرو كل الحجاج البكايين : والله حقيقة انتو ناس محظوظين جدا تعرفو ليه ؟؟ لانكم حتى البكا بكيتوهو زمان بى رقى وابداع !! مش بكا الايامات دى بتاع :
    باسم الحب احول ليك رصيدى
    كانت على ايامكم البنوت ذاتن تقيلات والواحده الا تكتب ليها قطعه ادبيه زى الفوق ديل بعد داك تلقى منها نظره يا السمحه ام عجن !!
    مش بنوت الايامات ديل الواحده رساله نصيه بى خمسن جنيه من الموبايل تكون على شاكلة ( يا مجنون مش انا ليلى ولا بنسمة هواك مايله عاوزنى اقول بحبك ليه بحبك بس مش قايله !! ) .. شفت كيف يعنى فى فرق بين الناس البكو بى ليلى وقيس ذاتم وبين الناس البكو بى اتصالات ما بعد منتصف الليل المجانيه !!!
    وجاييك تانى …

  50. nono قال:

    التحية اصحاب المدونة /
    حقيقة البيستر دة حايظل مفتوح لانة الماعندة قديم ماعندة جديد
    الشاعر عبيد عبد الرحمن / انا ما بقطف زهورك
    يالغصن00 الفي نضورك

    ياالبدر00 الفي خدورك

    ومترقب ظهورك

    وأتامل في محاسنك

    وأتمتع بمناظرك

    واتوسع في سروري

    أنا مابقطف زهورك بعاين

    بس بعاين بعيوني

    *********

    ولعبت بي دورك

    واصبحت مسحورك

    وسبحت في بحورك

    وعرفت أهوالك

    وعزفت الحانك

    آهات تواريني

    **********

    لازلت مأسورك

    وماقادر ازورك

    ملأ العهود نورك

    أتمهل في بسمك

    ويتجلي لي رسمك

    شخصك ملأ عيوني

    أنا مابقطف زهورك

    بعاين00(بَس ) بعاين بعيوني

    كسرة/الواحد يقولوا لية غض بصرك هو مصر يقول بسسسسسسسسسسس بعين بي عيوني

  51. ما سمعت عيوني هم السبب في أزاي و هم العيوني

    طبعا العيون دي أكتر حاجة غنو ليها الظاهر لأنها المفتاح؛ نظرة فابتسامة …لكن موعد و لقاء دا كان مافي عشان كدا صدقوا في مشاعرهم

    جننى ياخى العيون ياحلاتن هن اساس الريد والفنون

  52. nono قال:

    التحية اصحاب المدونة الشاعر / سيد عبد العزيز دة اكتشاف خطير

    الفي دلاله
    شعر : سيد عبد العزيز
    ———————
    الفي دلاله ماأعظم جلاله
    إستحل هلاكي ولي حرم هِلاله
    الهلال الشغل الناس هِلاله
    الظلام حين شاف محيه أنجلالهُ
    نضرة خدوده وبالأنوار يلالو
    راح أنفسنا وريحانة لخِلاله
    المنعم توب العز كِِساله
    مثال النعمة وماأعظم مِثاله
    جداول ديسه في وردانه سالو
    طيبه يعبق كل ما الليل أمساله
    شالو فاله الناس يتمنوا حاله
    مثاله الباسم وحتى الغيم سِحاله
    ومن ضميري حب الغير محاه
    نائم وخِلى الكان نائم صِحاله
    المدلل ما أكرم خصاله
    حسنه وافي ومافي لسان حصاله
    عالي سماه بي بعيد وصاله
    المحاسن في مراية جماله
    رطب قوامه وخمر التيه أماله
    يتلو قلبك عند قلت شماله
    وتدعيله عليه يدوم كماله

  53. فعلا سيد دا حكاية و حكايتو مع الليل كمان خليها ساكت

    الليل نسيمو عليل
    الليل سكونو جميل
    الليل به النساك تتأمل الأفلاك يا ليل
    الليل به العشاق تتذوق الأخلاق
    تتناجى بالأرواح
    ولشدة ما ترتاح
    ما دايرة تاني صباح

  54. عازة في هواك

    عازة في هواك عازا نحن الجبال
    وللبخوض صفاك عازا نحن النبال
    عازة ما بنوم الليل محــــال
    وبحسب النجوم فوق الرحال
    خلقة الزاد كمل وأنا حالي حال
    متين أعود أشوف ظبياتنا الكحال
    عازا ما سليت وطن الجمــال
    ولا أبتغيت بديل غير الكمــال
    ***
    وقلبي لي سواك ما شفتو مال
    خذيني باليمين وانا راقد شمال
    عازة ما نسيت جنــة بلال
    وملعب الشباب تحت الظلال
    ونحن كالزهور فوق التلال
    نتشابي للنجوم وانا ضافر الهلال
    عازة جسمي صار زي الخلال
    وحظي في الركاب صابه الكلال
    وقلبي لسه ما عرف الملال
    أظنه ود قبيل وكريم الخلال
    عازة ما أشتهيت نوم الحجال
    ولا السوار بكي في يمينا جال
    وعازة في الفريق لي ضيق مجال
    قبيلة بت قبيل ملأ الكون رجال
    ***
    عازة شفت كيف نهض العيال
    جددوا القديم تركوا الخيال
    روحك أم سماح سري كالسيال
    شجوا الفؤاد حيوا محسور الليال
    عازة في الفؤاد سحرك حلال
    ونار هواك شفا وتيهك دلال
    ودمعي في هواك حلو كالزلال
    تزيدى كل يوم عظمة ازداد جلال
    ***
    عازة في حذا الخرطوم قبال
    وعازة من جنان شمبات حبال
    وعازة لي ربوع ام در جبال
    وعازة في الفؤاد دوا يشفي الوبال

    الشرف الباذخ
    نحن ونحن الشرف الباذخ
    دابي الكر شباب النيل
    قوم وم كفاك يا نايم
    شوف شوف حداك يا لايم
    مجدك ولي وشرفك ضل
    إمتي تزيد زيادة النيل
    نحن نطارد العنزة الفاردة
    نحن نزود مشارع النيل
    نحن برانا نحمي حمانا
    نحن نموت ويحيا النيل
    ما بنندس ما بنتوصي
    نحن نكيل برانا نشيل
    نحن الطينة ومطر العينة
    نحن الوادي برقه يشيل
    نحن الصولة سيوف الدولة
    نحن كنانة اسماعيل
    بابه العالي وشرفه الغالي
    كان لجدودنا ظله ظليل
    يا حكامنا جيبوا البينه
    ولا انقرعوا كفوا الشينه
    ده ود عمي وده ضريب دمي
    انت شنو طفيلي دخيل
    يا نزلانا أمرقوا الذمة
    كيف ينطاق هوان الأمة
    شالوا حقوقنا وزردوا حلقونا
    ديل عاوزين دمانا تسيل
    من تبينا قمنا ربينا
    ما اتفاسلنا قط في قليل
    ما فيش تاني مصري سوداني
    نحن الكل ولاد النيل

  55. السمار ومحبى غناء وشعر وملح وطرائف وحتى (حوادث ) الفتره السودانيه المتفرده التى عرفت بحقيبة الفن

    القصيدتين أعلاه عازه فى هواك و الشرف الباذخ كما لا يخفى على فطنتكم من شعر خليل فرح

    وهذه أيضا من شعره

    بين جناين الشاطىء

    بين جناين الشاطىء وبين قصور الروم

    حي زهرة روما وأبكي يا مغروم

    دره سالبه عقولنا لبسوها طقوم

    ملكة باسطة قلوبنا تبين عليها تقوم

    في الطريق ان مرت بالخلوق مزحوم

    كالهلال الهل الناس عليها تحوم

    شوف عناقد ديسها تقول عنب في كروم

    شوف وريدا الماثل زي زجاجة روم

    القوام اللادن والحشا المبروم

    والصدير الطامح زي خليج الروم

    خلي جات متبوعة الصافية كالدينار

    في القوام مربوعة شوفا عالية منار

    موضة آخر موضة هيفا غير زنار

    روضة داخل روضة غني فيها كنار

    شوف جبينا الهل ضو فوقه فنار

    منه هل الشارع منه بق ونار

    طالعة ما بتقابل زي لهيب النار

    تحرق البتهابل والبعيد في نار
    __________________

  56. و أيضا خليل فرح تم دوره و دور

    تم دور وادور

    عم نوره شال

    فات الحله نور

    زي بدر التمام

    ***

    واحدين قالوا نور

    واحدين قالوا دوب

    مروي ما بتنور

    زي بدر التمام

    ***

    مين يقوم يتهور

    يبري القيف هناك

    تحته الدابي كور

    زي بدر التمام

    ***

    قالوا الكون اتطور

    لا عاشق عفيف

    لا جميل إتصور

    زي بدر التمام

    ***

    الحسود يتضور

    ناره ماكله لسانه

    كله زور ومزور

    زي بدر التمام

    ***

    الطريق الحور

    دمي ما بروح

    سيدة ليش يتجور

    زي بدر التمام

    **

    هز شوقي وتور

    يا نديم إزاي

    جرحي المخفي غور

    زي بدر التمام

    ***

    يا قليب إتجبر

    قوم وريني كيف

    الكرام تتصبر

    زي بدر التمام

    ***

    نحن ما بنتعبر

    النفوس أن حبت

    تستحى وتتكبر

    زي بدر التمام

    ***

    ما خبير أتخبر

    في الزمان الفات

    والجديد إدبر

    زي بدر التمام

    ***

    أوعي لا تتشبر

    هل رأيت لك عاشق

    بالغرام يتنبر

    زي بدر التمام

    ***

    نحن ما بنطفر

    ما بنهاب سفيه

    إلا ما بنتزفر

    زي بدر التمام

    **

    قولوا لي البتنفر

    ما شالن قناع

    المعاك تتوفر

    زي بدر التمام

    **

    يا زميل إتشطر

    شن بتشوف حداك

    إلا حور مبطر

    زي بدر التمام

    **

    يبقي يومنا مطر

    ماله الكون دهين

    والفريق معطر

    زي بدر التمام

    ***

    النحر مغمر

    والسباته حارة

    والمجال مضمر

    زي بدر التمام

    **

    الشعر مخمر

    يرشح كله ند

    عردب المجمر

    زي بدر التمام

    **

    قام محمد بشر

    هز فوق تيجانن

    سل سيفه وكشر

    زي بدر التمام

    ***

    قول معاي وإتفشر

    نحن سياج عروضن

    نحن يوم المحشر

    زي بدر التمام

    ***

    يا حسن اتذكر

    طيب ليلتنا ديك

    والصباح السكر

    زي بدر التمام

    ***

    المدام ما اتنكر

    لا من ديكنا صاح

    فوق رؤوسنا اتحكر

    زي بدر التمام

    **

    كل شىء مفسر

    ما في شىء غريب

    والعسير ميسر

    زي بدر التمام

    **

    ما في عين تتحسر

    دام عريسنا دام

    والحسود إتحسر

    زي بدر التمام

    **

  57. محيك البدري

    الشاعر / أبو صلاح

    نغم زي محيك البدري
    غرامك منه ضاق صــــــدري
    حبيبي بي العلي تــدري

    ***
    المَحَي نور ليلة القدر
    نصب قوس حاجبه لي غــدري
    و معاك في داخل ألخدري
    فؤادي المالكة من بـــــــــــدري

    ***
    حياتي ونعمتي ويسري
    رضيت لو يرضي بي أســــــري
    وفرض يا دموعي تنتثري
    إذا منــه النسيــــم يســــــــــري

    ***
    حمام الأيك والقمــري
    يصيح ينبيــــك عــن أمـــــــــري
    وبين عوا سلك السمري
    روا يحي وفاكهتي وخمــــــــــري

    ***
    أراك وتوفي بي نذري
    دموعي ألفي الوجــن تـــــــــزري
    حنانك ما عليك وزري
    أنا قاسيت الهوى العــــــــــذري

    ***
    صحيح لجروحي لا تبري
    هواك برضــــــاي مـا جبــــــــري
    وبسيمات فاهك ألتبري
    يا جمــيل كم قللت صبــــــــــــري

  58. الغبشة قال:

    لكن ما تقول لى بكاكم بس خيااااااااااااااال, مش فينا ما بضر ابكوا للصباح ولى تانى يوم, لكن لو فى غير عواطفاتكم ((…………………………………..)) قولوا امين يا حريم.

    والى لقااااااااءءءء

  59. ابكرون قال:

    يااااااخ بالغتي معقول في زول ببكي فيكن (في عواطفه) الا يكون عديم العواطف…كلو تغرييييد خارج العش….!

  60. nono قال:

    ابكرون/اسه عليك الله العسكري(الالمانية) دي طلقتها من بندقيتها دي بتقتل ولا طلقه من عيونها ديل….يضربك الضريب ياخ…..

    في ذمتك احلي عيون عواطف ولة …….. عيون الشنوا……. مابعرفة دة

    العيون الما بدمعن
    ****************************
    نامن أو صاحيات يبرقن
    ***********************
    لا بصيدن لا بعشقن
    ********************
    سرهن في الجوف يحرقن
    *******************
    كشفن رموشن أو غمضن
    ************************
    كلو ماتقول برحمن
    **********************
    القمر بوبا عليك تقيل***************************

  61. ابكرون قال:

    نونو : ع تبالغي….وما المسئول منها باعلم عن السائل…
    لا بدمعن ونايمات وصاحيات يبرقن..ولا بصيدن لا يعشقن…دي اكيد عيون ضفدعن

  62. nono قال:

    عليك الله ياابكرون عين عواااااااااااااااطف دة مااحلي من العين النازل بيهااااا في البردة دة ؟؟؟؟؟؟؟
    انا هسه لحظتة ليها
    بالمناسبة (عيون ضفدعن) دة بااااااااااالغتة فيها عديل
    و ما بتقول غاااااااااااااااااااااغ

  63. خضر بشير الأن فى fm100 حاجه كده بس خيال

  64. nono قال:

    كم نظرنا هلال ما شاقنا غير هلالو
    ****************************
    و ما اظنو زلال يروينا غير زلالو
    *************************
    اذا ادار لحظو على جبل دكالو
    *************************
    اذا بسم انزل دم السحاب بكالو
    *****************************
    قلبو ما بيشفق على عاشقو مهما شكالو
    ******************************
    حبيبى طبع الطير ينزل على اشكالو
    ****************************
    لى حبيب يا ليل نوم العيون قلالو
    ***************************
    لى حبيب ياليل قتل النفوس حلالو
    *****************************
    لى حبيب يا ليل تشوف خدودو يلالو
    ****************************
    مع الظلام تشتاق الزهرة تتدلالو

  65. nono قال:

    حبيبى طبع الطير ينزل على اشكالو
    ****************************
    يعني الطيور علي اشكالهاااااااااااااااااااا دللللللللللللللللللللللللللل

  66. BakriMusa قال:

    ابكرون … ثرو … نونو

    (اذا ادار لحظو على جبل دكالو ) يا اخي مبااااااالغه .. يعني يا ابكرون الشاعر ده لو شاف (بروفايلك ) الفوق ده كان عمل شنو؟؟؟؟

    ــــــــــــــــــــــــــــ

    البتوحي الناس العيون
    ياغزال هن أساس الريد والفنون

    العيـــون الفيهن نعـــــــاس هن أساس معنى الجناس

    هن بثيرن في الناس حماس هن بقودوا الزول للجنون

    يا غزال هن أساس الريد والفنون
    ***
    العيــون البيض لو صفن يجـرحنــك و يتــلاصفـن
    مـرة نظـرن لـي أوقفــن شالوا نومي وما أنصفن
    يا غزال هن أساس الريد والفنون
    ***
    العيون الســـود كاحــلات في دلالهــن متساهـلات
    يجـرحنــك مـا سـائــلات يتركنــك متهـــــامــلات
    يا غزال هن أساس الريد والفنون

    ودمتم سالمين

  67. الغبشة قال:

    يادكتور غزت: عله البوست بتاعك ده متل مويت توتيل البكتب فيه لازم يرجع ليه تانى؟

  68. ابكرون قال:

    بكري موسي :
    قلته لي اذا ادار لحظو علي جبل دكالو….
    لو شاف عين البروفايل :
    ———————————
    كان طائعا راضيا حبالو….
    ولا مستسلما جكالو
    ولا متجرسا اترجالو
    ولا إهي إهي بكالو

  69. BakriMusa قال:

    ابكرون .. يا راااائع

    اهي اهي بكالو … نسقف على كده .. ولا شنو يا ابوعصمت ؟؟؟

    عيونك ذي سحابة صيف تجافي بلاد وتسقي بلاد
    وذي فرحا ً بيشيل مني الشقا ويزداد
    وذي كلمات بتتأوه تتوه لمن يجي المعياد
    وذي عيدا ً غشاني وفات وعاد وعم البلد أعياد
    وذي فرح البعيد العاد
    وذي وطنا ً وكت أشتاقلو برحل ليهو من غير زاد
    بدون عينيك بصبح زولا ً بدون ذكرى وبدون ميلاد

    ودمتم سالمين

  70. يا BakriMousa

    ساقفنو لى شنو أنحنا لى اليلى ما وصلنا أبو داؤود خلى ناس الجقر وأولاد البنا
    بس إنشغلنا فى حيط أعمامك البروف وود الخلا و بقية العقد الفريد والليله كمان جابتليها تسليم الشنو ما بعرف داك ,,,,,,,,,تعرف الشغل دا إلا نلحقو بيضة الفاتح

  71. BakriMusa قال:

    طارق اب احمد

    معقول تلقى فرقه مع ناس (دال)الصعبين ديل.

    خلاص نوقف.. التسقيف … انتو سخنوا بهناك في البوست الساخن بتاع استرايكر وتعالوا بردوا .. بجاي ..
    يعنى الفاتح ده يكاكي يكاكي في طرابلس ما لقالوا بكان الا يجي يبيض لينا في مقرن النيلين .. ياربي عجبوا مكان جنينة الحيوانات القديمه ولا شنو ؟؟

    ودمتم سالمين

  72. nono قال:

    قلبي همالو
    *****************
    ****************
    قلبي همالو خديدك وجمالو
    معذب بى هواك مالو
    ***
    بدر حسنك لاح والقلوب مالو
    لى هواك وشوق قلبي عمالو
    يا فريع ياسمين متكي في رمالو
    قول لعاشقك وين ضاعت آمالو
    ***
    الجوهر الفردي الما اتلقى مثالو
    قلبي ليه يلين وقلبه يقسالو
    حبه صبحني وحسنه مسالو
    وغير وسيم خدو دموعي ما سالو
    ***
    شعره حاك الغيم حاجبو هلالو
    فر بسمه نغيم والبروق لالو
    مافي مانع لو قتلى حلالو
    افدي جوز تفاح صدرو لولالو
    ***
    الشادن المكحول قلبي يصبالو
    واخشى من لحظه ومن رمي نبالو
    كم جريح سهام عينه ضاربالو
    وبيها لا يدري ولا على بالو
    ***
    خصره ناحل زاد جسمي انحالو
    طرفه ناعس نام وطرفي يصحالو
    الفريع السيل دمعي سحالو
    يا نسيم ارجوك شوفو كيف حالو
    ***
    في النجوم مرفوع مجده ينبالو
    وبين سماك أعزل حظي ما نالو
    لو نظر محيه عشوقه جنالو
    ولو بسم دمع السحاب حنالو
    ***
    شوف لحاظو سيوف عاشقه هلالو
    وحرسه حولو يدور استعدالو
    شوف خديد يلصف وحسنه يندالو
    والبدر لو غاب يضوي في بدالو
    ***
    طرفه ليه نعسان وأنا طرفي ليه يصحا لو
    ويتلو آية الحب الفي الخديد لايحا لو
    جمالو كل ما يزيد جسمي يزيد إنحالو
    أما قلبي الضاع خلي اليروح في حالو

  73. علي سنكل قال:

    nono
    إنتي يا نونو شغاله في مكتبة الإذاعه؟
    واللا شنوووو ؟

  74. nono قال:

    دة ملامح من الزمن القديم؟

    يعني * عوض بابكر *مابيحصلني

  75. ابكرون قال:

    عزت : البوست ده حيكون زي بوست الهندسة في سودانيزاو لاين
    ————————–

    الفي دلالو وما اعظم جلالو استحل هلاكي ولي حرم حلالو
    الهلال الشغل الناس هلالو الظلام حين شاف محيو انجلالو
    ناضرة خدودو بالانوار يلالو اراح انفسنا بريحانة خلالو
    المحجب مااكرم خصالو لي كاتل وليه صعبان وصالو
    حسنو نامي ومافي انسان حصالو خلف حجبو بق النور عصالو
    المحاسن في مراية جمالو رطب قوامو وخمر التيه امالو
    يتلو قلبك حين تلة شمالو وتدعيلو عليه يدوم كمالو
    المهفهف توب العز كسالو مثالو النعمة ومااسعد مثالو
    جدايل ديسو الفي وردانو سالو وطيبو يعبق كل ما الليل مسالو
    شالو فالو الناس يتمنو حالو مثال الباسم وحن الغيم سحالو
    من ضميري حب الغير محالو ونام وخلي الكان نايم صحالو
    الطريف السبي قلبي وصبالو لو رآه الكان راهب صبالو
    الاشعة تشوفن في قبالو ولو نظرلك بتشيلك نبالو
    مابيرحم قلبي الماخطالو وصد نافر وزاد الصد وصالو
    احب في سماهو المافي ايادي طالو وعندي افضل من وفا ناس نصالو
    ——————————————————-
    عارفين يا قروب c فما دون …..(شنو تلة شمالو.)….طيب نسهلا…شاعر شايقي قال :آآه ووووب من تلة إيدو….وهو سلاح فسفوري صدموي فتاااك بقتل
    بس الكويس /الكعب انه اختفي من 20 سنه…لانه اندثر مع الزمن الجميل

  76. nono قال:

    هل تدري يانعسان….للشاعر محمد بشير عتيق

    هل تدري يانعسان انا طرفي ساهر
    جسمي اضمحل وبغرامك وانت زاهر

    _________________________________
    انا حالي ظاهر
    عاشق نبيل ياجميل ليك حبي طاهر
    وشاعر مجيد لغناك فنان وماهر
    بسحر جمالك وكرم خلالك وعشان جمالك
    اهوي القمر والنيل واهوي الازاهر

    ______________________________
    ليل ونهار وانا لي حيك بهاجر
    اخذني نورك وياساحر المحاجر
    لا اخشي لوم في هواك لااخشي زاجر
    مهما الاقي من طول فراقي وفرط اشتياقي
    حافظ عهودك وحياة خدودك ياللي هاجر

    _______________________________
    حسنك بديع ياوديع في عصرو نادر
    حكّم صفاك مولاك ذو حكمة قادر
    مكتوب هواك لي ضناي ياحبيبي صادر
    ماكر شفاي واراك علي طبي قادر
    وانا برضه امل تعطف تجامل بمس الانامل
    تشفي الجروح والوح ولي لقاي تبادر
    __________________

  77. يا نونو ما شاء الله عليك و انت تدفعين بالجميل من الأشعار كل مرة…

    بالمناسبة لقيت ليك واحد جايب سيرتك:

    (الحا) حرق (قافي) بي (نونو) يا هاجر
    كلما يفوت (اللام) أنا في هواك ساهر

    فهي للفنان أحمد المصطفى من اغنية (أشكي و أبكي لمين أنا قلبي ديمه حزين) و الظاهر كان في (نونو) في الحفله قام غير البيتين

    الحب حرق قلبي بي نارو يا هاجر
    كلما يفوت الليل أنا في هواك ساهر

  78. ابكرون قال:

    سمعت الاغنية دي صباح اليوم وقد هالني وصف الشاعر لي زولته ……شئ عجيب… بحثت عنها في الشبكه ولقيتها بالله شوفوا جنس الكلام ده عزت معليش نفتح الجرح اللذيذ ده :

    ———————————————–

    انـت حـكمة ولا آيـة و لاّ انـسـان انت صاحي ولاّنايم ولاّ طرفك من طبعو نعسان

    انـت روحـي انـت انسان عـيـنـي يـا صــاحي وانـت احـسـان
    انـت نـادي انـت هـادي انت ميسان انـت ظـافـر انت ضـافر اسـود وفـرسان
    انـت شـادن انـت لادن انـت فـتّـان انـت ضـامر انـت سـامر انـت هـتّـان
    انـت نـادر انـت نـاضر انـت بستان انـت صـافي انـت نـافي زور و بـهـتان
    ياحـيـاتي يامـمـاتي هـاك سـطران الصـبـابة ومـر عـذابا و قـلبـي اقـران
    انـت سـاهي انـت لاهـي انـت بطران فـي دلالك فـي جـلالك ياسـامي وكـران
    ياصـفـايـا يا وفـايا هـاك بـرهـان عـن غـرامي و طول هيامي السابني ولهان
    عـزّ قـربك امـا بـعدك مـالو لي هان قـلبـي خـافق هل توافـق قـدري ينـهان
    يا حـبيـبي كـون طـبيبي امري حيران طـول نهـاري ثم ليـلي سـاهي سـهران
    طـال عـذابي صاح غرابي جوّي عكران دمعـي هـامي شوقي نامي و فرشي نيران
    انـت حـالي انـت عـالي انـت سلطان انـت سـاطـع و انـا ساجع بي غناك طان
    طـال انيـني فـاق حنيني الحان لأوطان والـيلـومـني فـي هـواك ياسيدي غلطان

  79. ابكرون قال:

    عزت بستأذن تاني:
    دعاء ساعات السحر:
    يارب يا محقق دعوات المظلومين والثكالى اينما كانوا…يا الهي اهزم احزان الزمن الأغبر…عليك بهم يا رب …عبادك في انتظار ساعات الخلاص واستجابتك لدعوة الداعاة اذا دعوك جل مقامك…..آمين يا رب العالمين……
    ————————-
    طبل العز ضرب
    يا السرة قومي خلاص
    والبنوت زغاريدن
    تجيب الطاش
    والخيل عركسن ما بين طبول ونحاس
    طبل العز ضرب والخيل تقابل الخيل
    من أرض الجنوب لي عطبرة وتوتيل
    شد جناحو تاني وقام جميل بلحيل

  80. ابكرون قال:

    ود الخلاء: كاس وخمر وعود كمان…وليل وذوبان وكده وبتاع… ده شغل(هبججية) ما بنقدر عليه و ما بنفع معانا….نحن ناس …اماه لا تجزعي………وطاااااابور على الوسط 17 خطوه معتااااادا ماااارش……

  81. أبكرون و و د الخلا و الأخت نونو
    سلامات،

    انتو اذنكم معاكم باضافة ما ترون ل (جلسن شوف يا حلاتن) فلن ينتهي الكلام الجميل و اللحن الحلو الذي يعشعش في داخل محبين ذلك الفن الراقي و

    تعالوا تاني و معاكم آخرون…..

    امكن في الآخر نطلع لينا بكتيب صغير
    تحياتي

  82. ابكرون قال:

    ود الخلا: نحن حاضرين ودالأشول…. وإعيسر….
    وإنبسطنا ل (حلف يمين مرجوعه) ..بتاعة اسماعين…
    لا بنحب در لليسار ولا لليمين ولا منزلقاتم ولا طوطحانياتم….بس ربنا يجعلنا من اهل اليمين….
    عزت : كلام الزمن الجميل هو الطعم اللذيذ الوحيد الذي تبقي لنا…..(تصم خشمك عليه وتلبد تبلعه ويضيع ….تفتح خشمك تردده يدخل ليك الغث والصديد ….شو نسوى؟؟؟)

  83. aflaiga قال:

    ابكرون ثرو ود الخلا : تعرف ربنا خلق الناس دى كلها على الفطره وقال ابواتك يا برمجوك دركسون يمين يا دركسون شمال !! فقصة يمين در دى مافى ليها داعى لانو السودانيين ديل كلهم دركسونم يمين !! وحتى البيلف شمال بيكون لافى عشان يستعدل يرجع يمين !! ده من تاثير امبارح طبعا !!! اها نرجع لى جلسن شوف يا حلاتن واقيف فى حيثيه مهمه :
    شوف كلمة حلاتا دى زاتا كيف كلمه لا تثير فى النفس الا كل ما هو جميل فى رفق وادب ورقى اما اليوم لو جيت توصف ليك قرمبوزه ولا دامه من حقات الزمن ده فلن تجد الا كلمات لا يتم نشرها فى مكان محترم !!
    كدى زول فيكم ماشى فى الشارع شاف ليهو واحده يتشجع يوصفا لينا هنا بدون ان يقع فى محظور شرعى ..
    ناس زمان ديل حاجاتم كانت مدسوسه وظاهره فى نفس الوقت وناس اسى ديل حاجاتم ظاهره ومظهرنها مش كده ؟؟؟

  84. ابكرون قال:

    افليقا : يعني برحلوا يمين…او عاصرين يمين شديييد…مفروض يراجعوا جلب الضراعات…
    أمااما ناس اسه مظهرات كل حاجاتن…لسبب بسيط يمكن شبابنا واولادنا بطاطيرم نازله…نتيجه لان العرض اكتر من الطلب ونتيجه لشيوع الاشياء عبر وسائل الميديا المختلفة…..يعني عاااادي بدون زباااادي

  85. nono قال:

    ياجـوهـر صـدر المـحافـل روحـي معـاك اتلـطفـيـلا
    مالـنور الـفي حـليـهو رافل في حُـق نـهدو قـلوبنا قافل
    كالظـبي الفـي مـقـيلو غافل تـارة يميـل والتـانية جـافل
    وجـهو يــنور والبـدر آفـل فـوق للـبدر يزيــد نفـيلا
    ____________________________________________

    يــالنـور خـدك لاح مـقابل للـشعر الـطال لـيلو سـابل
    سـهـم الحـاظك ليـنا نـابل بـي كل شي دون هجري قابل
    ينسـب نـوحي عـلي البلابل وانــت القــمرا بتنـسبيلا
    ليك جوز عين نعسـان وكاحل خصراً يمـيّل وصـدرو راحـل

    ____________________________________________

    لـي وجـداً لي جسـمي ناحل بـحر الشــوق مـاليه ساحل
    بيـني وبـين الـنوم مـراحل ويـن للطيــف انا القي حيلة
    الـفـرع الـبـتـّنـي راتـل طيرو ينوح في غصـونو حاتل
    وهـو نـديم لي فكـري شاتل الاسـد الـفي القيــد ينـاتل
    يـتـأكد مـاليـهـو كـاتـل غـير مكـحـول ظبـي النتيلة
    ______________________________________________

    كسرة / الغابة واقفة علي فد كررررررررررررررررررررع

    • ياسر حنفورة قال:

      تحياتى والله صدر المحافل دى تعتبر ام اغانى الحقيبة وما بتستحق البهدله دى كمثال بهوى نسيم لفكرى شاتل نديم شنو وناقصا كتير اجمل ابياتا ناقصا مثال لطيفك ما لقيت وسائل المهم لم اتغعل حسابى بنزلا ليكم مع تحياتى ياسر حنفورة باحث فى اغانى الحقيبة

  86. ابكرون قال:

    فعلا بحر الشوق ما ليه ساحل
    اتخيلو اسدا في القيد يناتل
    عشان شنو؟
    نفسو في ظبي النتيله
    __________________
    اندهش كعلي المك الله يرحمه الذي يقول : أستغرب في ابو صلاح الجاهل (صانع الجلود )يقول ويشبه ويصف زوووله ( بجوهر صدر المحافل ) هذا الوصف الذي لم يسبقه له احد في اللغة العربية …. ويبكي لحبيبه ان روحو معاه ويترجاه ان يتلطف بها (اتلطفيلا) ….ويكفي
    لمن اسمع واري ذلك المخنث(حماده شنو ما عارف)…لا ادري اقول يتغني ولا يت…اصاب بالغثيان

  87. ابكرون قال:

    عزت الواحد مرات بحتاج يرجع للضل ده:
    بالله ما في زول يسألني عايز الصنه دي
    ———————————————–

    ما بخاف من شيء برضي خابر
    المقدر لابد يكون
    إن أتاني الهم جيشو دافر
    يلقى يا مولاي صبري وافر
    يلقى عقلي كمان ليهو ظاهر
    يلقى قلبي شجاع ما خئون
    بالعدا معروف ما ببادر
    ما بخون الجار ماني غادر
    ما بقول للناس مثلي نادر
    بل بقول للخالق شئون
    قول لشاهد الزور فيما ساير
    هدّي روعك قبل الخساير
    ياما قبلك عميت بصاير
    من لساني وقولي الهتون
    ما نكرت الحق ماني فاجر
    لا ولا بالعالم متاجر
    نفسي يا أحباب ليها زاجر
    لا أكون كل يوم ليَّ لون
    الثبات معروف لي معاصر
    لو بقيت في داخل معاصر
    الإله غير شك ليَّ ناصر
    رغم أنف الواشي الخئون
    عن لسان الحق ماني نافر
    ما جحدتَ الخير ماني كافر
    ما ضمرت السوء ماني حافر
    للصديق لو جوة السجون

  88. nono قال:

    نفسي يا أحباب ليها زاجر

    ***********************
    لا أكون كل يوم ليَّ لون

    بتتغير مااالك (حرباء)

  89. مهيرة قال:

    سلاااااااااام
    لقيناكم فاتحين بوست البكا بتاع الكواشف قلنا
    ننقل ليكم رايعة أِخرى (منقولة) من موقع آخر
    غنى القري علي الغصون
    غنى القمري على الغصون ذكرني الدر المصون
    فريد عصره الما متله شىء

    قمرنا الليك مطرف يصون يالغصن البزري الغصون
    ملاك محروس داخل الحصون شمس الكون تشبه مشيه
    فريد عصره الما متله شىء

    قاسي سماع لهجه الحنون عظيم كالمال حلو كا البنون
    بي لهجه يداوي الجنون شعاع محيه العين تختشيه
    فريد عصره الما متله شىء

    جميل متلك ما أظن يكون حيا ورقة وعفة وسكون
    يالبدر الليه روحي كون في حسن الكون ما خلى شيء
    فريد عصره الما متله شىء

    ليك عالي العالم يهون يالرشا يا اللدن المصون
    مناظرك فيك يتنزهون يالمطران مما مشيه
    فريد عصره الما متله شىء

  90. مهيرة قال:

    ايضاً اغنية كثيراً ما اشجتنا في الراديو وهي شعار
    اغاني الحقيبة

    جوهر صدر المحافل

    ياجوهر صدر المحافل روحي معاك اتلطفيله
    مالدور الفي حليه رافل في حكمك لقلوبنا قافل
    كالظبي الفي مقيله غافل تارة يميل والتانية جافل
    وجه ينور والبدر آفل فوق للبدر يزيد نفيله

    ليك جوز عين نعسان وكاحل زي وجدي اللي جسمي ناحل
    بحر الشوق ماليه ساحل بنسب نوحي علي البلابل
    وانتي القمره بتنسبيله

    الغصن البتنى مايل طيره ينوح بي غصنه مايل
    أهوى نسيم لي فكري شاتل الأسد الفي القيد يناتل
    يتأكد ماليه كاتل غير مكحول ظبي النتيله

    المرنوع بي كنفه هادل درعه يميل بي خصره جادل
    أنا نايم والليل سادل شرط الحاكم يبقى عادل
    مايمنع طيفك يغازل أنا في الحب لي روحي بازل
    داخل قلبي ليك منازل يا لايم لاتبقى هازل
    هل عاشق يسمع لعادل خلي نصيحتك عني زيله

    يوقد شوقي ودمعي هامل جمر الحب لي جسمي شاعل
    كيف لا تشعل في مشاعل لو الدهر بي حالي جاهل
    في الأنجم أسأل سهيلة

    أنا في الريد مالقيت وسائل غير بث النسمات وسايل
    أغرب شي وعجبنا سايل حلم الصاحي ودمعه سايل
    لو شكيت في أمري سائل البدري كونك مثيله

    يوقد شوقي ودمعي هامل جمر الحب لي جسمي شاعل
    ضاق بي الكون مع إنه ماهل دمي يخضب للأنامل
    هل يرضيك كدا ياجميله
    هل يرضيك كدا ياجميله
    هل يرضيك كدا ياجميله

  91. ابكرون قال:

    لا أكون كل يوم ليَّ لون
    القصيدة الاصلية بتقول :
    لا اكون كل يوم ليّ دين……
    لكن في فترة (تاصيل الثقافة والهوس الكان والشريط الكان بغطوا بيه سيقان
    الممثلات وبليم بنات الاساس) في الزمن ده يا نونو عدلوها ( حتي لو الشاعر ما قاصد شي … )وليك حق تصفيه بانه (حربويه)….مسكين الشاعر….!!!!

  92. nono قال:

    ابكرون/ قوم من جلسن شوف ياحلاتن ………….

    وتعال لينا في الغابة محل (الأنقاذ وحكاية الثور الأسود!!)

  93. ابكرون قال:

    برتاح هنا ….وهناك بطني بت….هناي

  94. aflaiga قال:

    ابكرون : مفروض اى زول ينزل بوست بعمل لنك يوديك لليمون ولنك يوديك للسكر ولنك يوديك للفلاجيل لانو الناس بطنا ما واحد !! وفى ناس بتطم من حاجات كتير عشان كده انا بقترح فى هذا المنعطف الخطير من تاريخ سوداننا !! انو يكون فى لنكات مراعاة لبطون العضوية …

  95. ابكرون قال:

    حرم يا افليقا ناسنا الزمان ديل بقولوا درر :
    —————————————-
    الصقر ان وقع كتر البتابت عيب
    وقدر الله ان وقع ما بنفع الجقليب
    ——————
    اااخ يا هاشم يا ود صديق :
    يا (أكتوبر) نحن العشنا ثواني زمان
    في قيود ومظالم وليل وهوان
    كان في صدورنا غضب بركان
    وكنا بنقسم بالأوطان..
    نسطر اسمك يـا سودان

    ولسه بنقسم يا (أكتوبر)
    لـمـا يطـل في فجـرنا ظـالم
    نحمي شعار الثورة نقاوم
    نبقي صفوف تمتـد وتـهـتـف
    لـمـا يـعود الفــجـر الحـالم

  96. nono قال:

    ابكرون / في ناس بيسلوا منك

    قلتة اجي ضريح شوف جلسن ياحلاتن كان القاك فية

  97. الغبشة قال:

    نونو: كيف حالك يا بت امى ممكن ايميل منك عن طريق استرايكر لو سمحتى

  98. ابكرون قال:

    نونو : (انا ياهون ديه )…ده منو الماعندو شغله ( البسعل) من ابكرون ده…

    تتقاصـر الابصار عن حـسنو من اجلالو
    يـتيه يـصد باسم آه مـاألذ دلالـو
    الـذّ شـي قربو بدل النـظر فـي جمالو
    وامـّر شـي بعدو وجفاه أو اهمالو
    اري الغـصون بتمـيل واقول هـواهُ امالو
    علـي الخلاف واذا ميل علي انا مالو
    طرفو ليه نعسـان وانا طرفي ليه يصحالو

  99. البشاوى قال:

    ابكرون
    جاءتنى اشارة من مركز الرصد والمتابعة تفيد بترددكم على محطة جلسن شوف ياحلاتن
    هذا يبين اصراركم على الرجوع للمربع الاول كما قال قوش
    هل يتم هذا بعلم سنكل —————– بشار
    نرجو من الدكتور \\\ عزت انزال بوست جلسن شوف ياحلاتن (2)
    ابكرون
    ادرووووووووووب ولووووووووووف ولا شنوووووووووو ؟؟؟؟؟؟؟؟؟؟

  100. aflaiga قال:

    نونو بت ام الغبشه : ناس ابكرون ديل رايح ليهم بكا من زمن موقع البروف انتن مالكن ؟؟ تلفن وتجن خاشات بيت البكا وتبدن بنفس الدموع والروح الحزينه !! ولا ده بكا قديييييييييييييم ؟؟
    البشاوى : اوافقك الراى بان يقوم عزت بانزال الموسم التانى من بريزون بريك الاحزان !! تعرف مواضيع البكا دى زى مسلسل ليالى الحلميه !!! ما انتهى لمن اسامه انور عكاشه وقف الكتابه …

  101. سهيل قال:

    يا حلوين و منورين … معليش ملاحكم دا ما عندنا ليهو كسره

  102. nono قال:

    هو ملااااااااااااااااااااااااااااح باااااااااااااااااااااااايت ماااااااااااااااااقاعد في التلاجة يعني مسخن بي المنقد (الكانون) بيتاكل

  103. nono قال:

    صباح النور
    للشاعر: سيدعبد العزيز
    ــــــــــــــــــــــــــــــــــــــ
    صباح النور عليك يازهور
    صباحك يوم يقاس بدهور
    يالزهر الفي رياض وزهور
    في خدرك وحسنك مشهور
    هلال محياك المابي ظهور
    هلال ماهلت مثله شهور
    زهر طاهر مالمغرور
    عليه جناح الرضا مفرور
    صباحه سعادة بكل سرور
    جماله يغني عليه سرور
    نظرتك جالس بين خدور
    بدري هناك أنكشفوا بدور
    تفوق نيشان ممتاز في صدور
    العظما المثلوا أعظم دور
    جلاله جلال ملكاً منصور
    دلاله دلال مقصور في قصور
    فيه جمال الكون محصور
    بديع ماشافت مثله عصور
    يلوح للعين من نورك نور
    شعاع الشمس على البلور
    جهرت عيوناً كفاك يانور
    قلوبنا رميتن في التنور
    فريد حسنك ودلك موفور
    وأنا دمعي يجر مجرى البسفور
    تزيد في عناد ودلال ونفور
    وبرضي أقول ذنبك مغفور
    أيا صاحب الطرف المكسور
    كسرت قلب شجاع وجسور
    تتجاهلني وأنا بيك مأسور
    حسابي معاك بقى كله كسور

  104. سيد الاسم قال:

    ماهو عارف قدمه المفارق

    يا محط آمالي السلام

    في سموم الصيف لاح له بارق

    لم يزل يرتاد المشارق

    كان مع الأحباب نجمه شارق

    ماله والأفلاك في الظلام

    يا دهر أهوالك تسارق

    منها كم كم شابت مفارق

    ما علينا الفات كله فارق

    رقنا وله نعيد الملام

    من حطامك أنا غصني وارق

    في شن أبقيت للطوارق

    غير قليبا في همومه غارق

    ولسانا برده الكلام

    ويح قلبي الما انفك خافق

    فارق ام درمان باكي شافق

    يا أم قبايل ما فيك منافق

    سقي أرضك صوب الغمام

    يا بلادي كم فيك حاذق

    غير الهك ما أم رازق

    من شعاره دخول المأزق

    يتفاني وشرفك تمام

    مسرح الغزلان في الحدايق

    والشوارع الغر والمضايق

    قول لي كيف أمسيت دمت رايق

    دام بهاك مشمول بالنظان

    مجلس اللذات في النمارق

    والترف لا زال وصفه خارق

    ضاري حسك فاح جانا مارق

    وله قاطعو الريح ما هو لام

    في يمين النيل حيث سابق

    كنا فوق أعراف السوابق

    الضريح الفاح طيبه عابق

    السلام يا المهدي الامام

    أين مني الودعته شاهق

    باكي ناهد لسه مراهق

    عيني ما بتشوف الا شاهق

    أين وجه البدر التمام

    أين مني الفي زهوه باسق

    في شبابه نقي من مفاسق

    بين ثيابه البيض المناسق

    حولك اشبه رتل الحمام

    يا بريد الجو فوقي حالق

    ميل علي الروح ليها خالق

    عدت سالم قول وأنت عالق

    مقرن النيلين كيلو كام

    الحبايب لفتوا الخلايق

    بيني وبينهم قطعوا العلايق

    ان دلال ان تيه كله لا يق

    نحن ما مجينا الخصام

    يا جميل يا نور الشقايق

    أملأ كأسك واصبر دقايق

    مجلسك مفهوم شوفه رايق

    عقده ناقص زول ولا تام

    من فتيح للخور للمغالق

    من علايل ابروف للمزالق

    قدله يا مولاي خافي حالق

    بالطريق الشاقه الترام

    ما يئسنا الخير عوده سايق

    الحي يعود ان أتي دونه عايق

    الي يوم اللقا وانت رايق

    السلام يا وطني السلام

  105. شكرا يا سيد الاسم على اضافتك الثرة

    يالا يا ابكرون و نونو جاكم زائر عاوز يجلس مع الحلوين…

    و السلام يا وطني السلام و نحن مقبلون على مآلات أبيي

  106. كمال قال:

    بالبدر او بالزهر هم ما أنصفوك يا زول
    الأوصفوك
    كيف يجهلوك و علي الجمال العادي راحو يمثلوك
    و لو بادلوك عين الحقيقة
    أو بالبصيرة تأملوك
    بالنور أو بالنار
    او بقدر ما صاغ الخيال
    ما عادلوك
    …..
    كوكب منزه في علوك
    سرك غريب
    و شخصك بعيد
    أو كان قريب ..
    أنوارو آخذه بدون سلوك
    يبرق سناك
    في غيهب الليل الحلوك
    أكرم شمائل زاملوك
    و هم أكملوك
    أدبك هبة
    و فيك موهبة
    حُسن الظبا
    و طبع الملوك ! !

  107. مرحب بيك يا كمال في هذه الجلسة الما منظور مثيلا و شكرا لهذه الاضافة الحلوة و يا تري منو الزاد الأغنية حلا

    أهو خضر بشير أم أبن البادية و الا أسيادا الزمان….

    تحية كبيرة

  108. الزهراء قال:

    د/عزت صباحك بركه ويومك طيب ان شاء الله

    يا حمام الأيـك سجعـة أسـألـن الله رجـعـة
    النسيم عاودنـي هجعـة زال لي علة وزادني وجعة
    إشتهيت من بعدو ضجعة يـا نسيـم بالله رجعـة
    ****
    السلام يا الداس جمالـك يا القساك أسباب كمالك
    خدك البنريـدو مالـك خاتو في كفـة شمالـك
    ****
    يمكن إتصـورت حالـي ولاح لي علنـك إنتحالـي
    هل فكر وجدي المحا لـي هذا مـن عيـن المحالـي
    ****
    لا بتزوري ولا بتـزاري كنت أوفي ليك نـزاري
    صور الشوق مـن إزاري وأعذرينـي لاعتـذاري
    ****
    العـذاب بـي إستمـر والحلـو قدامـي مــر
    أغفو مرة وأصحى مـرة ومالو لوتغشانـا مـرة
    ****
    ديمة في شكرك سهـودي وديمة غارف من رهودي
    إنتي أظن عاجبك سهودي يامسلمة وقلبك يَهُـودْي
    ****
    شعرك ال للمشاطة قلـق اسي كتفك كان مكلق
    وجدي من غيـر مغلـق ما لـي بالخـط المعلـق
    ****
    الجبين لـو كـان يمثـل بالبـدر أجـدك ممثـل
    والنظر لو بـس يرسـل أوصفك والخـد مأسـل

  109. الزهراء قال:

    احرموني ولا تحرموني
    سنة الاسلام السلام
    عطفكم يا من الموني
    كالاشعة الاسهم رموني
    الشجون بالليل نادموني
    الانين والنوح علموني
    لو معنعن قول كلموني
    حبي طاهر لم تظلموني
    برضي قابل الظلم احترام

    يا النفوني كفى اعرفوني
    ساهي ساهر ساحات جفوني
    في هواكم يا من جفوني
    لا الوم ان لم تنصفوني
    انعكاس الاحوال كفوني
    ايضا الايام عرفوني
    يوم سموما ويوما غمام

    كلما النسمات عطروني
    فاجأوني دموع مطروني
    رب اغفر للعكروني
    في وداعة الباري العروني
    رب وقت يتذكروني
    او يقول القايل دروني
    او يحدث عني المنام

    الدهاة بالسلو ما دهوني
    عن تجاهكم ما وجهوني
    بي تحكو وشمتو النهوني
    وبرضي هايم وخاضع لهوني
    لا اقول مستنكف دهوني
    عن كثير عن قيس نبهوني
    عن حقيقة الحب غين ولام

    ما تنفس صبح او ضحى لي
    الا غاب هدهد فكري ورحالي
    قال قربك عين المحال
    قلبي غير زكراك ما صحى لي
    يكفي ان السهد اكتحالي
    يكفي شاهد لي انتحالي
    شاكي شاكر شاخص دوام

    طاف خيالك والليل كافر
    شفت بدرو المتجلي سافر
    صك غاضب لقى دمعي دافر
    قاللي جملة وعقد الاظافر
    قاللي طبع الريم اصلو نافر
    قتلو عل تريم النوافر
    وعل راء الريم تبقى لام

    في التفكر اصبح وامسي
    ايضا التزكار نجوى همسي
    وحياتي اشبه برمسي
    اشكو يومي واسترحم امسي
    ما عهدتك يا ليل تمسي
    طلت وامتى اشراق شمسي
    وانت وين يا بدر التمام

    قتلو ليت الايام يندن
    تبقى لانت وسحابا دندن
    بلماك النيران يخمدن
    ليك روحي واجزيك حمدا
    قال لي كيف تستوجب لي حمدا
    من تعاطى المكروه عمدا
    غير شك يتعاطى الحرام

  110. و صباحك و يومك طيب باذن الله يا الزهراء و شكرا للاضافة

    قال ليها:
    إنتي أظن عاجبك سهودي يامسلمة وقلبك يَهُـودْي

    يا سلام و العجب:
    شعرك ال للمشاطة قلـق اسي كتفك كان مكلق

    يا حليل سال من شعرها الذهب…

  111. البشاوى قال:

    عزت \الزهراء \ وسيد الاسم وكمال
    ياجماعة جلسن شوف ياحلاتن دى مش اتسقفت من شهر يوليو 2009؟؟؟؟
    ولا الخريف خرب السقف وبقى يصب حنان وكدة وقلتو احسن نغير السقف
    ياربى حيكون نوع السقف شنو ؟

  112. ابني عشك يا قماري قشة قشة….
    العجلة تطير !!!

  113. الزهراء قال:

    البشاوي: نسايم المحنه الساكنه فينا زيد عليها مطر الاشواق الخريفيه مع شوية الحنين لي بوستات المحنه القديمه بتصحي فينا كل روعه وكل ابداع ونرجع من جديد نسترجع ونتذكر حاجات ما ذكرت في البوست ده ويتنفض شوية الغبار الفيهو ويرجع ينور جانب(احدث التعليقات)
    فهمت حاجه؟
    انا ذاتي ما فهمت

    د/عزت:كل ما نسقف بنديها طابق زياده وبرضو قشه قشه وان شاء الله دايما عامرين كده

  114. البشاوى قال:

    الزهراء أزهر الله أيامك بالحيل فهمت حاجة — ومن تكن نفسه بغير جمال لايرى فى الوجود شيئا جميلا — جعل الله ايامك كلها جمالا وحنينا وشوقا —- ينقصنا فى هذا المقام المبدع ابكرون بمداخلاته المطعمة بالتوابل المظبوطة — اين انت ياالفكى الماهر

  115. سهيل قال:

    جديات العسين ..

    جديات العسين قالن لي ..
    لو تحفظ مواثيقنا و تراعي عهودنا … تتوسد غدايرنا و تنام في رهودنا

    ياخالق الوجود انا قلبي كاتم سرو … و ما لقيت من يدرك المعنى .. بيهو ابرو

    قصبة منصح الوادي المخدر درو .. قعدت قلبي تطويهو و كل ساعه تفرو

  116. الزهراء قال:

    قسم بمحيك البدري/ ابو صلاح

    قسم بمحيك البدري
    غرامك منو ضاق صدري
    حبيبي البي العلي تدري

    المحينون ليلة القدرِ
    نصب فوق حاجبو لي غدرِ
    معاك في داخل الخدرِ
    فؤادي المالكو من بدري
    حبيبي البي العلي تدري

    حياتي ونعمتي ويسري
    رضيت لو يرض بي اسري
    فريض يا دموعي تنتثري
    إذا منو النسيم يسري
    حبيبي البي العلي تدري

    حمام الأيك والقمري
    يصيح ينبيك عن أمري
    وبين عواسلك السمري
    روايحي وفاكهتي وخمري
    حبيبي البي العلي تدري

    قبالك وين أجيل فكري
    مصافحة اليمين سُكري
    في بالك هل يمر ذكري
    وامامك شكوتي وشكري
    حبيبي البي العلي تدري

    صحيح لجروحي لا تبري
    هواك برضاي ما جبري
    بسيمات فاهك التبري
    ياجميل كم قللت صبري
    حبيبي البي العلي تدري

  117. الزهراء ( حياتي ونعمتي ويسري
    رضيت لو يرض بي اسري
    فريض يا دموعي تنتثري
    إذا منو النسيم يسري
    حبيبي البي العلي تدري )

    بس اسقفى على كده .

  118. الزهراء قال:

    استرايكر:البوست ده عباره عن افق واسع لايمكن سقفه
    وجاياك

  119. الزهراء قال:

    هاكم دي من الرائع ود الرضي

    أنــا فــي الـتـمني ديـمـه هـديلي سـاجع
    مـا لـقيت لـي مـغيث ولا لـقيت لـي مـراجع

    داير أشوف حبيبي اليوم داك شفته رايق ودمعه ناقع
    أســود شـعـره حـالـك أمـا صـفاره فـاقع
    تـتـلاصف خــدوده لا حـجـاب ولا بـراقـع
    أشـوف لـعسو ونـواعسو جـل الـباري صانع
    أشـوف فـي خـده شخصي وفي صدري المضارع

    يـفـر خـيت بـسـمه بـرقـاً لـيـله هـاجـع
    يـرفـع لــي رشـاشـه يـسبل نـظره واقـع
    دايــر أشـوفو غـافل ودايـر أشـوفو جـاذع
    يـتـغطى بــي سـواعده ومـحنو كـان واجـع
    يــردد لــي نـغـيماً تـشتاق لـي الـمسامع

    أعـاين فـيه وأضـحك وأجـري وأجـيه راجـع
    مـتـلاعب لـيـس إلا مــا مـوضوع مـطامع
    أقـيـس بـالليل شـعره ألـقى الـفرق شـاسع
    دي مــا بـيـلقاها زول زي صـيـده نـاجـع

  120. د.ياسين شمباتى قال:

    غايتو جنس غايتو!!!

  121. البشاوى قال:

    شمباتى
    لافض فوك
    ربما د\عزت وضع هذا البوست ومعاهو كم بخرة ريدة من اهلنا فى ضواحى سنار لهذا استمر هذا البوست الساحر طيلة هذه الشهور فقط منتظرين ابكرون بكل اصرار حتى يرى الطوابق الجديدة ويعمل عليها o.k

  122. البشاوى قال:

    وما الناس إلا العاشقون ذوو الهوى — ولا خير فيمن لا يحب ويعشق

  123. د.ياسين شمباتى قال:

    البشاوى..والله الكلام كتيييير فى خشمى,,بس قلت اخير النسكت واقرش لى ليمونة!!

  124. نيام قال:

    انتو برج جلسن دا كم طابق الكترابة

  125. كداشه قال:

    يسعدني ان انضم الي هذه المجموعة الرائعة المثقفة و التي استمتع بالقراة لها من خلف الكواليس كل عام و انتم بخير

  126. الزهراء قال:

    د.ياسين شمباتي
    لك التحيه- والله فقدناك في الرحله
    ولو عندك كلام فشو في الايميلات بي هناك طوالي- ماتموت كمدا
    النشوفكم انت والبشاوي موصلنها وين

    الاخ كداشه: مرحب بيك معانا وان شاء الله ديارنا ترحب بيك وخلينا نشوف مشاركاتك

  127. مُخير قال:

    أبو عصمت وسُماره
    البشاوي والزهراء والشمباتي
    السلام عليكم وصباح الخير
    ديل جلسن من 31 ديسمبر 2008م ولسة جالسات الأمر الذي دفع بالحاج أحمد السلاوي إلى حزم حقائبه والتوجه إلى أمازونيا ليقف على الأمر ويشوف آخر القصة شنو ؟؟ بالله يا حاج لمن تفهم حاول فهم الجماهير :)

  128. نيام قال:

    كلمات لها انفاس “كلما سألوني من اين لك هذا اجبتهم بطابق”..الزعيم الازهري

  129. د.ياسين شمباتى قال:

    الحاجة الزهراء..اسه انا قلت شئ!!؟؟؟؟؟ وطوااااالى لميتينى على البشاوى وسويتينا قلنا شئ,,وانحنا نبرا من الشئ دا !!

    مخير الحبيب..والله فعلا الحاج دا مشيتو دى فيها نضمى كتير,,وعندو حاجات حايصة ليهو داير يجيب آخرها..

  130. سهيل قال:

    إنت يا شمباتي عامل زي الزول الجو يساعدوهو في دفن ابوهو قام دسا المخاريق ( الكواريق) ..

  131. د.ياسين شمباتى قال:

    سهيل الحبيب..اظنها (المحافير) وليس المخاريق يا ولدنا..لكن دى ما غتاتة الشوايقة,,ولا ما بتعرفها؟؟ لكن عملتها ظااااااهرة تب..ووكت براك جيت ارجا الجاياك تب..

  132. البشاوى قال:

    شمباتى والله كتُر ألف خير بتنا الزهراء اللمتنى معاك وياحلاوة اللمة بالناس الزيك وفعلا نحنا ماقلنا شئ ونبرا من الشئ
    وسهيل دة مالو ؟ حسة فى زول هيشو ؟ وهو غتاتة الشوايقة دى مارق منها وين ما لابساهو لابساهو — وبعدين المطرة بتجى فجأتن والمرض لاقدر الله بجى فجأتن لكن البخلى الزول المعزوم عقد يتذكر فجأتن دة شنو ياشمباتى كدى حاول فهمنى ؟؟

  133. د.ياسين شمباتى قال:

    الحبيب البشاوى..والله جبت التايهة,وزولك قام (يفنجض),,اسه فى زول سالو؟؟ودا ما بقدر افهمك ليهو يا شفيف,,لانك اكيييد حسيت بالحاصل,,لكن مافى زول بقدر يقول (بغم),,الا يقولها فجأة!!!!

  134. حبايب سوداننا بالقديم و الجديد سلام
    المسكونين بحب القمردينات لي حدهن

    مرضان باكي فاقد……فيكى علاج طبيبي
    قالوا ترك سكونك …..يادار وين حبيبك

    فالدار بقت واحدة يالا يا حبايب ايدينكم معانا لنعمرها خسوسا عزيزنا جبرا … و من افتقدناهم بدعوى المقاطعة…. نشتاق الى مداخلاتكم معنا فلقد تقدمنا خطوة فلنهنأ كلنا بما وصلنا و لنتطلع الى مزيدا من التقدم…. !!!

    يادار من بقاياك…فوحي وجيبي طيبي
    أو عاتق شميم ……النرجس من رطيبي
    ماردت سؤالي…….وأجابت دار حبيبي
    سدت حلقي عبره…..نفسي متين تطيبي
    ******
    أنا لي مدة طالت …….ما شاهدت قمري
    ما شاهدت غصن …..اليانع فيه ثمري
    أنا ماشفت محبوبى…….البفيداه عمري
    اسكر من عيونه ….هي كأسات فيها خمري
    ******

    حبي الغير خافي…..ياالانت بتخبرى
    اسألي منه قلبك……ومن نيراني تبرى
    مروا على ناسك….وليك شالوه خبري
    هل عرفوني حائر…..وهل ادوك خبرى
    ******
    كيف طغى لي حبك….دائي متين تزولي
    لولاك ما نزلت …..عن مقدار نزولي
    ليك بنثر جواهري…… وبلغيها زولي
    قالت كترت عليه……صديقي الما عزولى
    ******
    فاكهه جميلة يانعه…..شتاها طاف بدري
    دره يتيمة انسه…..ظبيه حواها خدري
    حوره فى نعيمه……طواها جبينها بدرى
    انا فى ناره ساهر….باكى أريتها تدرى
    ******
    لو كلمتي طيفك …….قلت يزور ضريحي
    أو قلتيلو داوى…….علل عاشقي وجريحي
    لا باس من عذابي…..وبكاء جفني القريحى
    ما دام انت نائمه……. وهادئه وتستريحي
    ******
    أنا غافل غرامك…….دون اعلم شحني
    دمعي إذا طريتك….بين الناس فضحنى
    أنا شاعر فؤادك….في الحب امتحنى
    برضك جافيه نافره ….لي متين تحنى

  135. حاج أحمد السلاوى قال:

    الأخ كداشة (ابو دشداشة … جلابية الكويتيين )..
    مرحب بيك حبابك مع هذا الجمع الكريم الرائع ونتمنى ليك إقامة طيبة بين الشباب والكواشف اعمامك ناس نيام وودالخلا وابو عصمت ( انا طبعن زى ماقال نيام.. كبير الكواشف والله أعلم..خليك من قول نيام ..إنت قولك شنو ؟ )..
    الأمير مخير … صباحات العسل والقشطة ..طبعن حزمت حقائبى عشان أزور ديار عواطف ( شفت التلج دا مكسر كيف ؟ )ولقيت الجماعة مدورين تاااانى فى جلسن يا حلاتن …فاكتشفت إنو البعض فاقد حنان عشان كدا رجعوا للبوست الجميل دا تانى علهم يجدون ضالتهم..وخاصة الشباب منهم ..وأسال الله يديهم الفى مراهم كوووووولهم…أكان عريس ..أكان عروس ..أكان وظيفة .. أكان شنو ما بعرفو دااااااك …
    الرحلة كانت جميلة ولمةرائعة رغم قصرها الزمنى وكنا نود لو أن الجميع قد حضر …وقابلنا فبها من لم تتح لنا الظروف الجغرافية مقابلتهم من قبل ..أخواتنا وبناتنا الحرائر سماسم والزهراء والأخوبن التركى و كداشة..وحيث غاب الزووووول وولدنا مشاكل وحفبدنا عبدوش.. لاكين قالوا الجايات أكتر من الرايحات..فالشكر موصول للأخوة الذين تكبدوا مشاق الإعداد للفاء الجميل الدهشان البشاوى والمهندسين ابو حمودى وأبو ابراهيم وفى المقام الأول حبيب الكل والجماهير أبو ناجى ..لكم جمبعاً كل التقدير وربنا يجمعنا دائماً على المودة والإخاء ..

  136. عباس ركس قال:

    سلام للجميع :
    فعلا جهجهتونا – ما كان احسن لو يتعمل بوست جديد ( قامن وتاني قعدن وبرضو يا حلاتن )!! .
    وين صور الرحلة ؟ – أكان فاتك اللحم حصل المرق !!!

  137. الزهراء قال:

    صباحكم زين يا الغالين

    سليم الذوق/ ابراهيم الرشيد

    يا سليم الذوق لو تعرف الشوق
    ابقى انزل يوم من علاك الفوق
    شوف عمايل الحب في الحشا المحروق

    انا كالأنسام لم تهدا تروق
    وان كالأضواء بعد كل شروق
    لو بتذكرنا كنا نحنا ندوق
    للسعادة طعم في رضا المعشوق

    انحنا حلفناك بالغرام والريد
    بي صفا الأحلام في عيون الغيد
    وبالقليب الضاق لذة التسهيد
    ابقى زاورنا حتى يوم العيد

    ياأمل بسام دابو هال جديد
    تخلي شوقنا الضال في ثواني يزيد
    بعتاب صامت يشبه التغريد
    نبقى نار في نارو لي لهيبا نزيد

  138. جلسن يا حلاتن في البدء عاطر التحايا لكل من قام باثراء الجلسات الحلوة و ثانيا الحق انها اروع سياحة في عالم اغاني حقيبة الفن قمت بها على الاطلاق حتي خرجت و قد امتلآت جزلا حتى الثمالة
    خالص الود
    ميسون عبد الرحمن
    صحيفة الانتباهة

    الشاعر / عمر البنا

    كيف الحياه غير ليمك
    في بعدك أصبح حظي زي لون هضليمك
    يا نعيم الدنيا
    يا حليف الخدري التايه في نعيمك
    ما دام هاجرني أرسل لي نسيمك
    و أنعش لي روحي بندى جسيمك
    أو طيب المسك الفايح من تبسيمك
    يا أماني حياتي البيك نور إقليمك
    يتمنى التبري يلمع كأديمك
    مشتاقه الشمس تظفر بي ليمك
    تاخد من نورك تلثم لي قديمك
    يا فرع البانه المايل في خميلك
    من قامتوا حبيبي متعلم ميلك
    يا البدر التم ما بتم تكميلك
    لو ما تجعل لي محبوبي زميلك
    سيوف الهندي من لحظة عينك
    ليه بيها تصيبني إيه بيني وبينك
    غير كوني بريدك و حياة خدينك
    كف عني صدودك يا روحي و بينك
    ليك حق في صدودك و تيهك و تذليلك
    ليك حق تهجرني … و يكتر تعليلك
    ما دام فردي … على جيلك
    تمتاز بالعفه المانعني أجيلك
    مع صدك و هجرك لا زلت أريدك
    و منام عيني بين حظوظ جيدك
    تيه بي نعيمك مولاي يزيدك
    ضيعت حياتي تسلم لي إيدك

  139. و عاطر التحايا لك يا ميسون و نيابة عن أهل المدونة أرحب بيك و أرجو أن يطيب لك المقام بيننا و نحن برضو فرحانين و جزلين باضافتك….. تعالى مرة أخرى

    و نهدي ليك

    سلام متوالى ما غبا
    ما مر النسيم هبا
    ال لى العفاف ربا
    يخجل كامل الرهبا
    صب يا دمعى لا تكون جاف
    يا البقيت رجاف
    البدر الخفا الأنجاف
    اليوم شرف الرجاف (المدونة)

  140. د, عزت يا رائع
    احلى سلام و اطيب التحايا لك و لكل من جلس تحت ظل المدونة الوريف قلت لي تعالي ثاني …… هو انا بعد لقيتكم بقدر انقطع و ما اجي …. المهم ما بطول الغيبة و ما بسويها شغلة لزوم وجع الوش يعني …..
    ثاني و ثالث سلام كثير و ارجو التواصل
    ميسون

    اجـسـامـنـا لـيـه جـسـمـيـن
    روحـنا واحـدة وليه اتقسمت قسمين
    شئ عجيب في غرامك يا فريع ياسمين
    انـا ياحـبيبي تجدني علي هواك امين
    وفؤادي يحجزو عن افكاري في التخمين (برضو المدونة)

  141. سلام ثاني يا قبيلة
    شايفاكم فتحتوا موضوع اغاني الحقيبة بواسطة المغنين الشباب على خفيف ارجو اثراء النقاش عشان نشوف الموافقين بادائها بموسيقي و اصوات شبابية موافقين ليه و الرافضين رافضين برضو ليه
    خالص ودي
    ميسون

  142. حاج أحمد السلاوى قال:

    دكتور عزززززززززززززززززززززززززززززززززززززززززززت !!

  143. خلاص يا سلاوي و لا تزعل عزت البقا غنييييييان
    دي كدة كويسة و لا تغيرها ؟
    خالص ودي
    ميسون

  144. هجار قال:

    السلام عليكم ياجماعة
    والله كلام جميل جدا ياريت تزيدونا من شعر ابوصلاح

  145. كلما قالوا من أين لك هذا زدت طابق….يا حليك يا أبو الزهور…. هسة عشان هجار (مرحب بيك) نزيد طابق بعد ما الجماعة سقفوا…. بس طابق البوخة

    الجميل واصـل درة واصـل
    الله لاوراك العلـي حـاصـل
    العذاب أنواع جملة غير فاصـل
    مجلي كبريته كبدي فـي بنزيـن
    فــادمــه كـبـريـتـه
    أصلو هالكني منـه مـا بريتـه
    ياجراح غور إن شاء الله ما بريته
    طابق البوخه قام نـدا يهتـف
    نــام مــن الـدوخــه
    إيده عاقبـاه جدلـه مملوخلـه
    لي معالق الجوف موسة مجلوخـه

    معليش يا هجار ما لقينا أبو صلاح …ود الرضي ينفع !!!

    ميسون….. من السنة الفاتت ما شرفت تاني….!!؟

  146. هجار قال:

    بالله عليكم ماتبخلوا علينا بهذا التراث الثر ، العندو حاجة يزوجنا بيها مع الشكر

  147. هجار قال:

    اقصد يزودنا بيها ما تفهمونا غلط

  148. هجار قال:

    يا سلام عليك انت وياسلام علي ود الرضي … دا مش ينفع وبس دا ينفع وينفع مع خالص الشكر والقدير

  149. هجار قال:

    طابق البوخة قام ندا يهتف نام من الدوخة
    ايدو عاقباه جدلة مملوهة
    لي معالق الجوف موسه مجلوخة

    والله ود الرضي كان ماقال اي بيت قبل او بعد هذا لكفاه

    • يا حاج السلاوي ألحق الجماعة ديل عجايز سااااااااااااااااااااااااااااكت والمدفون ظهر إنت عارف بكره بالله كل واحد يورينا تاريخ ميلاده. يا حاج السلاوي الجماعة ديل أصغر واحد حيكون من طلائع الثورة ثورة مايو الحرة . الحقيبة دي بفهموها الناس الزمان بس . بكرة إن شاء الله عندي ليك موضوع حار من السوق الشعبي أمدرمان وبياعين الملابس الخاصة بالنساء . وناس نأكل مما نلبس ( فك التسجيلات) الملابس القديمة .

  150. هجار قال:

    مملوخة ياجماعة معليش الاخطاء ناتجة عن سرعة الطباعة وبعدين دا كلام عجيب جدا الواحد لو غلط اعذروه

  151. هجار قال:

    خلي العيش حرام مادام ارى الموت يحين …….
    هز الصدر ميل فدع الخصر النحيل ……..

    العارفا يتمها بالله عليكم

    وحباب البعرف عمرين -( اللخدر)

  152. طارق أب أحمد قال:

    لا حولتن
    أنتا يا دوك عوطفكم ما بتدخل بى جاى ولا شنو

  153. ابكرون قال:

    مرحب بهجار ومالك مرجعنا لبيت البكي ده….اولا عرف نفسك قبل ما يلم فيك حاج السلاوي
    __________________________-
    خلي العيش حرام ما دام اري الموت يحل
    ما بين الرميش فوق للطريف الكحيل
    هزاز صدره ميل فدع الخصر النحيل
    بالرجاج يقالب شبه المهر الوحيل
    ————
    هاك صدر المحافل لابي صلاح وتاني ما بجي بهنالان مرحومنا دفناه وخلاص بح…..!

    ***——————————————————-* * *
    ياجوهر صدر المحافل
    روحي معاك اتلطفيله
    ما النور الفي حليه رافل
    في حُق نهده قلوبنا قافل
    كالظبي الفي مقيله غافل
    تاره يميل والتانيه جافل
    وجهه ينور والبدر آفل
    فوق للبدر يزيـد نفيله
    ليك جوز عين نعسان وكاحل
    وخصره يميل وصديره راحل
    لي وجدي اللي جسمي ناحل
    بحر الشوق ما ليه سـا حـل
    بيني وبين النوم مــراحل
    وين للطيف أنا القى حيله
    الفرع البــــتنى راتـــل
    طيره ينوح في غصونه حاتل
    بهوى نسيم لفكري شــــاتل
    كالاسد الفي القيـــد يناتل
    يتأكد مـــاليــــه قـــاتل
    غـــير مكحـــول ظبي النتيله

    • يا أبو الفكاكك
      يا ود يا رائع تعرف فيها بعتنة شوية كتف وخصر وهلم جرا بس خايف واحد يقول ليك أشرحها يا عمو من عيال اليومين ديل

    • والله يا أبكرونا تراكا خطير في لطائف الحقيبة …يعني كدى بكااااااااااااااااااااااااااااااااااي شديد .والغزل الرفيع …وعندك كسرات خطيرة في البكائيات……ياحاج السلاوي الجماعة ذي ما قلت ليك دايرة شهادات تسنيين أحسن عشان الطفش مايبقى

    • والله يا أبكرونا ديل في الوصف فاتو النابغة ذاتو برضك يا حاج الناس ديل عاشو في الريف وشافو الغزال والنعام وجداد الوادي وتأملو في الطبيعة والأكل كان راقد وصحي تصدق الغابات إتقطعت والناس شبكننا في الزراعة ونظافة المشاريع وقطعوا الشجر حتى الطير رحل لدول الجوار والله أولاد اليومين ديل ما يشوفو الغزال إلا في الأفلام الكرتونية خليك من دلاله وعجنو بالله غنايين اليومين ديل بعرفو حاجة غير قنبلة وحاجات تانية كدى عجيبة أما البنات الغنايات خليهن ساكت شروق وغروب وصباح وليل…..إنتا الجمال بتاع الكريمات دى شنو ؟ باقي ليك بقنع. وبعدين رائعة أبو صلاح صدر المحافل أكاد أجزم لو ما قالو ليك أشرحها …أو إعتقد أحدهم أنه من عهد عنترة

  154. حاج أحمد السلاوى قال:

    وقام تانى جاب سيرة البحر .. وفتح بيت البكا من جديد..
    أخونا / ولدنا هجار .. الظاهر عليك واقعة وقعة شديدة وما فى زول سمّى عليك وعواطف عاملة فيك سهامها .. غايتو ربنا يستر عليك من الشواكيش عشان ما توديك مصحة ولدنا مشاكل .. وزى ما قال ليك أخونا الكاشف أبكرونا نرحب بيك ترحيب شدييييد وعاوزين نتعرف عليك اكتر وأولن بالتبادى تكشف لينا ( لا تفهمونا غلط .. ) عن موقعك الجغرافى ..أما مسالة قروبك دى يبدو إنو أخونا وولدنا صديق الفولانى حسمها وحدد قروبك وياريت تكون من الكواشف عشان نكبر كومنا .. لاكين ما ظنيتك مننا..وحكاية تاريخ الميلاد دى أحسن تانى ماتجيب سيرتها أحسن فى ناس كتااااار حيطفشوا مننا وما حنشوفهم تانى .
    - أخونا الكاشف الصغير اب احمد .. إنت خايف على ابو عصمت ولاّ شنو ؟ لا تخاف عليهو ..عواطفه قاعدة تدخل بيجاى لاكين الثقة متوفرة وثق تمام إنو الكواشف ما بيعملوا حاجة غلط … مش ؟
    - أخونا / ولدنا هجار .. قشقش دميعاتك واصبّر شوية .. ياهو حال الدنيا .. يوم تجمّع وتلاتة أيام تفرّق ..إتفقنا ؟؟؟

    • حاج السلاوي سلام لمرابع الكواشف أولاً والما عندو كبار يفتش ليهو كبار ….والله يا جماعة نحيكم ونحي إهتمامكم بهموم الوطن وربنا يجعلكم نبراس يهتدى به…بتخففوا علينا كتير نحن في الخرطوم …قربنا نطق وآه الصبرضل النبي كما تقول حبوبة دائماً يرحمها الله .
      يا حاج نرجع للبعتنة تاني ….إنت عالرف في الخرطوم وفي بعض المناطق الطرفية في كوارع بتاعت جداد…وكمونية سمك …وجراد لزوم القرمشة يعني ذي بتاع البطاطس داك يعني بلغة الإعلانات قرمش قرمش آه رأيك شنو؟ وبعدين كلمنا عن الخضروات شوية يمكن تنفع الذين على عتبة الكواشف .تحياتي

  155. هجار قال:

    ابكرون .. حاج احمد السلاوي … كتر خيركم وشكرا لهذا الترحيب الحار وانا اتشرف بمعرفتكم جميعا … اولا لا تفهمونا غلط لاني كتبت بدلا من زودنا بيها زوجونا بيها وانا عندي مرتين … وهذا اظن اجابة لسؤالين مع بعض (يعني مانخايف من شواكيش بعد دا وانا اخوكم هجار ما ولدكم والدليل …… اتنين ما واحدة ) اما الموقع الجغرافي … شرق الجزيرة – البطانة ان شئت ، يعني ممكن انفعكم في شرح بعض الكلمات القديمة . مقيم بالمنطقة الشرقية – السعودية . وشكرا

  156. حاج أحمد السلاوى قال:

    أخونا هجار .. سلام
    أولن ما فهمناك غلط وتانين يبدو لى والله أعلم إنك واحد من الكواشف … أدام الله عزهم .
    تانين أرجو الإتصال على الجوال رقم : 0508376601 .

  157. هجار قال:

    صديق محمد محمد يحيى الفولاني .. طارق أب احمد …عزت بقا ربتش ، ميسون ، عباس ركس ، السلاوي ، ابكرون … يا جماعة شنو صانين كده .. رفعتو الفراش بدون ما تدونا خبر ولا شنو … ياناس البكا … وبمناسبة ناس البكا قالوا في واحد جا يرفع فاتحة وبعدين شاف واحدة من اللوصفم ودالرضي زيهم يعني .. قام قلدها وقعد يبكي بكا شديد خلاص الجماعة مسكوه قالو ليهو ياخوي دي ما من ناس البكا والمات دا ماعندو علاقة بيها . قال ليهم هي الماتو ليها شوية

    • حاج السلاوي صباحك زين ولكل الحبان في كل مكان …دي من برامج جنة الأطفال كانت قريبتنا ماما عشة(الأستاذة عائشة سالم عمر مقدمة برامج فن وجمال بتجيبنا التلفزيون كل أسبوع والمسألة مقسمة لكل أولاد وبنات الحلة بالموردة والهاشماب والعباسية.
      والله يا حاج السلاوي حقيبة الفن دي ورتنا حاجات كتيرة عن الإخوان ديل …نرجو أن يدوم التواصل
      عشان نخرج من ورطة الخرطوم كان زمان في كتاب الأغاني ومجلة الإذاعة والتلفزيون وساعة سمر وبرامج ألحان يوم الخميس وما يطلبه المستمعون وفي ربوع السودان والله البلد بقت ملآنة جرايد كوووووووووووووووووووووووووورة ودعايات إنتخابية….بس كترو من الحقيبة المكتبات ما فيها أي كتب عن ذلك والبكايين ديل بذكرونا الجميل والمفيد ….آهو قاعدين وراجين الإنتخابات ….تصدق مناظرات التراشق بالصحف هل ستقنع جيلنا ودي للذين لا يعرفون الحقبة من الإستقلال وحتى الستينيات…أدونا حقيبة دمنا فايريااااااااااااااااااااااااااااااااا جماعة

  158. ياسين شمباتى قال:

    الاخ هجار..سلام..
    والله هجمتنا تب!! براحة ياخوى واربع على نفسك..مرحبا بك باكيا وفاعلا ومتواصلا مع الاحباب هنا..لكن عملتها ظاااااارهة..ومستعجل مالك لما بتتلخبط فى الاملاء؟؟ الكترااااابة..
    مرحب بالبطانة وشرقها ورفاعة وضواحيها..وانا عملات فترة لا باس بها بمدينة رفاعة وقراها..واكيد بنتقابل باذن الله..

  159. هجار قال:

    للرائع .. حبيب الكل … ابوصلاح

    لو تجافي لو تسمحي مني ريدك ما بتمحي
    بي خيول الشوق ارحمي واروي دمعي البطمحي
    بس عشوقك لا تقمحي بي طريف العين المحي
    برضي فاهم سر الوحي الفي حواجبك بتلوحي
    تمسي هجة ونور تصبحي وفي قلوب الناس تربحي
    يالحمامة البتصيحي بي فريعك بتميحي
    كيف عزولك لا تروحي وانت جنة ونار تقدحي
    يا زهير الروض فتحي والنسيم بالطيب كتحي
    من غصونك ما تبرحي يوم تبكي ويوم تفرحي
    المبكم بتنصحي وب نغيمك بتفصحي
    هاك عقلي الطاش انصحي وكان مغيب والآن صحي

    • الإخوة الكواشف في غنى حريمي رائع مثلاً ما تغنت به أم بلينة السنوسي(نحن حافظين لودادك وما بنطيق نحمل بعادك) بالله فتشو الأغنية دي ..منى الخير (هم حياتنا هم أملنا) والرائعة الفلاتية (لم ترجع لينا تاني-ليك بنهديك التهاني من قلوبنا تفيض معاني- نحمل الشوق والأماني )

  160. حاج أحمد السلاوى قال:

    أخونا الكاشف ( باعتبار ما سيكون ) هجار ..
    أسعدتنا كثيراً يسماع صوتك اليوم ولك الشكر على المهاتفة …بس شايف منطقتك زى منطقة اخونا شمباتى .. غربة داخل غربة ..أخوكم هجار فى منطقة تبعد 70 كيلومتر من الخبر/ الجبييل ( كدا صاح ) وهى نفس المسافة اللت ولدنا شمباتى من مكة المكرمة ..
    نامل ان نراك قريباً ..وما تقطع الجوابات .

  161. ابو حميد قال:

    السلاوي ابكرون (الكواشف)
    مابتقصرو طوالي متوجدين محل بيتوت البكاء فاتحتكم حاضر
    هجار احيك احي ابوصلاح بالله كتر لينا منه
    لو تجافي لو تسمحي مني ريدك ما بتمحي
    بي خيول الشوق ارحمي واروي دمعي البطمحي
    اها ياالكاشف اخوي(السلاوي) مرقه من البلد ديك جينا بي جاي ده مش خطوه كويسه

  162. حاج أحمد السلاوى قال:

    ابو حميد ..سلام
    خطوة كويسة لاكين ما مشيت بعيد .. نحنا عاوزين خطوات تنظيم ..
    فى بيوت البكا بنسوى واجب العزاء.. بنشيل الفاتحة على الميت وبنمشى ..وما بنسال عن الدقاقة ..!!

    • أخونا هجار سلامات :هاك دي:

      سايق العظمى سافر خلاني وين
      يا الماشي لباريس
      جيب لي معاك عريس
      شرطاً يكون لبيس ومن هيئة التدريس
      (كان زمان في مرحلة لإعداد المعلمين بباريس – وكما الشياكة ).
      كان في السابق تسمى أغاني السباته (إن شاء الله تكون دي عارفها-) أعتقد أن الغنا تعبير عن الواقع الحياتي للبنات وشكل من أشكال التعبير ومهما يحمل من معاني ودلالات يجب الوقوف عليها إن كان هناك باحثين إجتماعيين أو تربويين . هذا بجانب الأغاني الرائعة لرائدات الطرب السوداني . اليومين ديل سامع لي واحدات كدى بغنن غنى السجم والرماد (السجم في المعنى الدخان الأسود الذي يعلق (بالتكل أو الراكوب) يتطاير في الهواء ويعلق بسقف المطبخ وخلافه والرماد بقايا تمكث بعد الحريق والخراب في الأرض.

  163. ابكرون قال:

    انته يا سلولو فهمك بقي تقيل كده ليه
    ياخ وليدنا ابوحميد بقول ليك طلع خلي البلد يمكن يكون جا جنبك اغترب ياااااخ عايز: يبني نفسو زي كل الشباب ويرجع ليها تاني وينسيها العذاب……كان يبطلوا النحيب ده

  164. يا حاج السلاوي هاك الكسرة دي:
    هبت الخرطوم في جنح الدجى وين لشباب اليومين ديل واقعين كتل في بعضهم

  165. هجار قال:

    حاج احمد السلاوي .. لك التحية والشكر – مكان اقامتي تبعد عن الجبيل 70 كلم وعن الكويت 200 كلم ، الاخ شمباتي شكرا على اتصالك وتشرفنا كثيرا بمعرفتك ، الاخ صديق الفولاني لك التحية والود اما بخصوص الغنى الحريمي القديم خاصة الذي ذكرته فنحن ياخوي ماحضرنا الزمن داك يعنى يادوب سمعنا الجلابية البيضاء المكوية وكدا..
    ابكرون كيف حالك ما قلت لينا رايك شنو في الغنا الحريمي بتاع زمان

  166. هجار قال:

    ابكرون اسع عليك الله دي عين ولا غين .. العزالل

  167. أخونا هجار
    هسع أفضل من أسع وتعني هالساعة وعندما تخفف تسمع هسع ودي عربي فصيح غايتو أبكرونا بكتبها أسع ماتسألوا.

  168. هجار قال:

    اخونا صديق والله نحنا عندنا كلو واحد هسع واسع وانا بالذات عندي احسن اسع لانو ما عربي فصيح ولك الشكر

  169. ابكرون قال:

    هيييي يا الهجار والفولاني امرقوا لا بره من صالوووون العشق والبكي ده(جلسن شوفن…) هنا (هقيبه) وبس…..هسه ….أٍسه….هسع…..وسع…..(افتهوا) ليها بوست خاص بنجيكم…يقوم صديق يقول لي انت يا ابكر فلاتي …بعد شويه يجينا اساغه….وهبايبنا …..فلاتيات جده تدخلونا في مشكله مع هفسه……أمرقوا بيوت البكاء ليها ( هرماااااات)

    • أبكرونا سلام
      هاك الكسرة دي من تأليفي (ديوان صهد الوجدان تحت الطبع)

      ظبي وجرة

      أظمأتني يا ناعس الطرف بلحـــــــــــــظ فرفقاً بقلبي الوحيد المستهام

      بل أنت لا تدري ما في النفس من ظمأ فأسقني من دنك حباً بهيام

      يا ظبيةً في الوادي إن عطفت بجيد شك قلبي سهمها فأراق إستلهام

      وجرة: منطقة بالجزيرة العربية ( قديماً) إشتهرت بالظباء المليحة ذات عيون سوداء يشبه بها جميل الحسان ذوات العيون النجلاء.

      هسع في هفسة هنا….. خلي روحك رياضية

  170. أبكرون ثرو هجار سلام

    ملازمة بيوت البكاء يا هجار بتكون لاسامي من شاكله مفتون مفلوق الراس بالشاكوش الصاموتي مهجور زي كده
    لكن اسم هجار مفروض يكون في صف النجار البدي الخشب الكواشيك-غلطه من الكيبورد-
    أما الفولاني وعبدالمنعم ديل دايماً مشعللنها
    غايتو ناس الصمغ العربي ديل جنس غايتو

  171. هجار قال:

    حاول يخفي نفسه وغير اتجاه
    سطع النور في افقه وكل انسان رآه
    خلنا البدر اشرق كامل في علاه
    وخلنا الزهر فتح من انفاس شذاه
    +++++++
    جذاب حسنه رايع لادن خلقه مايع
    رقص البان مشيه تحب تنظر وشيه
    عيونك تختشيه من قوة ضياهو … ومن شدة حياهو
    ++++++
    مرة اذا نظرته ونظرة ليك رناه
    قلبك ينشرح له وترتاح لي لقاه
    دون تشعر تحبه وتلهج في ثناه
    +++++++
    مره تقول كبدري ومرة تقول كزهري
    تقلب فيه اسما وبرضو تشوفه اسمى
    كل وصفا تراه اقل من مستواه
    مترفع عظيم عالي بعيد مداه
    ملأ العين جماله الزاهي رشح نداه
    يلالي والكواكب تتناثر حداه
    فيه الحسن اودع ما ملكت يداه
    مفرح وشوفتو تفرح
    بتلقاك باسم في زمن المواسم
    اللحظ البيجرح والوجد المبرح
    انا من دون اصرح
    لي قلب اصطفاه واسع هناك معاه
    وما تزعل يا الفولاني هسع هناك معاه

  172. يا جماعة حاج السلاوي وين؟
    كل الأخيار سلام …
    دى الكلام …درر الحقيبة الرائعة ….ما قلنا زمان الحقيبة دي ما بفهموها إلا ناسا ….غزل رفيع …ذوق ما ليهو ساحل …طابت أماسيكم ولياليكم بعذب الكلام… كم نشتاق دائماً للماضي العريق …لكن لقيت الجماعة بكاااااااااايين جنس بكا….إنتو عارفين الكلام الرائع بتاع الحقيبة دى بوجع القلب فماذا نقول لعواطنا؟ كل واحد ليهو ماضي …ماضي جارح للعواطف بشوق ولهف المحبين …وعبق الذكريات…فكم هي صادقة ونبيلة وجملية ونقول دائماً (يا حليلا…).
    كل المودة لكم جميعاً ودمتم ذخراً وعبقاً يبهج الأماسي

  173. هجار قال:

    ابكرون ياخي ما تبعد العين دي من الناس ديل تخليهم يقدروا يشاركو … انا يتخيل لي في كثير منهم الواحد يجي عشان يكتب يشوفها ينشغل من الكتابة وذنبو عليك انت خاصة الكواشف ديل ما بقدرو يتحملوا حاجات زي دي ، معليش الشباب زي ناس شمباتي ممكن الحاكاية تكون ليهم عادية شوية ولا شنو يا حاج السلاوي … انا غايتو بديها ضهري تب وابدا اكتب وبرضو ما بسلم من الاخطاء الاملائية.
    ايا صاحب الطرف المكسور
    كشرت قلب شجاع وجسور
    تتجاهلني وانا بيك مأسور
    حسابي معاك بقى كلو كسور

  174. ابكرون قال:

    هجار هاك دي من بيت الكلاوي …..عيني دي خلها بتشوفك اعمل حسابك
    —————————————————-
    ليلى طال زى ديسك الهضلم نزل لضميرك يا فريهيدا انسبل
    والجبين النورو يتلاصف لمع ضوه لينا الحله بالاربع قبل

    فيكى حاجب زى هلال اسود غزر والرمش من طوله فى طرفه انشبل
    شابه النشاب والقوس والوتر قلبي من جوز غمضه برمشه اتنبل

    والعيون الواسعات بلحظهن قصرن لعاشقن طول الأجل
    ناعسات أطراف عيونك يظهرن في خديداتك علامات الخجل

    يا أم رقيبتا شمعدان باهى اتنصب لرقاب عشاقه كم أحيا وقتل
    والايدين الناعمات يتجدعن يشبهن خيط الحرير الانفتل

    يا أم سنونا من درر يتلاصفن زى بريق العينه فاطرك في المثل
    حبكم يترب حبوب وسط الحشا منها زرع الريده في قلبي انشتل

    والصدر البى النهد برز قلع تقلو رجح بالضمير الانتحل
    والكفل في المشيه يقلع ويتنتل زى مشية المهره في الطين الوحل

    صادفتني وزودت ناري انضرام أم لهيجا احلي من صافى النحل
    فارقتني وفارقت عيني المنام قلبي من بين الضلوع فر ورحل

    ما بريق المبسم الفرّ وحفظ لجواهر سنو ما نقا ونجل
    المنيل ديمه فايح بالمسك لو يمر نسامه بسكر بعجل

    • أبكرونا سلام والأخ هجار
      والله دى ما بيت بكا دي ساحة فداء عديل لانو الميتين كتار…………..
      واللجماعة الباقية ساككككككككككككككككتين ساااااااااااااااااااي والله دى بكا حااااااااااااااااااااااااااااااار

      بعد هذه اللطائف من الحقيبة أظن هناك منعطف عند الشاعر سيد عبد العزيز والمغربي إبراهيم الرشيد
      ود الريح هلا دلفتم بنا الى حى العرب بأمدرمان قليلاً … ثم هناك فترة شعراء الهاشماب الأستاذ صديق مدثر ( ضنين الوعد- عاد الحبيب ) عبد المجيد حمزة حاج الأمين – محمد محمد علي(الشعراء الأفندية ).
      وبعدين يا أبكرونا الفنانين الغنو الغنا دى ما تقول حاجة فيهم (حسين عبد الكريم- زنقار- الحاج محمد أحمد سرور) إنت عارف الموضوع دى جااااااااااااااااااااااااااااااري بفايدة .
      تحياتي

    • الأخ أبكرونا شنو فاتح لينا كدي إنتا هجار دى جا متين لمن بقيتو أصحاب كدى الحقيبة دي حقتكم براكم ؟
      عندي س}ال بسسسسسيط كدى:

      إنتا شعراء الحقيبة ديل كانو بشوفو البنات وين؟
      البنات اليومين ديل الواحدة عاملة ذي ( السوط) بفتشن في السمنة بالحبوب وحقن الأنسلين يعني الوصف بتاع الحقيبة دى مافي … الشعر مقصوص وملون ….الوش مبرقع … واليدين لونن بخلاف الوش…. يعني الشغل الزي المهر الخايض وحل دي وين؟
      الكتيف ال…..
      الهضليم ال… ال…………ال…………..ال…………ال…………ال……..كلو….

      يعني نقول اليوم:

      الضلوع ال………
      الخدود ال……….
      الرموش ال……..
      البنطلون النصل … الموبايل ال…….
      الغنا الهايف ال………………….

      تحياتي

  175. هجار قال:

    ابكرون ياخوي الجماعة ديل مشو وين البيت فاضي كدا زول يشيلو معاه الفاتحة ساي مافي غايتو انا بنتظر شوية مع الفولاني دا برة الكان ماجا زول منهم بمش ناس العرس .. خلينا نهيص شوية
    هاكم ود الرضي…. الله يرضى علينا وعليكم ويرحم موتانا وموتاكم
    تيهى فوق العز و النفل
    ياليلى قول حسادك أفل
    ليلى ليلى وليلك سدل
    وفيك عليل الصبا معتدل
    النجم ببهاءك ليلى دل
    و الفهيم بالاية إستدل
    فيك كل الخير إنبهل
    و العفاف المزجو الجهل
    بالسرور كل وجة استهل
    و الجميع لله إبتهل
    ليلى قدرك ما إنجهل
    و ليلى سعدك هدا شهرو هل
    بالطرب كل عقل انذهل
    المهل يا ليلى المهل
    المبطر مال واعتدل
    و المرجرج طاوى البدل
    جورى تيها جورك عدل
    انا لا أروم عن جورك بدل
    المدلل مهما فعل
    الجبين النافى الزعل
    الخدود النورن شعل
    يا سعادة الام و البعل

    • الأخ هجار -أبكرونا

      يصراحة الجماعة ديل مشو وين ذي ماقلت ؟ يظهر فشفاشم أتهرى من البكا الكتير….وعايزين خيارات لكن بتاعة عمنا السلاوي دي ما دايرينها . الخرطوم اليومين ديل ملانة ورق مصور وعربات حايمة بغشو منو غير السذج ….غايتو جنس محن وكان طرقنا الباب دا أحسن نمشي بيت العرس ذيما قلت…
      الأخيرة دي قاطعة :يا سعادة الأم والبعل ….إنتاج عالي الجودة ….والله يا أبكرونا أحسن نقع في الحقيبة دي ونقعد نتخيل ….
      عارف زمان المسوح كان كركااااااااااااااااااااااااار والموصة (للمرجرج طاوي البدل)……………والكركم لل……….
      وفي زيت تاني كدى من الودك(دهن الخروف ويضاف إليه زيت فهد بعد الغليان ومجرور بالقرنفل وقشرالبرتكان ما حق اليومين ديل الجايبنه من البرازيل ما فيه ريحة ….كان برتكان كسلا وجبل مرة أبو صرة….وكانت الفتاة تمسحها حبوبتها وتدللها وتعجنة (الخدود النورن شعل)هذه هي فتاة الحقيبة الحلوة الجميلة تلمع مع الشمش ، لكن حقت اليومين ديل تخاف من الشمش لزوم الكريمات الجاية من بره….
      وكان النمر خلانا نللاقى

  176. هجار قال:

    واحد مواعد ليه واحد وواقف منتظرو سألوه يازول ما لك وافق هنا قال ليهم والله مواعد لي واحد يجيني الساعة سبعة قلبت انتظر لتمانية اكان ما جاء تسعة امشي…. انا بنتظركم لنهاية فبراير دا اكان ماجا زول شهر مارس بمشي ….واقيفوا انجرحكم بي ود الرضي دا تاني عسى يجيب نتيدجة
    الناحر فؤادى مولع جوفى حر
    أضرم نار وجدى نسام السحر
    الكتف المهدل والجسم انبتر
    والغيم المزمزم والصاد والتبر
    والضهر المتنى والتيه يا الابر
    دا الخلانى ساهر ماء عينى تبر
    لاحم كتفه كفله ماج جيده الوفر
    عمعم ديسه درعه فى بعضه إنضفر
    حاكى الغيم تعرجن يا غالى النفر
    قول للوزة غورى فى عينك ضفر
    ما أطراك حبيبى الا وقلبى فر
    اتلظى وأكظم الغيظ الوفر
    ينعش روحى طيبك لو بدرك سفر
    زى ما بى تفعل ذنبك مغتفر
    شاغل غير شواغل بى سوحك مرر
    على أسمعن من فاهك درر
    من فولاذ قليبك وكبدك من حجر
    ما أحلاك عندى إن زر أو هجر

    اها دي ان ما جابت نتيجة بنهجر بيت البكا دا تب … هجار

  177. حاج أحمد السلاوى قال:

    أخونا هجار ..سلام
    يا جماعة الخير المدونة فيها مواضيع كتييييييرة من كل الوان الطيف .. شى سياسى ..وشى إجتماعى ..وشى ما بعرفوا شنو دااااك …بس ما شفناكم بيغادى فى الضفة الغربية .دايرين نعرف رايكم فى الشى الحاصل دا …أكان إنتخابات .. اكان أطفال المايقوما .. أكان حتى موضوع عرمان المجنن ولدنا مشاكل وعامل ليهو سافوته فى أضانو …
    أها إتفقنا …ولاّ إتفقنا على ألا نتفق ؟..وكان غلبتك الإجابة ممكن تستعين بالجامعة العربية !!

    • يا زعيمنا والله السياسة دي أخير منها بيت البكا………….أبكرونا حسم النتائج …نحنا قاعدين جوة وشايفين العجب….والله الثورات إتملت ظلط وصالحة أم موية مالحة جاتها الموية الحلوة وفتحو الشوارع وقامت فيها فلل والكبري قرب والمطار الجديد كمان وصنعنا طيارات وكبري الحلفاية حيجيبك أم درمان بالثورة والكلاب الضالة إختفت ………….والمصريين عملوا مطاعم ….. وبنات الحبش بقوا كتار

  178. هجار قال:

    حاج احمد سلام عليك ياخوي انا عارف الحاصل في الضفة الغربية وما نافع معاي وانا في سياستي الداخلية اختلاف الآراء بيفسد الود كلو مرة واحدة وانا في المواضيع ديك بختلف مع كثير منكم وبعدين مجرد ذكر اسماء بعض المرشحين بوتر اعصابي وانا بعيد عنك وعن القارئين عندي القولون العصبي … عشان كدا احسن لي كل ما لقيت فرصة اجي ناس البكا ديل آخد قعدتي مع البلقاه من ناس الوجعة واتوكل امش علي وليداتي وبعدين لما تخلصوا من الانتخابات تجو للانتحابات وتلقونا قاعديييييييين

  179. ابكرون قال:

    الفولاني هجار سلولو
    سلام ما تشتغلوا بي سلولو ده السياسة دي غير مرض القلب ده ما بتجيب شي والبشير ده لوعمل السودان زي اليابان برضو ما بنريدوا وما بنديه صوتنا….اذن مافي داعي للتعب خلونا مع ينوحن لي حماماتن
    ما دام البوست ده بريحنا وبجمنا…..السياسة خليناها لي ناس امين حسن عمر وعايزين نخلي ليهم الدوحة ذاتا ملوا الفنادق والشوارع…….!
    الفولاني قلته لي الواحدة زي السوط ….يعني دي يغنوا ليها:
    كجلسن شوفن يا شناتن
    متشعكبات منكوشات هم ناس فلانه ذاتن
    قالوا الليله هووووي ديلك يا حليلن فااااااتن

    • يا أبكرون سلام
      في واحدة كدى (أغنية بغنيها المرحوم بادي) من روائع الحقيبة….
      عيونك علمن عيني بكا الخنساء عيونك…. بالله أكتبا لينا نحرر بيها البكا دى ….

      الخلان الفولان رجعونا لورى تااااااااااااااااااااااااااااااااااااااااااااااني البوست إنقسم لي قسمين أنا برة

  180. هجار قال:

    ابكرون انت عينك دي انعل ما بتمش بيها هناك محل السياسة؟ ياخوي كان عايز تمش هناك خلي لينا عيننا في محلها والله يعدلها عليك

  181. حاج أحمد السلاوى قال:

    غايتو فى ناس بكايين جنس بِكا .. دا شنو دا ؟
    إنتو الدموع دى بتجيبوها من وين ؟؟ نحن دموعنا خلاس كملت تب .
    يا خواننا أخونا وحبيبنا أبو عصمت مختفى وين ..كدى تفقدوهو وأسالو عنو يا ناس جوة ..البوست دا حقو شخصياً ..فكانا عكس الهوا ونزل من البص .

  182. ابكرون قال:

    انتو عارفين ان شعار حقيبة الفن الزمااااان(ملوك امدر/عنوان هذا البوست بعد الرمية) انا لوكنت المسئول كان سويتا السلام الجمهوري :
    ——————————————
    ملوك ام در
    الليلة كيف امسيتو
    يا ملوك أم در يبقي لينا نسيتو
    الخيال لي جسمي وخليلي أسيتو
    ومالو لو بي طيف الخيال أسيتو
    جلسن شوف يا حلاتن
    فزر في ناصلاتن
    قال لو لي جن هوي حبابن
    الحبايب حبايبين
    يالله
    الناعسات كاحلاتن والله ما بريد غلاتن
    ما هم لي جن هوي حبابن
    يالله

  183. زووووووول قال:

    يا اخوانا نرفع الفراش

  184. حاج أحمد السلاوى قال:

    أخونا الزول ..ابو سبعة واوات ..
    مستعجل مالك ؟ خلى الناس البكايين ديل يكملوا دموعهم ..ناس هجار وابكرونا والفولانى .

  185. أبكرون سلام مربع

    شعار جميل كما قالو ليك أشرحو ….إنت نجوم الغد ديل قاعد تشوفن؟ بالله رأيك الفني…

  186. ابكرون قال:

    سلولو : الدموع دي بصرفوها عند الميلاد قِرب …قِرب جمع قربه…بس في ناس قربهم بتجف …..:
    وجفت مقلتى الباكية ..
    ونامت من سنين أحزان
    وجاى تفتش الماضى…..خلااااص الماضي ولّ وراح..
    ..إهئ…. إهئ
    ولا انت يا سلولو : (اراك عصي الدمع شيمتك الصبر)
    ——–
    يا الفولاني نجوم الغد ديل(بلي ) ساكت جمع بِلية بكسر الباء….ما بنفع ما شجر كبار …ما فيه صمغ نجوم الغد ديل لناس شمباتي ومشاكل فما دون…..لكن برضو بشوف محمد سليمان دمعاتو جاااااريه….ما عارف مالو….محمد سليمان ده لمن شفناه في برنامج دنيا دبنقه كنا في الاساس …..!

    • يا أبكرونا دنيا دبنقا ولا جراب الحاوي وساعة سمر كلو كان زمان هو محمد سليمان دى بكااااااااااااااااااااي ولا بشجع اللعبة السمحة غايتو العجااااااااااااااااااااااااااااااااااايز ديل محنم كتيرة ….. هسع خقيبتك دي ما خلت الناس شتتو… ولا شنو يا هجار شايفكم براااااااااااااااااااااااااااااااكم .

    • يا أبكرونا كدي ورونا الناس الفي الخرتوم ديل ان نلاقبهم ….يمكن نعمل لينا حزب ….موضوعو حقيبة الفن ونمشي نزور الحيين منهم …..
      حاج السلاوي وينا موضوعات الضفة الغربية بس ما تكون سياسية ….

  187. ودالخلا قال:

    سيبوو يا دوك، قصدو كان بيحفر في الأساس!!

  188. يا حاج السلاوي سلام

    هناك تأليف موسيقي جميل للموسيقار برعي محمد دفع الله لحن لكثير من الفنانيين أمثال:
    وردي -الفلاتية – سيد خليفة-إبراهيم عوض على مواصفات الصوت البشري …..إذن يمتلك معرفة خصائص الكلمات التي تناسب كل فنان … وين الكلام دى اليومين ديل؟ عشان كدى ما بنسمع غنا
    آهو يا حاج دى موضوع .

  189. ياسين شمباتى قال:

    هجار.سلام..
    لكن هو قالوا ليك كدة!!؟؟؟ اربع على نفسك يا صديق…طبعا الناحر فؤادى دى بالجد بتنحر الفؤاد خصوصا عند صاحب المندلين (ابراهيم خوجلى) او (بادى محمد الطيب)..شكرا كتير عليها….

  190. هجار قال:

    الاخوة الكرام جميعا … الحمد لله على السلامة (البركة الجيتو ) اصلو القعدة في بيت البكا للزول براه مابتبقى وبعدين السياسة دي زي ما قال اخونا ابكرون غير وجع القلب ما بتجيب حاجة ونحنا قدر القلب الفاضل لينا دا دايرين نحافظ عليه ولا شنو يا حاج السلاوي . وكان داير ليك زيادة دموع اشرب من الحقيبة دي لامن تروى والباقي سويه ليك في دموع تبكي بيها مع الناس ما تفضحنا مع الشباب ديل كل شوية تقول الدموع بتجيلوها من وين .
    د. ياسين حبابك الف … الشي دي حفرة شنو دي يازول البتخليك تغيب الفترة دي كلها والله اشتقنا ليك ولمشاركاتك وطلتك الغالية وبعدين انا لقيت نفسي براي وما قادر الحق على الضيوف البجو في الفراش قلنا نوسط ليكم ناس ود الرضي ديل هم البقدروا يجيبوكم راجعين .
    الفولاني بالله عجل بتكوين الحزب بتاع الحقيبة دا وسجلنا طوالي خلينا نحصل لينا حاجة مع الناس الجايين من الدوحة ديل .
    الاخوان ..عزت .. ود الخلا .. لكم التحية والود

    • والله يا أخوي هجار

      خايفنو يكون يكاااااااااااااااااااااااااا عديل …بعد الدوحة دي…. وإن شاء تلقونا جيييييييييييييييييين
      إنتو مشاااااااااااااااااااااااااااكل وين؟
      وعلى النجيلة جلستا.
      أنا بريدم ديارم وين؟

      يا أبكرونا أتحفنا بالحقيبة قبل ما تروح.
      يا رمال حلتنا …..

  191. حاج أحمد السلاوى قال:

    أخونا هجار ..
    تحصل شنو ..مع الناس الجايين من الدوحة ديل ؟ إنت ماك عارف إنو أكان ما شلت ليك بندقية ما بتحصل حاجة ؟ تحسبو لعب وهين كدا ؟ لازم تسوى مليشيات وتعمل ليك غزوة غزوتين ..لاكين تقعد لى كدا عاصر الفراش الما بيخلص دا ..ما حتلقا ابو النوم !!
    وبالمناسبة دى أهديك أغنية الفنان الكبير أبو على ..هل تدرى يا نعسان أنا طرفى ساهر … عشان ما تقولوا سمع بالبكا والعزا وما جانا سوا الواجب ..
    أها الأربعين متين ؟

  192. ياسين شمباتى قال:

    هجار..سلام..
    يديك العافية يارب,,ما شرحت ليك الحاصل..خليها مستورة بس,,لكن عليك الله كان ما فشيت غبينتك واتنخجت هنا لما تفضى الجواك بعدداك نشوف الحاصل شنو..

    (دمعى الاتشتت…..دمعى الغلب اللقاط)…

  193. هجار قال:

    يا جماعة انا قاصد الجايين من الدوخة مش من الدوحة زي ما انتو فهمتو … ماصدقتو لقيتو ليكم موضوع سياسي .. انا اقصد الطابق البوخة قام ندى يهتف نام من الدوخة .. وبعدين قام من الدوخة .. وبعدين جا من الدوخة … ابكرون وينك ما ظاهر … د. ياسين الشرح لي الحاجات دي السلاوي بس ما تكلموا … واخونا الفولاني والناس الدايرين الحقيبة هاكم دي

    في الضواحى وطرف المداين
    يلا ننظر شفق الصباح
    قوموا خلو الضيق في الجناين
    شوفوا عز الصيد في العساين
    يله نقنص نطرد نعاين
    النهار أن حر الكماين
    كلبي يا جمجوم أصله خاين
    شوفوا كيفن يبرأ الملاين
    هب شال وكشح المراح
    للقنيص الخيل خف راسن
    نحن ما بنخاف من مراسن
    المكارم غرقنا ساسن والمجاهل
    مين غيرنا ساسن
    ان عطشنا نمز مر وآسن
    وأن عشقنا بنعشق محاسن
    فى المحاسن كفي يومنا راح
    في الخميلة انجلت المحاسن
    عيني حايرة ومشي قلبي جاسن
    بعض حسنك هي يا محاسن
    الحرير حين قدميك داسن
    والزهور حين شفتيك باسن
    والغصون من لدنك مياسن
    والنسيم فاح بكر الملاح
    يا الطبيعه الواديك ساكن
    ما في مثلك قط في الأماكن
    يا جمال النال في ثراكن
    ياحلاة البرعن أراكن
    في قفاهن تور قرنه ماكن
    لا غشن لا شافن مساكن
    في الخزام والشيخ والبراح
    شوف صباح الوادي وجماله
    وشوف خضاره وصيده ورماله
    شوف يمينه وعاين شماله
    شوف نسيم الليل صاحي ماله
    شوف فريع الشاو مين أماله
    القمر خجلان من كماله
    والصباح لا بهل الوشاح
    يا أم لسانا لسع معجن
    كلمة كلمة وحروفه ضجن
    ديل خدودك غير داعي وجن
    ديل عيونك من غير سبه لجن
    ديل دموعك من نظرة شجن
    ده دلال ايه ده دلال معجن
    محن الامات يا رداح
    ماك نسيم الليل بي برودك
    نامت الازهار فوق خدودك
    غرد العصفور فوق عودك
    النفوس ما اتعدت حدودك
    ما عرفنا عدوك من ودودك
    بس أنا المقسوم لي صدودك
    يا حياتي وأملي اللي راح

  194. هجار قال:

    ابكرون … تقدر تجاري لي الكلمات ديل
    يا جمال النال في ثراكن
    ياحلاة البرعن أراكن
    في قفاهن تور قرنه ماكن
    لا غشن لا شافن مساكن
    في الخزام والشيخ والبراح

    د. شمباتي هاك الهدية دي

    يا أم لسانا لسع معجن
    كلمة كلمة وحروفه ضجن
    ديل خدودك غير داعي وجن
    ديل عيونك من غير سبه لجن
    ديل دموعك من نظرة شجن
    ده دلال ايه ده دلال معجن
    محن الامات يا رداح

    حاج السلاوي ياخوي كان لقيت ليك شوية دموع ادينا خبر امكن نلقا ليك حاجة كدا على قدر دموعك

  195. حاج أحمد السلاوى قال:

    أخونا هجار ..سلام ..وكيف كان الويك إند بتاعك ؟؟
    عرفنا إنك ما ليك فى السياسة ..كمان مولد النبى ما عندك فيه لا ناقة ولا جمل ..؟
    بس عشان ما تطلع من المولد بدون حمص ..أو عروسة حلاوة سغيروووووونة ..!! أنا ماعارف من وين طلعوا لينا بحكاية الحلاوة فى المولد دى؟
    الدميعات ما خلاس كملن يا هجار ..بقينا نبكى دراى كلين ..
    ودنيا الريد غريبة ..ناس أفراحها زايدة ..وناس يتالمو .

  196. ابكرون قال:

    سلام لكن يا هجار لقيت حالتك متأخره بعد ما عقدته العزم اطنش قلته ارسل ليك الدواء ده والوصفه دي مرتين بعد العشا….ومره بعد صلاة الفجر……عسي ولعل :
    الدواء ده بس في صيدلية (موفورة النفل) عارف النفل شنو ووين…..جنب شارع (ناس فنايده)؟

    —————–

    اتمايل غصنك رفل ميل سنده الكفل

    اتمايح مايس رتل رن في قلوبنا حجيلة تل

    عام نهده وكتفه الحتل اتوسد في فنايده تل

    اتناعس مايس قدل في الأرداف رمي الجدل

    في القامة الزينة البدل شفنا الجور والعدل

    يا المايح احب واجل فيك اذلال قدري الاجل

    قلبي المابعرف الوجل رعته وخاف سيف النجل

    ليك مقدار ما بذل در نفيس الغزل
    في حبه انا لم ازل رغم اللام والعذل

    • أبكرونا
      سلام بفارس الحقيبة وهجار ماسك معاك الراية بس خايفو يكون ذي الحوار الغلب شيخو بسسسس
      عندي سوعالاً بسيط إنتا ناس الحقيبة ديل غزلم عفيف بعد الوصف دى ؟ يا أخوي تقول دارسين طب
      بعدين بنات الزمن داك كانو بياكلو شنو ؟ اليومين ديل الواحدة ما خلت مطعم لذيذ وكل المطاعم الفاخرة برضو ما جايبة نتيجة …إنتا عارف حديق الحيوانات لو كانت في كان الواحد ممكن يشوف غزالة شبعانة …وأسد ليهو ضل وزرافة طويلة مادة راسها للإدارة المركزية وقرنتية حايمة بين كبري شمبات والموردة ..وتاني شنو يا ربي آي …..جاموسة بتحلب 45 رطل لبن وقرد بياكل موزة بالمناسبة 2 كيلو ب1.5 جنيه جنس رخصة كل الحاجات دي يمكن تلهم الشباب في كتابة الشعر الجميل وبعدين ياااااااااااا كروان الحقيبة ….غننا شعراً جميل …قلت ليك هجار دا ما عرفتو قريب ما تنسى الباقين من الصيدلية (موفورة النفل) الوفرة ما سمحة ….لكن هل تراها اليومين ديل؟

      حاج السلاوي (دراي كلين )…..غايتو ذي ما قلت دميعاتنا كملن وربنا يجازي الكان السبب….
      يا هجار الدوخة دي شنو؟ بعدين ناس الغابات بزعلو منك ….كدي فتش لينا الشيح وخلافه بزرعو وين ؟ بس ما يكون عند عطارة التيمان …كمان حتغضب الجزارين بتورك دا.

  197. ابكرون قال:

    الفولاني : يا عزيزي لو كثير تزوج عزه والمحلق شاف تفاصيل تاجوج وبن الملوح تزوج ليلي …ما كان قالوا الشعر الجميل ده والخالد….نفس الشي لو ناس ابوصلاح والجاغريو والبنا والعبادي كانوا بشوفوا (الهركولات) ديل ويقعدوا معاهم يمعطوا في النجيله ما كان قالوا لينا الدرر دي….من الشعر والوصف الحسي المحروم…وكان حيروا فنانينا بتوع الايام دي وناس نجوم الغد ….كانوا حيغنوا شنو؟؟؟؟؟؟؟؟؟؟؟؟؟؟؟

  198. كلبي يا جمجوم أصلو خاين شوفو كيف يبرأ الملاين
    من أدب القنيص :
    الكلاب في الأصل غير متوحشة وبالتالي عند القنيص تصيب الفريسة في مقتل خاصة المناطق . الحساسة لتشل حركتها… الكلاب اليومين ديل في الخرطوم سوقها واقع بعد موجة الهجمات الضارية الشهر الفائت على المواطنيين…..
    هجار ….
    غايتو أنا إخترتك لشرح معاني و مفردات الحقيبة زيادة معرفة وكدى …كلمات تستحق ذلك لما يتوفر فيها من موروثات البادية ….وأدبيات رحلات القنيص والصيد شايف في أمدرمان حفرو ترعة كبيرة يمكن تجيب لينا صيد وأرانب…ووزين وأم سيي سيي…الصيد دا إتعلمتو كبير يعني 14 سنة

    أبكرون ….بدون زعل …تعليقك الأخير دا مسيخ …يا أخوي ما تفهمني غلط كدى راجع كلامي …
    حاجات الحقيبة دي أقصد ما شايفنها ….بعد المطاعم الفاخرة ومحلات الآيسكريم التي تملأ العاصمة
    والطماطم والبطاطس الرخيصة اليومين ديل….بعدين ما تنسى زمان كان في رقيص العروس والرحط
    طبعاً …جماعتك شابكننا زفاف لزوم الزوغة ما الدوخة ….
    يل جماعة شايفني مركز على حاج السلاوي….. وأبكرون ….وهجار….
    حاج السلاوي أول من تعرفت به…. وفرسان الحقيبة أبكرون وهجار …ديل شفوت ومقطينها…

  199. هجار قال:

    الاخوان الاعزاء جميعا .. سلام .. السلاوي كيف حالك .. الويك اند بتاعنا نحنا معروف .. الدمام .. حريق .. كنكان .. قليل من الدومنة (الضمنة) التي لا اجيدها عكس الكنكان والحريق . طبعا انتو في جدة ويك اندكم غير كما جدتكم .
    د. شمباتي ياخي طل مرة مرة … الدنيا تبقى ما فيها مره
    الاخوان .. ابكرون والفولاني .. سلام عليكم .. ياجماعة انا في راي المتواضع .. زمن الحقيبة ما زي الزمن دا وكل الظروف والعادات والتقاليد والاعراف تختلف كليا من زمننا دا بالتالي المؤثرات الخارجية والظروف المعيشية تؤثر على الجنسين .. يعني زمان مافي بنات شغالات ولا في الجامعة ولا في المواصلات والاسواق ، يعني في البيت وبس ودا يخلي الجسم ينمو بطريقة معينة.. الراحة ، كثرة النوم كان سمعتو بنؤوم الضحى فيقوم الوضع دا يخلي جسمها يكون بالطريقة العجيبة المحيراك دي يا الفولاني) وبعدين جواب ود الرضي دا ما تاخد بيهو لانو الجماعة ديل معظمهم او كلهم اميين ولمن سألوه السؤال دا كان اقرب مخرج ليه هو الاجابة دي .. لكن منطقيا دا ما معقول (يعني ود الرضي نفسه القال طابق البوخة … الخ) ودا يناقض كلامه كليا. بعدين الجماعة ديل زمان ما كانت الدنيا شاغلاهم بالطريق البنشوفها الزمن دا .. يعني يفكروا على راحتهم ويتغزلوا في الشافوها والماشافوها بالخيال زي ما قال اخونا ابكرون ومستعد الواحد فيهم يسافر للصعيد عشان يشوف واحدة ويكتب فيها ويوصفها لصاحبه ويجاريه في وصفها كانو شافها واهل الموصوف يعلمو ذلك ولا احد يعيب او يستنكر هذا الشئ بل يحكى ان احدى الامهات بالغت في تدليل ابنتها الى درجة انها تسأل الناس هل هناك شئ اكثر من هذا يمكن ان ادللها به فقيل لها ما فضل ليك غير يغني عليها الشاعر الفلاني ، فما كان منها الا ان احضرتها له وقال فيها بيتين لا استحضرها .
    الاعشى
    ودع هريرة ان الركب مرتحل .. وهل تطيق واداعا ايها الرجل
    غراء فرعاء مصغول عوراضها .. تمشي الهوينا كما يمشي الوجي الوحل
    كأن مشيتها من بيت جارتها .. مر السحابة لا ريث ولا عجل
    تسمع للحلي وشواشا اذا انصرفت .. كما استبان بريح عشرق زجل
    امرؤ القيس :
    تقول وقد مال الغبيط بنا معا … هلكت بعيري يا امرؤ القيس فانزل

  200. هجار قال:

    ابكرون لقيت ليك نظارة عند البشاوري بس المطلوب تجيب لينا العينين الاتنين عشان نشوف المقاس .. خلينا نغطي الحاجات دي من الناس ديل ولا رايك شنو مش كدا احسن

  201. أخي هجار لك التحية … وشكراً على التعقيب الجميل … لكن صحبك شايلها معاي وما قال حاجة….والله يا هجار ناس الإذاعة من فترة كدى منعو بعض الأغاني (يا نديمي – القبلة السكرى- وأخريات ..طبعاًورا الحكاية دي ناس تانيين …طبعاً شعر الحقيبة ما عارفين معانيهو وألفاظه …والله لوكانو عرفوها كان منعو تقديم برامج حقيبة الفن … هذا التراث الخالد أبداً …
    سؤال :

    في هذا الزمن نضب معين الإبداع …لأن الشباب إستسهل المسألة لذا ظهرت الأغاني والمعاني الهابطة….
    مع تقدير إحترامنا لبعض المبدعين لكن الكثرة بتغلب ….وبرضو ما تقطع (المودوع) نواصل وحقو بعد الحقيبة نمرحل المسألة (صديق مدثر -تاج السر الحسن – مبارك المغربي على سبيل المثال) الصحافة مشغولة بالإنتخابات وجرجرت الفنانين …عليك الله ماشينة…حيقولو شنو ؟

    نبني مدارس نرصف شارع نبني جســـــــــــــــــــــــــــــــــــــــــور
    نوقد شمع الأمل الضائع منذ دهووووووووووووووووووووور

    هو الواحد ما عند التكتحها يقول ليك ح أسوي ليكم ح يجيب القروش دي من وين؟
    يا جماعة مستنين الرحلة وشيرنقنا جاهز وكل عدة الأقاشي

  202. هجار قال:

    الاخ صديق .. سلام .. ياخوي ابكرونا دا ما شايلها معاك ولا حاجة وبعدين زي ابكرون دا زول حساس جدا وزوقو رفيع ودا بظهر ليك من اختياروا لاغاني الحقيبة البيشارك بيها .. وكمان انت اصبر عليه شوية امكن الزول دا مشغول اسع (هسع) .. طبعا اسع دي اديتنا فيها درس وانا قربت ازعل لكن تاني نعلت ابليس .. وما دام الجو صافي ياخوي انوضح ليه شوية … هسع كما ذكرت انت لغة عربية اختصار لـ (هاالساعة او هذه الساعة وايضا اقول انا اسع اختصار للساعة وهي ايضا لغة عربية فصيحة جدا جدا واقرب واقل وادل من هسع وابلغ لانك لما تقول حضر فلان الساعة ابلغ من هذه الساعة .. واذا في زول غالطك فيها وقال ليك مصدرها وين قل ليهو سماع .. حلوه دي؟
    مع خالص تحياتي وودي

    • حبيبنا فارس الحقيبة سلام ما في زعل المنتدى ديمقراطي كما قال الزعيم لكن ….ما كل واحدة ليها مقام

      هالساعة ( الهاء للتنبيه) إشارة للفت إنتباه السامع…
      حضر فلان الساعة (خبر) ودي مقامها يخلتف حسب سياق الكلام . .

      عموماً حكاية الزعل دي (شيلا) من راسك.

      كراكاتير الرأي العام صباح اليوم :

      حكاية تأجيل الإنتخابات دي شيلا من راسك .وشكراً على إطلالة اليوم من روائع الحقيبة (متى مزاري)

      حقو الجماعة في (مودوع تأجيل الرحلة) نشوف دي من راس منو؟

  203. هجار قال:

    ديسو فوق درعو
    من حجابو يميل خيزران فرعو
    جيده جيد غزلان
    فى العسين برعو
    و النهيد رمان
    ما انهشم ضرعو

    متى مزاري أوفى نذارى…واجفوا هذا البلد المصيف

    ما أقول امتى المزار……..إلا تجرى دموعي….. الغزار

    زارني ناسم شاقني المزار…لو يزورني الطيف يبقى كيف

    ياخصيب السوح امتى اطوفك……..وأستريح الروح من قطوفك

    ياحبيبى إن شاء الله أشوفك………في نعيمك…… وظلك وريف

    أشهى…. والآمال يفرحوني…….مالي إلا سجعي…….ولحونى

    صرت ابغض من ينصحوني……..هل تجامل وترسل لي طيف

    امتداحك بقى لي قراية…………لي تملى القرطاس مراية

    الوحايح فصمت عراى………ها جزا من يعشق ظريف

    شعرك اسود زى حظ حسدوك……نور تضاحك بدرك فصودك

    كم غضنفر…. فاتكابو سودك…….والمها تهواك …..يا خشيف

    عفوك اسمح لأجلك ثناى…………..لا امل من قبلك ….عناى

    عندى مرك حلو يا مناى…………والذي يرضيك هو اللطيف

    يا ما عاشق وما هو وافى………ويا ما شاعر يقصد عوافى

    مثلهم من يعشق ..قوافي……..ومثلنا من يعشق……. عفيف

    يامحجب صاين… جمالك………..يا مهفهف بعضك امالك

    دام زهاك ..ودايم… كمالك………يا وحيد القدر…. المنيف

    يا رشيقا حسنك….. نمالك…….قل لطيفك هاجرنى… مالك
    دمعي كف وكفى انهمالك………..إن بعد الصيف الخريف

    يا لهيبي…. الزاد اشتعالا…………لي جمر الغضى انتعالا

    يا نسيم المحبوب تعالا…………من لريحك ارحم ..بهيف

    يا امانى …..من كل واقب……..ماله طيفك لي ما هو راغب

    هل في طرق الأحلام مراقب……أم يحاذر امرا…… مخيف

    إن أقول الثنا يا جحاجح……….فهو منه واليه ……..راجح

    إن تزنبو ترى وزنه راجح……..خلى معنى و الروح خفيف

    السلام ما ابتسمت زهورك…………ما تلألأ رف نور نهورك

    ما جلت بسماتك …شهورك………..يبقى لي متكأك…..قطيف

  204. ما أروع قصائد الحقيبة … إنها ترد الروح

  205. مشكورين على الإستقبال الحار

  206. طارق أب أحمد قال:

    ابو الزيك
    فتحت بيت البكا دا تانى

    أبكرون :-(سلولو : الدموع دي بصرفوها عند الميلاد قِرب …قِرب جمع قربه…بس في ناس قربهم بتجف)

    السلاوى:- (الدميعات ما خلاس كملن يا هجار ..بقينا نبكى دراى كلين )

  207. حاج أحمد السلاوى قال:

    وتااااااااااانى قام جاب سيرة البحر ..

  208. السودان السودان بلد الجدود الزمان

  209. طارق أب أحمد قال:

    تاني قام جاب سيره المحيط

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل الخروج / تغيير )

Twitter picture

You are commenting using your Twitter account. تسجيل الخروج / تغيير )

Facebook photo

You are commenting using your Facebook account. تسجيل الخروج / تغيير )

Google+ photo

You are commenting using your Google+ account. تسجيل الخروج / تغيير )

Connecting to %s