أسئلة وردت على خاطري منذ أن سمعت خبر ترشيح ياسر عرمان لرئاسة الجمهورية من قبل الحركة الشعبية لتحرير السودان و هي : هل عدمت الحركة الشعبية الكوادر المحترمة ؟؟؟
هل عقمت حواء الحركة الشعبية من ولادة أشخاص محترمين ليكونوا واجهة مشرفة لها ؟؟؟
لماذا ترشيح ياسر عرمان لهذا المنصب و هو الشخصية الشمالية الأكثر جدا في الحركة الشعبية ؟؟؟
عندما كنا صغار كنا نسمع و نردد الأناشيد الحماسية و في مقدمتها
ياسر عرمان
يا البشير
دا شيوعي جبان
يا البشير
خان الأوطان
فهل غفر الشعب السوداني لهذا الخائن ليصبح رئيسا له ؟؟؟
حدثني شخصيا صديق لأخي الشهيد كامل الشيخ و قد كان مجاهدا و تم أسره في العام 97 و لكنه فر بأعجوبة من قبضة الحركة الشعبية منذ سنوات قليلة .. حدثني بأن الغرفة التي كان يعذب فيها المجاهدين مكتوب أعلى بابها
إذا لم تجد الله فستجد ياسر عرمان
قصة اخرى رواها لي صديق أخي … كان ياسر يتحدث إليهم بصورة استفزازية فيها من الكفر ما فيها حين قال
اين الله … انا الله هنا
هنا ثار أحد المجاهدين و قال بصوت جهوري : إذا كنت الله .. اعمل ليك بلد تانية و سميها السودان و احكمها و ريحنا
و قد استشهد المجاهد من فوره بعد ان قتله جنود الحركة الشعبية و فاضت روحه مطمئنة إلى بارئها
فهل هذه شخصية يستقيم ان تحكم شعب السودان الشمالي المسلم الغيور على دينه ؟؟؟
بعد الانفصال المرتقب سيكون هناك سودان شمالي مسلم .. فأين سيذهب هذا الجبان ؟؟؟
إنشاء الله
ياسر عرمان شخصية متهمة بجريمة قتل في إحدى الجامعات منذ سنوات طويلة و الجميع يعلم سبب خروجه من الخرطوم بعد أن كان شيوعيا و التحق بخط الحركة الشعبية لتحرير السودان ليصبح أحد المناضلين المزعومين هناك ؟؟
فهل هذه شخصية جديرة بقيادة السودان الشمالي ؟؟؟
فهو غير مقبول من قبل الجنوبين في الحركة ناهيك عن الشماليين الاسلاميين
الواضح أن الحركة الشعبية تريد أن تقحم هذا الشخص في دوامة لا قبل له بها .. و من ثم التنصل عنه بعد الانفصال الحتمي .. و بذلك فهو كرت محروق في اللعبة
سياسة قذرة تمارسها الحركة الشعبية مع منسوبيها الشماليين في محاولات جادة منهم لاخراجهم من عباءة الحركة العشعبية قبل الانفصال … و يستاهلوا أكتر
الواضح تماما أن الانتخابات القادمة بها أكثر من مرشح و فائز واحد و هو المشير البشير و هذه معلومة معروفة للجميع سواء قالوها او انكروها … لهذا نجد ان شخصيات قيادية كبيرة في المعارضة لم ترشح نفسها – حتى الآن – مثل الصادق المهدي لعلمهم بنتيجة الانتخابات مسبقا .. هذه فطنة سياسية من القيادات المحترمة .. و لكن ياسر عرمان … لنسأل أنفسنا هل هو محترم ؟؟؟ و قد ترشح هذه الشخصيات المحترمة نفسها فقط من اجل توزيع الاصوات و اعادة جولة الانتخابات .. و لكن هيهات
سوداننا 
مشااااكل سلااااامز
يا مشاكل نحن لا دايرين شيوعي وكمان من الحركة يحكمنا ….لا دايرين جبهجي من المؤتمر اللاوطني
وان شاء الله لحدي شهر 4 تجي طااااامه كبري تشيلهم الاتنين…
واذا عرماااان (وهي كلمه زفره في العامية السودانيه) قتل واحد في جامعة النيلين وعذب ناس في الجنوب …الآخر برضو بدأ عهده بقتل 28 شهيد في رمضاااان ودفن بعضهم احياء ….وغيرهم وغيرهم …..ولو حكوا ليك عن تعذيبهم للناس يمكن تشيب قبل يومك……
حمي الله السودان مستقبلا منهم جميعا………
اخي الكريم مشاكل
نتفق معك ونختلف جدا ، يترشح ياسر عرمان ، كيجاب ، البشير ، ود نفاش دي ما المشكله هل نحن شعب يحترم حرياته ويناضل من اجلها ؟ ماذا تعني لنا الإنتخابات ومن هم المنتخبين قبل الناخبين ولماذا هذه الحمي المستعره وراء السلطه ، لمزيد من تشريد العاملين الشرفاء وقتل وتعذيب كل من يخالفهم الرأي اين هم من شعاراتهم الإسلاميه الجهاديه ، اظن ان من اكبر المهازل ان يترشح اي مواطن شريف وهو يعلم انه لا شرف لخصومه
أخي الكناني سلامات ….
إنت عارف اليومين ديل هناك حمى تسجيلات لاعبين الكرة ومفاجآت رؤساء الأندية …والكلاب السعرانة …التي أبيد منها 750 كلب في يوم واحد لو قدر أن عدد كلاب الخرطوم فقط 5 مليون دي حتكون كارثة … بتأكل من وين … مخلفات هذه الكلاب تملأ الهواء المغبر بالأتربة يعني الجراثيم تنتقل للطعام المقدم بواسطة الباعة المتجولين… ويغمر كبابي ستات الشاي …كنت أتمنى أن يلتفت أحد المرشحين لمعالجة هذا الأمر…(برنامج إنتخابي جاهز) طبعاً بالغرب هناك برامج مثل حماية المخنثين وطرائف كثيرة … يا أخي مشاكلنا كتيرة والبركة في كلاب اليومين ديل عملت موضوع لعلها أرادت أن تلفت الإنتباه لأنها جيعانة وما لاقية تأكل … تصدق حتى الحيوانات باتت تفهم في بلادي … وبتفتش عن حقوقها …لكنها أضرت بعض الأسر ضرر بليغ فما بالك .بما يفعله الإنسان العاقل ببني جلدته…
يا كناني في واحد كيشة بلعب (دمنة) عمك قال ورق إذاناً لفوزه يعني حيمقلب الجماعة…تصدق ماسك بلاطة…يا عم السلاوي إن شاء الله أنا بقيت حريف شوية تحياتي للجميع يا الفكي أبكرونة شنو الحكاية ما تدينا بخرة كاربة تفرتق اللعبة دي …
مشاكل سلااام
اعتقد آآآآآآآآآآآآآآآآ الحركه الشعبياآآآآآآآآآآآآ ارادت ان تحرق عرمان لان نتيجة الانتخابات محسومه للرئيس البشير ولا احد يستطيع منافسته ولو كانت الحركه تضمن الفوز بمنصب الرئيس لما تراجع سلفاكير وباقان خلف عرمان لكنهم ربما نكاية فى المنكورو ارادو ذلك لعرمانحليفهم منذ قتله لبلل والاقرع ايام دراسته الجامعيه
اليومين ديل في رندوك مفاده لغير الحريف إنو …ماسسسسسسسسسسسسسسسسسسسسورة
مشاكل سلااااااااااااااااااااااااام
إنت عارف وردي غنى زمان وقال :
ولمثل هذا اليوم كانو يعملو
سلام…ده ما اخر الزمن ….بالله كدي اتخيلو معي عرمان رئيس الجمهوريه ..قولوا فازفي الانتخابات انتو بس اتخيلوا…عليكم الله خيال ساي قادرين تتخيلوا …..حسبي الله ونعم الوكيل…الشوعيه ديل انا ما عارفه الانقاذ خلنهم اتفسحوا كده لاي….قال شيخ عرمان عارفين الشيخو منو ازرق طيبه الذي يقال انو كان شوعي…
مشاكل سلام يا حبيبنا….
يا مشاكل الناس ديل ضيعوك ودروك انت ما بتعرف صليحك من عدوك استغلوا الطيبة في قلبك وباسم (الـ ….) خدعوك .. الله ياخد ليك حقوق ويجازي الظلموووك
ولدنا العزيز الباشمهندس مشاكل …وبقية صفوة الأخيار ..سلام .
لقد ارتضينا جميعاً بالديمقراطية العرجاء نظاماً للحكم لإدارة دفة شئون البلاد بعد غيبة طويلة سادها نظام شمولى يعلم الجميع كيف وصل إلى سُدة الحكم وأين كنا وأين وصلنا دون الخوض فى تفاصيل ذلك ومن ثَمّ عدنا مرة أخرى لتداول السلطة عن طريق الإنتخاب الحر والمباشر مما يعنى أن يكون هنالك اكثر من مرشح للجلوس على كرسى الرئاسة ..فلماذا نحجر على الآخرين التقدم والترشح لهذه الرئاسة التى يفر منها الصحابة الأوائل عند إختيارهم لولايات الأمصار بعد إتساع رقعة الإسلام فى عهد الخلفاء الراشدين وذلك لأستشعارهم للمسئولية العظيمة التى يجهلها مرشحو اليوم على إختلاف مشاربهم وإتجاهاتهم السياسية الذين يسعون بكل ما آتاهم الله من قوة للحصول عليها ناسين أو متناسين تبعاتها ومآلاتها الجسيمة يوم لا ينفع مال ولا بنون ..ومن هذا المنبر ودون التحيز إلى فئة أو طائفة نود من رئيسنا القادم أياً كان لونه السياسى ولمن قدّر له الله أن يكون زعيماً لهذه الأمة أن يتق الله فى شعبه وأهله وعشيرته ..فمن يستطيع أن يلبى متطلبات الشعب للعودة لحياة طبيعية خالية من الكدر وشظف العيش مرحباً به..نريد رئيساً ينهى حالة الفساد المالى والإدارى التى نعيشها اليوم بإعتراف أعلى هيئة رقابية حسابية فى البلاد..وإعادة ما تم نهبه من موارد البلاد والقصاص من الذين أساءوا إلى مقدرات البلاد واستباحوا أموال الناس بالباطل وأثروا على حساب المواطن المسكين. نريد رئيساً يحقق نزاهة وحيدة القضاء ويمنع التدخلات الجانبية والغير مسئولة ..يمنع الظلم والجور والتعدى على ممتلكات وأرواح الآخرين .. نريد رئيساً يعيد هيبة القانون ويحترم الإنسان الذى كرمه الله من فوق سبع سموات ..و….. و….. وقائمة المطالب تطول وتطول ..فإن كان الأخ ياسر عرمان باستطاعته تحقيق ذلك فمرحباً به وإن لم يفعل فليذهب هو وغيره من المرشحين غير مأسوفاً عليهم .
ولكن قل لى… يا مشاكل .. من منا معصوماً من الخطأ والزلل ؟..فلا يجوز لنا تتبع عورات الآخرين والإساءة إليهم كما فعل عراب النظام الأخ الكاتب الصحفى صاحب جريدة الإنتباهة .. فكلك عورات وللناس ألسن ايضاً… ولا نريد لنصبح يوماً ونجد أن كل صحفنا اليومية ملآى بالمهاترات والسباب ونشر الغسيل القذر من هنا وهناك ..كل المرشحين الآن على المحك و الشعب المسكين لن ينظر إلى عورات هذا ويترك الاخرين ..إنما يريد أن يعيش الحياة الطبيعية دون تكلف أو إجحاف.. فليأت كل مرشح ببرنامجه الإنتخابى ومشاريعه المستقبلية العاجلة غير الآجلة ..فالشعب لن ينتظر عشرين سنة أخرى لكى يبدأ حياته من جديد ..
لذا على كل مواطن واجب كبير فى تحديد هوية الرئيس القادم ..وعلى الرئيس اتلقادم أن يعلم ويعى المسئوليات التى تنتظره فلم يعد الأمر تشريفاً إنما هو تكليف ربانى ..فمن ولىّ أمر قوم ولم يعدِل فله الويل والثبور يوم الحشر الأكبر.. والظلم ظلمات ..ودعوة المظلوم ليس بينها وبين الله حجاب .ولنترفع عن الصغائروسفاسف الأمور .. وليعلم الجميع أننى لست مدافعاً عن ياسر عرمان أو غيره.. وليست لدى به أدنى صلة أو معرفة غير الذى يجرى على ألسن الناس وصفحات الجرئد .
فاتقوا الله أيها المرشحون الأماجد فى أنفسكم وفى شعبكم .
العم السلاوي
يا عمنا أسمع كلامي دى كويس ديمقراطية شنو؟
النبي الكريم عرفنا بأطوار الجنين قبل إختراع الميكرسكوب في العام 1750م خليكم من خلفان وطرشان-ووووو
الهدي النبوي نحن مقصرين في حقه… يا عمنا في موت وسؤال وحساب والله كل ديل ما بنفعوا
فلنحل مشاكل الحيعان والعطشان.. وسيبك من ذو … الوجهان والخرمان
السلام عليكم ورحمة الله وبركاته
الأحباب في كل مكان
الحبيب مشاكل الماقاعد يسوي مشاكل
الانتخابات إن كانت نزيهة الزول ده ما حايفوز لأن ناس الوطني الذين نظموا انفسهم جيداً على عكس بقية الأحزاب التقليدية وبعدين ناس الوطني ما يقصروا في نشر الغسيل القذر بتاع الزول ده ودمتم
الحبيب مشاكل…سلام..
براحة على روحك ياخوى,,ما يطق ليك عرق..زى ما ذكر ابكرون انو الجماعة ديل كتلوا ضباط فى الشهر الفضيل والدنيا قبايل عيد,يعنى زى عملية الامريكان فى صدام!!! كمان ما تنسى انهم كتلوا طلاب فى الحرم الجامعى ومواطنين ابرياء عزل لا يحملون الا اللافتات القماشية,,يعنى كلو محصل بعضو..
بس انا ما قادر افهم سر غضبتك (المشاكلية) دى على عرمان!!! ومن حق اى مواطن انو يترشح,,والحكومة البتدعى الاسلام وانها بتحكم بشرع ربنا وضعت دستور ما وضحت فيهو ديانة او نوع المرشح لرئاسة البلاد,مما ينافى وبصورة وااااضحة الشريعة الاسلامية وعقيدة الولاء والبراء,,يعنى بصراحة الجماعة ديل_الجبهجية_ما ناس دين..
اما بخصوص ترشيحهم لياسر,,فهو من قبيل كسب قواعد فى الشمال,,كمان عشان يسدوا الطريق امام علماء السلطان ما يطلعوا فتوى بانو التصويت لصالح سلفاكير حرام لانو غير مسلم!!! واظنك واعى للحتة دى كويس..
فليترشح من يترشح,ولكنا نسأل الله ان يولى امرنا من يخافه ويتقيه فينا…
ولدنا مشاكل سلام
الحبان في كل مكان سلامات
كتبت كلامي ده أمس ولحكمة ما يعلمها الله طفش، لهذا أصر على إعادة كتابته بإيجاز:
1) لا أعرف ياسر عرمان شخصياً ولا يهمني إن كان لا يزال شيوعياً أو تطورت أفكاره وغادر معسكر البلاشفة فكثير من المفكرين بمن فيهم بعض وزراء النظام الخالدين كانوا شيوعيين في يوم من الأيام لكن كل ما أعرفه عنه أنه قائد سياسي يحترم مبادئهويكافح أجلها ويستحق الإحترام، على الأقل أعرف عنه أنه متزوج إبنة دين مجوك سلطان الدينكا النجقوك، وبالتالي عندي هو أفضل أنموذج للسوداني الحق الذي يسمو فوق العنصرية المقيتة.
2) الإين مشاكل مرجعيته في الحكم على ياسر عرمان ما تم إرضاعه له ولرصفائه من قبل إعلام الإنقاذ اللذين لم يسلم أي خصم سياسي من سهامهم، ولكنت سبحان مُغير الأحوال أعداء الأمس أصبحوا حلفاء اليوم والراحل جون قرنغ إنتقل من خانة العميل والمأجور إلى القائد الوحدوي الملهم ..الخ. فالإنقاذيون تخلوا عن بعض إتهامتهم الجزافية وحالفوا وصادقوا من تقاتلوا معهم بالأمس فهل آن لمشاكل وأبناء دفعته أن يصحوا للون ولا يرددوا شعارات الغرض منها إغتيال الشخصية السياسية للخصوم.
3) الأهازيج التي إستشهد بها الإبن مشاكل تخاطب البشير عندما كان القائد الأوحد الآن سوف يخوض غمار المعركة ضد منافسين وبالتالي إنتفت صفة الأوحد، ومن حق منافسوه أن يأخذوا حصتهم من الإحترام كي يطرحوا برامجهم …الخ.
4) أعتقد أن العنصريون والمتزمتون والمتخدنقون في أفكار بالية قد لا يمانعون أن يكون الرئيس ياسر عرمان طالما هو شمالي ومسلم وأسمه ياسر، ربما على الأقل تيمناً بالأسم الذي يحمله، صبراً آل ياسر موعدكم الجنة كما قال المصطفى عليه أفضل الصلاة والسلام وهو الصحابي الجليل وزوجته سمية وهم من أوائل الشهداء في الإسلام وأبنه عمار الصحابي العدل رضي الله عنهم وأرضاهم.
وعشان كدة مافي داعي تردد هتافات الإنقاذ وإن كنت إنقاذياً فأعلنها صريحة وسنحترمك أيضاً طالما هذا إختيارك لكن ما تشركو وتحاحوا.
كسرة:
بديت السنة بداية حلوة يا مشاكل بشعر وحنان وكدة مالك داير تشترها على كل أهديك هذه الأبيات ولا أعرف شاعرها لكنها مستوحاة من مأساة آل ياسر:
يعذبنا أبو لهب ومن في جيدها مسد
لأن الحب قد نزلت سكينته في قلبينا تشع دُرر
تُضيء لنا طريق الله للجنالت والكوثر ….
ولك كل الحب والإحترام والسلام
أخونا فى الله الأستاذ ود البركة ..العبارة المذكورة أدناه وردت فى ماداخلتك ..لاكين ما قدرت أفهم المقصود منها بالضبط ..فهلا تفضلت علينا بشرح مفرداتها التى صعُب علىّ فهمها .ربما بسبب عراض الشيخوخة التى بدأت تدب فى أوصالنا
(” وبعدين ناس الوطني ما يقصروا في نشر الغسيل القذر بتاع الزول ده ودمتم “).
عبى كلٍ إذا كنت تدعو جماعة المؤتمر الوطنى للتمادى فى نشر مساوىء ومثالب ياسر عرمان ..فلا أعتقد أن ياسر عرمان سوف يسكت عن ذلك ..بل سيحاول الرد بما لديه من معلومات حتى لو لم تكن صحيحة ..من باب إشانة السمعة ونشر الغسيل القذر بالمثل ..وهذا ما لا نود أن يحدث ..لأنه لا يوجد إنسان كامل غير المصطفى نبينا محمد صلى الله عليه وسلم ..وكما ذكرت فى مداخلتى السابقة اعلاه أننى لا أدافع عن المدعو عرمان وهو الذى يرى صواب أفعاله جميعها ويتحمل كافة تبعاتها ولا أدرى ما رمت إليه الحركة الشعبية من ترشيحها لياسر عرمان لرئاسة الجمهورية وهى تعلم تمام العلم ضآلة فرصته للفوز.. ولكننى أرى أن يقدم كل مرشح للرئاسة ما ينوى القيام به من اجل رفعة هذا البلد الذى ليس له وجيع حتى اليوم منذ فجر الإستقلال …رفع المعاناة عن كاهل المواطن المسكين ..وكان من المفروض أن يكون الحاكم خادماً للمواطن ولكن وبقدرة قادر صار المواطن هو الذى يخدم الحاكم ..كل الإمتيازات والمخصصات من نصيبه ومن نصيب الوزراء الوزراء ونواب البرلمان ..وليذهب المواطن إلى الجحيم ..من المواطنين من لا يملك قوت يوم لعياله ولا حق الدواء أو الكساء..أو ليس الحاكم مسئولاً أمام الله عن حال مثل هذا المواطن المسكين ..أتحسبون أن هذا الأمر بالهين ؟ .. فمن رضى أن يكون رئيساً أو حاكماً وسعى لهذا المنصب تقع عليه مسئولية رعيته ..كلكم راع وكلكم مسئول عن رعيته ..فالأمر إذن ليس ترديد شعارات جوفاء خالية المضمون من ياسر عرمان أو أى مرشخ آخر للرئاسة الهدف منها الإستهلاك المحلى وتخدير الناخبين الغلابة المتعلين يخيوط الأمل الواهنة لحاكم يزيل عنهم مسغبة معاناتهم اليومية فى سبيل الحصول على لقمة العيش الكريم .
أخى الأستاذ ودالبركة ..مرة أخرى تجدنى أختلف معك فى مقالتك المذكورة أعلاه..وآمل أن أكون أنا أخطأت تفسيرها لغير ما قصدت إليه أنت شخصياً ..وأردد ما قاله الآخرون ولا يزالون .. أن أختلاف الرأى لا يفسد للود والمحبة قضية .
أعتذر بشدة عن بعض الأخطاء الطباعية المصاحبة للمداخلة … التى لا تخفى على القارىء الكريم والتى لم أتبينها إلا بعد الضغط على مربع إرسال التعليق ..وذلك بسبب السرعة .( يعنى المسالة ليست بحاجة إلى دروس عصر )
أستميحكم الغذر ..ودمتم .
الحبيب مشاكل
بعيدا عن العصبية وعن الشعارات
انا اسألك سؤال مباشر وهو : هل كل ما يقال هو الحقيقة؟
عندما كنا صغارا سمعنا وردي يغني لعبود
عندما كنا صغارا سمعنا وردي يغني لإكتوبر
عندما كنا كبارا سمعنا وردي يغني لمايو
عندما كنتم صغارا سمعتم سير سير يا البشير
هل هذه الحقيقة؟
هل هذا هو الحق؟
أنا لا أحب ياسر عرمان ولا الحركة الشعبية
ولكن ما دام ارتضينا صناديق الاقتراع
المفروض نلتزم بيها
عرمان يترشح
نافع يترشح
المتعافي يترشح
الحبيب مشاكل
انتو المستقبل
انتو الأمل
اتمنى أن تنسى ما سمعته من هتافات
لأن الهتافات كانت على مر الزمن
حق اريد به باطل
ليس كل ما يقال هو الحقيقة
الحقيقة توجد بداخلك
سلام تانى للاحباب..
الامير مخير اوجز فانجز,,ولكنى اضيف ان الانقاذ درجت على استرجاع شعاراتها كلما وجدت نفسها وحيدة فى خضم الظلام الذى ارتضته للشعب الطيب هذا,,ولكنها تذكر شعارات السب والقذف فقط,,فاين هى من(نأكل مما نزرع)؟؟ اول وابسط شعار لها فشلت فيه فشلا ذريعا..
سلامز
الحبان في كل مكان
متأسف على الرد المتاخر بس ظروف الزحمة و الجري وراء اللحمة
الحبيب أبكرون
لو ما عايز شيوعي و لا حركه ولا جبهجي .. بعد دا الا نجيب لينا محترف أجنبي .. يمكن ينجح مع الظروف القاسية و المعقدة في السودان الحبيب
الحبيب الكناني
بركة الجيت بركة الجيت
كلامي ما عن مين يترشح او مين ما يترشح … لكن هل كل مرشح يستحق أصوات الناخبين ؟؟
رأيي الشخصي انو البني آدم – إن جاز التعبير – ياسر عرمان ما يستحق حتى يكون مواطن في السودان الشمالي بعد الانفصال … المفروض يتعمل مجلس محاسبة للجميع … أو قانون أجتثاث الشيوعية و منسوبي الحركة الشعبية على وزن قانون اجتثاث البعث في العراق
زووووووول
كلامك منطقي و في السليم … بس منو البقنع يسوري
عبدوش سلامز مربع …. اللهم آميييييين … بس من خدعنا بالدين إنخدعنا له .
حبيب ألبي أبوي السلاوي
دايما كلامك عين العقل … بس انا ما من دعاة حجر الترشح للرئاسة – حاليا – أي واحد من حقو يرشح نفسو للمنصب دا … بس تتبع عورات الآخرين في السياسة واجب وطني … لانها هي البتحدد مين البفوز او ينهزم شر هزيمة .. و البداية من هنا
شمباتي كتب
اما بخصوص ترشيحهم لياسر,,فهو من قبيل كسب قواعد فى الشمال,,كمان عشان يسدوا الطريق امام علماء السلطان ما يطلعوا فتوى بانو التصويت لصالح سلفاكير حرام لانو غير مسلم!!! واظنك واعى للحتة دى كويس..
فليترشح من يترشح,ولكنا نسأل الله ان يولى امرنا من يخافه ويتقيه فينا…
فيييييييي زمتك دي يا شمباتي … عرمان دا بتقي ( الله ) فيك .. خليني من اي حاجة تانية
العزيز مخير … فهمتني غلط او فهمتك غلط
فالعنصريون او المتزمتون او المتخندقون في أفكار بالية ما ح يرضو انو اي مسلم شمالي يبقى رئيس للجمهورية في الشمال .. بل أي ( إسلامي ) فليكن شماليا او غربيا او شرقيا او وسطيا
كسرة
برضو الضفاري مستمر … بس بي جزمة نايك مسننة و عليها سم
ود الباشا
في السياسة … في لحظات يصبح عدو الأمس صديق اليوم .. و لكن في أي لحظة ممكن يرجع عدو الامس صديق اليوم عدو الغد … لكن نحن بره اللعبة دي و متفرجين من غير استمتاع عشان كدا عدو الأمس عدو اليوم عدو الغد
انا غايتو يا ابننا مشاكل كان اترشحوا عرمان والبشير وهتلر بدي صوتي لهتلر
—————–
http://www.sudanile.com/index.php?option=com_content&view=article&id=10015:———6-&catid=42:2008-05-19-17-16-29&Itemid=60
———-
ولسه الجري وراء السلطة والثروه اللهم شتت شملهم ياااااارب
ولدنا مشاكل ..سلام
( بس تتبع عورات الآخرين في السياسة واجب وطني … لانها هي البتحدد مين البفوز او ينهزم شر هزيمة .. و البداية من هنا . )
أعتقد إنو دا تصريح خطير جدا يا مشاكل ..معناهو بكرة الجرايد الحزبية كووووولها تقعد تنبش فى عورات المرشحين بعضهم البعض ..وإذا كان الفائز هو اللى حيكون أقل المرشحين عورة ..الترابة كالت خشومنا كلنا ..وخموا وصروا يا ناس السودان ..
يا إبنى ما تكون متهور كدا وتقول تصريحات زى دى … بالطريقة دى نكون جنينا عاى انفسنا وعلى بلدنا السودان كله ..
سؤال سغيروووونى كدا ..عرمان دا إذا كا صحى قتل ليهو طالب قديماً فى جامعة القاهرة .. وين البلاغ ضده وليه ما حاكموه ؟..حتى بعد ما رجع ..
ولو بدينا نحسب عن الذين تم إعدامهم والمفصولين تعسفياً والمفصولين للصالح العام والصالح الغرق والمصادرة أموالهم وممتلكاتهم ..مش حنخلص ابداً إلى يوم الدين ..مش أحسن كل واحد يحدد برنامجه الإنتخابى بس ويقول حيخدم الشعب كيف بدون التعرض للشخاص فى شخوصهم على مختلف ألوانهم وأشكالهم ..
ويبدو لى إنو عندك ثأر قديم مع المدعو ياسر عرمان .زممكن نعرفه شنو ؟ …شمارات بس .
وأنصحك توسع صدرك شوية وتتقبل الآخر بدون عصبية وتشنج ..وخلى المواطن المسكين دا هو اللى يحدد مين يحكمه مادام قبلنا تداول السلطة ( بضم السين ) بالطريق السلمية دى ..وحريقة فى عرمان وفى كل المرشحين إذا ما قدموا خدمة لناخبيهم وطلعت برامجهم ووعودهم الإنتخابية مجرد شعارات فارغة ..
وخلينا النشوف آخرتا شنو مع عرمان وغير عرمان !!!
يا أخوانا هاكم العربي دى:
(بيعت البلاد وكممت الأفواه ومرغت الجباه)
إهداء لطلبة الشهادة السودانية2010م
أغراض الحذف
الإجابة:
حذف الفاعل للخوف منه.
نموذج لبيان الأغراض البلاغية للحذف:
1/ واقع أمتنا لا يسر
2/ليوث يتقي الناس أذاها
3/ وما بعض الإقامة في ديار يهان بها الفتى إلا بلاء
لطلبة الشهادة 2010م
لا يلام الذئب في عدوانه إن يك الراعي عدو الغنم
الأخ مشاكل والزوار الكرام السلام عليكم …
ياسر عرمان
يا البشير
دا شيوعي جبان
يا البشير
خان الأوطان
تفتكر الناس العارفين الكلام دا ودخلوهو البرلمان بحصانة بستحقو انهم يفوزو ولا دى مصالح شخصية ؟؟؟ طيب لو قلنا الانتخابات سلفا معروفة نتيجتها فى داعى للخسارة المادية دى أنا فى دارفور وصدقنى البذخ الشايفو دا يحل مشكلة جوعى المعسكرات كلهم طيب كنا نصرف عليهم القروش دى واهو الفايز معروف … أو نخليها ديمقراطية وفى الحال دى منو الفايز يحكم سواء كان عرمان ولا باقان مادام الدستور بسمح بكدة … ياربى فى فجوة دستورية على أساس ان اهل الكتاب لا يحكمون المسلمين ولا أنا غلطان ؟؟؟
غايتو لو فاز ياسر ارحم مما يفوز مسيحى ولو عايز {ائي الشخصى لاخير فى هذا ولا ذاك ….. ربنا يحلنا من الورطة دى
تصدق يا حاج السلاوي لازم يكون في واحد حكيم في الأمة كما أنت في هذا المنتدى …. طيب الحل شنو؟
كلنتون لما كان غلطان إعتذر لشعبه، ممكن دي تبقي هينا ؟
ذي ما قلت سابقاً المسائل تارات قديمة … دايرين نعرف الشمارات .
تصدق الرئيس المرتقب ياسر عرمان أنا شفته في الجامعة سنة1985م وكنت بتابع المناظرات وعندي رأي وكما المرحوم بلل دفعتي بكلية التجارة والله صورته ما باتت تفارقني ويوم ما مات تصدق أبوي عقد معي إجتماع مصغر قبل أن تخرج الجنازة إلى مثواها الأخير بالقرب من منزل المرحوم ورا جامع الإدريسي وقال لي بالحرف الواحد إنتو طلبة ولا حاجة تاني يا ولدي أبعد عن السياسة ….
عارف لازمت الجامع ومرات أرفع الآذان في غيابه بجامع قدح الدم …من 1985 وحتى الآن نحن في محن الحكم والسلطة والأحزاب والديمقراطية …
وأختم قولي مثل ما قلت أولاً أنا برشح السلاوي للرئاسة ومشاكل يكون النائب يمكن يهدى شوية ويورينا برامجه.. حمى الله الوطن وفترنا من التجارب الكثيرة والمريرة ………… و سلام لكل الحبان
مشاكل..سلام..
انا انشد العدل فقط,,لا يهمنى من يترأسنى او يترشح او يكسب او يأكل من خيرات البلد,,المهم العدل اولا وآخرا..لكن ناس الجبهة خلاص عرفت العفيهم وما ممكن اقبل بى اى واحد من طرفهم,,الا اكون مطرطش عشان اقبل بعشرين عاما اخرى من الهوان والحرمان…
من محن الزمان الطايحة في
السودان
فوق راسو يبقى ياسر سعيد
عرمان
والله هنت ياسودان وهنَّ نحن
كمان
البلد يبقي فوق راسها مُرتزق
هوان ؟!!
رئيسو أعجمي متمرد طاشم وكمان
سكران !!!
ما ياهو ده زمانك يا مهازل
أمرحي
ألعبي
أرقُصي
سوي المحن ألوان
اصلو الزول فينا بقي ما بنهان عِلا في
السودان
آآآه وكمان آآآآآآه
الله يلعن الكان السبب صيعنا وصيع شيبنا
والشبان
ضيعنا
ضيع الأمِن والأمان
ضيع كل السودان
ملعون ابوكي بلد إن بِقى دليلكِ أعجمي أغلف
ورئيسِك كاتل مجرم عديل هربان
أعذروني يا حِبّان
على بعض غير اللآئق من الحديث والكلام
والله ده كله من غلبي
بس إنتو كمان
ما ياهو ده كلام أهلي أهل الحق
أهل السودان
واللهِ واللهِ وواللهِ ما هنت يوماً ياسودان
وبيني وبينكم يا أخوان
لو هو كان قايل بنخليها ليه
والله حرّم زولكم ده وهمان
ما تراهو أبليس لسه في الجنة عشمان
عجبي !!!
hl
هي لو ما هامله يحكموها 20 سنه الكيزان….!
أخى العزيز حسن حسون ..
بالرغم من أننا لا نعرف بعضنا البعض إلا خلال القائق الماضية التى أعقبت قراءة مداخلتك أعلاه ..لكننى أقول إنك رجعتنا للمربع الأول .. لقد قلنا أننا إرتضينا بهذه الديمقراطية العرجاء منهاجاً لتبادل السلطة تبادلاً سلمياً بعد حكم سلطوى فرض علينا أراءه ومعتقداته عشرون عاماً وبضعة اشهر فلماذا الإحتجاج على بعض المرشحين للرئاسة فى الإنتخابات القادمة فهل نريد إنتخابات ديمقراطية بها مرشح واحد فقط.. هل إعتراضكم على المدعو عرمان سعيد فقط .. أم على كل المرشحين الآخرين عدا الرئيس الحالى عمر البشير ؟وهذا مما يدلل على قصور فهمنا لمعنى الديمقراطية التى نسعى إليها ..
وأصدقك القول أننى لا أعرف المدعو عرمان هذا وقد لا ارضى به رئيساً للبلاد ولكن ماذا نفعل إن جاءت به صناديق الإقتراع ؟ وهذا ابلطبع زى حلم إبليس بالجنة ..
فيا اخى الكريم دعوا الأمور تمشى كما اقرتها الحكومة الحالية وإلى الإنتخابات فى ابريل إن شاء الله موعدنا..فالأيام والليالى تخبىء لنا ما لا يعلمه إلا الله عز وجل..
نسيت أرحب بيك نيابة عن إخواننا الأعزاء فى منتدانا هذا ..والإنترفيو معاك حيكون بعد الإنتخابات ..إتفقنا ؟
تصحيح …الدقائق الماضية .
ولا اعتقد أنها فاتت على فطنة القارىء العزيز ..المعذرة .
(الله يلعن الكان السبب صيعنا وصيع شيبنا
والشبان)
اللى هو منو يا أنسان
علا أقول لك قوله
ان بقى عرمان
أو بقى الشيطان
زى جور و ظلم
ديل الكيزان
لا حصل لا كان
اسمعو ياجماعة الله
والله أنا أبلد زول في السياسة
والديمقراطية البعرفها أنو الزول ما يكون عمل جريمة أو شارك في أي يعمل يشين الشخص أو ضد البلد حتي يعتبر أهل للترشيح وكل الديمقراطية البتصيبو أنو برضه ولو كان قد أجرم في حق البلد أو حق غيره، انو من حقو أن يدلي بصوته فقط.
لو اتفقنا علي أن هذا شيئٌ ضروري تعلوا نحلل بعض المترشحين :
1- البشير : ده جاء بإنقلاب فنسأل هل من حقو أن يترشح؟!!!
2- الصادق : التالته واقعه، وأتحدى أي واحد فيكم يقول لي الطوبه الفلانية في المكان الفلاني ختاها السيد الصادق، الله أعلم تلقوها (For me he is GOOD for Nothing) اديه الكلام وعدم الفعل.
3- عرمان حدث ولا حرج تمرد ورفع سلاح وهو واحد من الوصولو البلد للحالة التي نحن فيها، ومشكلة الجريمة المتهم بها تدل على عدم ديمقراضيتهواسمعوا تصريحاته
وتأملوها تدركوا نزعته وسطحيته
4- بالنسبة لبعض الآخرين والله مصيبة إن سمحنا لرئيس البلد أن يتعدي عمره الستين عاماً
مصيبة شوفو نقد، فاطمه عبد المحمود، وغيرهم كراكيب انا القدامك ده عمري فوق الخمسين وبحكم على نفسي بطلوع الروح، أخل الأوضه اقول لنفسي أنا جيت هنا عاوز شنو، يعني داخل أعتاب الشيخوخة، فما بالكم أن أكون مسئولاً عن بلد هام زي السودان
كل ما أقول له لكم إختاروا الشاب الذي لا تشوب سمعته شيئ بقدر الأمكان فليس هناك يوجد من هو كامل
ولكن السودان كبير برجاله وحواء والده
أنتو مالكم؟ شباب والمستقبل أمامكم مفتوح
غيروا ما بأنفسكم وبطلوا التبعية والتعصب غير الرشيد
والله من وراء القصد
وإنت يا طارق اب أحمدالله يهديك بتسأل عن
(الله يلعن الكان السبب صيعنا وصيع شيبنا والشبان)
انت لسه ما عارف سبب مشكلة دارفور أصحي يا نايم وحد الدايم
يا شيخنا يا شيخنا الشعر رمز إن حلينها يبقي مسييييخ
انت ما سمعت الله يرحمه الحسين الحسن قال خيل الشعر يرتاد الثريا
أمشي اطلع للثريا والله بما بتقدر لا أنت ولا غيرك إلا بالخيال
شباب خليكم (Creative)
ودمتم جميعكم
أخونا الكاشف الصغير حسن حسون ..سلام .
معنى كلامك دا إنو ما فى ولا واحد من المرشحين للرئاسة ديل ينفع يبقا رئيس ..نزلت فايلاتهم كوووولها ..ما عدا البشير ختيت سؤال ( البشير : ده جاء بإنقلاب فنسأل هل من حقو أن يترشح؟!!! ) لاكين ما جاوبت عليهو .عشان كدا بنديك الإجابة الما قدرت وما عاوز تقولها أرجع لخطاب الدكتور معتصم عبدالله محمود لمفوضية الإنتخابات وأقراهو كويس وحتلقا فيهو الإجابة الضائعة.. وتعال أدينا رايك بعد كدا إذا كان البشير من حقو يترشح ولاّ لا ؟
وبعد دا كووووولو ما وريتنا رايك من المرشح الكويس اللى ممكن الناس تعتمد عليهو وتصوت ليهو ..خليتها عايمة ..شباب والمستقبل قدامكم مفتوح..والسودان كبير برجاله ..وشنو ما بعرف دااااك !عاوزنك ترشح واحد وتقول دا الزول الممكن يرأس البلد الأربع أو الخمس سنين الجاية ..وكان جيت لرأيى الشخصى أنا بقول كفاية زول حكمنا عشرين سنة يستمر تااااانى أربع او خمسة سنين برضو حاكم ..المؤتمر الوطنى دا ما فيهو زول تانى ممكن يبقا رئيس ؟ دا شنو دا ؟ بس أبعدونا من الوزير العسكرى الكان بيغادى ما نفع وجابوهو بيجاى هناى دااااك وبرضو ما نفع… والدكتور الكان البلشفى هناى داااااك..
أخي أو أبني أو افضل زميلي (بس ما تفسرها) ايه رايك في أن أخبرك قليلاً عني ونتخارج من موضوع الإنترفيو ده أوكي؟
خريج جامعة الخرطوم أحمل درجة المجستير في العلوم المصرفية واتلمالية
إقتصادي إذا جاز لي ذلك
خبير معلوماتي من الرعيل الأول
مصرفي وكفاك
والله لو سألتوني أنا عاوز أخلي موضوع السياسة كله لو لقيت طريقة أنا عمري ما أدليت بصوتي ولم أنتمي الي اي حزب سياسي او حتى غير سياسي (لو لقيت لينا واحد بالله دلنا عليه)
بس الموضوع المرة دي خطير جداً جداً جداً
والعاقل من اتعظ بغيره أنظر ما يحدث الآن في ما يحدث في إيران هل لك أن تتصور معي تخيلاً:
– البشير : أحمد نجادعندو السلطه وما عارف يتصرف بحزم
– الصادق : كروبي السودان بوزع ورود وبس
– عرمان (ومن وراءه) : موسوي السودان (حتي لو فاز هو، سيحتج !!!)
– الترابي : خميني السودان في المرحلة الأولي الكل صدقه وفي المرحلة الحالية: رفسنجي رفسه الله، وطبعاًً بتكون لاحظتو الشبه بينه وخاتمي، وهو كده زي ما عاوز يرجع للسلطه وعاوز يرجع ليها، وهو وما قادر أو ما عارف كيف والأسباب معروفه بعضها نفسي والآخر عضوي (ويمكن كمان عاوز يبقي علي خامئني في نفس الوقت حيرنا والله)
المهم يازول خطورة أمرن،ا أصلو الأيام دي أي زول عاوز الديمقراطية (الديمو قراضية) الكل يؤيدها لو فقط بتجيبو رئيس للسودان ولو ما جابتو تبقي ديكتاتورية وتزوير وبقت الحكاية الأيام دي موضه أو موجه يركبها كل خائب
والمظلومين المرة دي نحن وفي كل مرة نحن المساكين ديل
بركبوا فينا عديل، وفي كل مرة مركوبين والله بقينا(…) نحن والله مساكين
والأخطر المرة دي أن لو قامت (حرب أهلية) حتقوم ياخوي فوق الخرطومعرفت ليهاأنت عارف وانا ما حأقول ليك
أنا بعد تفكييييير طويل وصلت لقرار أن أصوت للبشير
حتقول لي ليه أقول ليك
حتي يبقى الأمر كما هو، وعلى المتضرر أن يلجأ الي القضاء
وأحلق شنبي ودقني (أكل عيش والله) لو في قضاء ولا أقصد القضاء والقدر
ودمتم في حفظ الله اللهم اكفنا شر الإنتخابات
وخاصة ما سيأتي بعدها
آآميييييييين يارب العالمين
((وإنت يا طارق اب أحمدالله يهديك بتسأل عن
(الله يلعن الكان السبب صيعنا وصيع شيبنا والشبان)
انت لسه ما عارف سبب مشكلة دارفور أصحي يا نايم وحد الدايم))
ده يكون الصادق ولا نقد ولا عرمان
منو المفروض يصحى
حسن حسون
مشاكل دارفور بدأت من أواخر التسعينات عندما سلح البشير بعض القبائل ضد أخرى و هذه الأحداث بدأت أيام شهر عسل البشير و الترابى
بدأت أيام شهر عسل البشير و الترابى
بدأت أيام شهر عسل البشير و الترابى
بدأت أيام شهر عسل البشير و الترابى
بدأت أيام شهر عسل البشير و الترابى
من الذى مارس القتل أبتداء من مجزرة 28 رمضان مرورا بمجدى محجوب و د . على فضل و حتى الطالب محمد موسى قيل أيام معدودات
طيب شنو المشكلة ؟ أسمح لي أن أقول
الجماعة الماتو فاتو ان كان قتلهم البشير أو الترابي او عرمان وما ننسي الآية الكريمة التي تقول أعوذ بالله من الشيطان الرجيم
بسم الله الرحمن الرحيم
” مِنْ أَجْلِ ذَٰلِكَ كَتَبْنَا عَلَىٰ بَنِي إِسْرَائِيلَ أَنَّهُ مَنْ قَتَلَ نَفْسًا بِغَيْرِ نَفْسٍ أَوْ فَسَادٍ فِي الْأَرْضِ فَكَأَنَّمَا قَتَلَ النَّاسَ جَمِيعًا وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا ۚ وَلَقَدْ جَاءَتْهُمْ رُسُلُنَا بِالْبَيِّنَاتِ ثُمَّ إِنَّ كَثِيرًا مِنْهُمْ بَعْدَ ذَٰلِكَ فِي الْأَرْضِ لَمُسْرِفُونَ” صدق الله العظيم الآية (32) سورة المائدة
فياأخي الله يرحم الذين قتلوا وماتوا وحتما سيحاسبنا الله جميعاً
والقتل محرم والتعذيب حرام حتي للحيوان الصغير المضر فقد أمرنا، إن كان لا بد أن نقتله فاليكن ذلك بضربة ماضية حتي لا نعذبه ما أمكن ذلك
ولكن انظر أخي الي الجزء الثاني من الآية الذي يدعو الي إحيا النفس ففي حياتها إحياء للناس جميعا
وأنا هنا لا أدعوك أن ننساهم بل أدعوك الي أن تنظر الي الأحياء والحي أبقى وأفضل من الميت
هذه نيتي ولا غيرها
والمطلوب يأخي أن نتغير كسودانيين ولا نجعل أحقادنا تقودنا الي مزيدٍ من الضياع بل أن نعمل العقل فالمتربصون بوطننا أعظم وأعتى من معارضة رخيصةوكلام في السياسة لا يقدم بل يؤخر
وزمان اهلنا قالوا وهم صادقين ” ما دوامه الدنيا دي ما دوامه” والمثل يقول “لو دامت لغيرك ما وصلتك”
دعونا نخطط بهدوء بدون إنفعال ونعمل بنيات خالصةوإخلاص تام ونستقيم في أنفسنا وحتماً سينصرنا الله مسلمين مسيحيين أو حتي يهودالمهم النية يا أخي أرجوك أن تعمل عقلك كشخص منفصل ولا تتبع أهواء الآخرين
وقديماً قيل “أنت على دين من يفتيك” فإن أفتاك مالكي صرت مالكياً وإن أفتاك شيعيا صرت كذلك وإن أفتاك من أفتاك صرت مثله فلماذا ل نستفتي قلوبناوقلب المؤمن دليله وأنا قلت المؤمن ولم أقل المسلم
وأنا لا أنتمي إلا الي رأي فلذلك لا أصلح أن أنتمي لاني أعتقد أن من ينتمي يجب عليه من أجل الجماعة أن يمح شخصيته وعقله وفكره وصدقني هذا هو الحبل الذي لعب عليه شخص مثل الترابي كثيرا وما زال يلعب عليه حتي اليوم
ولا يهمني إن كان رأي يوافق الآخرين أم لا المهم إنه رأي انا وبإخلاص لبلدي وأهلي لسوداني
ولك أن تتأمل
سؤال أريد أن أعرف رأيك فيه
هل تعتقد أن صوتي بدون إنتماء له اي تأثير ؟
ليته كان له ليته كان له إذن لوجدت حزبي غير السياسي فهيهات هيهات
أرجو أن تنتبه عند الإجابة تأمل تأمل وتجرد ولك مطلق الحرية(في ديموقراطية يا أخوانا أكتر من كده) مع الإعتذار للحب الذي ضاع واصبح مهملاً
وموضوع تاني عاوز أعرف رأيكم فيه”تسمع كل يوم وحدة جاذبة”
شنو رأيكم كلكم في ” إنفصال جاذب” عنوان لافت مش كده، المرة الجاية أقول ليكم كيف إن شاء الله لو كنتم عاوزين نعرفي ولو كنتم عارفين يبقى ما في مشكلة
ودمتم بحفظ الله
واعذرونا على الأخطاء
سلام ياقبيلة،،
الأكارم بنو الكرام حسن حسون وطارق أب احمد وبقية العقد النضيد،،
نحن أبتداء” حقو نحدد ماهي مشكلتنا، وبعد أن نعرف المشكلة الحقيقية يمكننا أن نضع الأسئلة كيف شئنا ونطلب عليها الأجابات، لأننا بمثل هذه الطريقة سنكون كالمنبت لا أرضا” قطع ولا ظهرا” أبقي!!
فيا سادتي الأفاضل أعتقد أن مشكلتنا الأولي والأساسية هي ليست من يحكمنا فكل الموجودين في الساحة من طينة واحدة لا فرق بينهم فلكل منهم تاريخ باهر ومشترك، ولكننا يفترض أن نحدد أولا” كيف يُحكم البلد وبأي كيفية وعلي أي نظام حكم أو دستور، فلا زلنا نحن منذ الأستقلال وعبر الحقب الديمقراطية والعسكرية والشمولية نتحاكم أو نحكم بدستور ووضع أنتقالي، مش دي عملية مزرية وقصة عجيبة وغريبة زهاء أكثر من نصف قرن من عمر الزمان ونحن لا يوجد لدينا نظام حكم متفق عليه وواضح، وكلما أستتب الأمر عاد الوضع من جديد لمربع واحد، فمتي تصل البلاد لخط النهاية أو الميس أيها المتسابقون العُرج…
نعود ونقول الكلام القبيل لا توجد أحزاب رشيدة ولا ساسة ناضجين، فلا زال معظم الساسة يأتمرون باوامر خارجية ويتحركون كقطع الشطرنج، نريد ملعب سياسي وطني 100% لا يأتمر فيه أحد باوامر أحد من الخارج ولا يقبل تمويل او منحة من احد ولا يفعل باهله ووطنه الأفاعيل، أنظروا نتيجة الأعتراك والخصومات والتناحر من الذي قام بدفع ثمنها الغالي؟؟؟ ومن قبض الثمن؟؟
الي متي أيها الناس، أفيقوا ايها الناس ثوبوا الي رشدكم، لماذا نحن هكذا؟؟ كلما جاءت أنتخابات غُيبنا عن عقولنا واخذتنا سكرة وحمي الأنتخابات وأنجرفنا خلف العصبية والحمية ونادينا بدعوي الجاهلية وتركنا عقولنا في أجازة مفتوحة ونسينا كل التاريخ الماضي وأدخلنا أنفسنا في نفس الدوامة!!!
حتى متي هذا الحال، أليس فينا رجل رشيد؟؟
المشكله شنو يا طارق؟؟؟؟لا مافي اي مشكله اخوك عبد المنعم كرار ولا عصمت ميرغني طه ولا كرار …يروحوا ساكت وما ضروري يتحاسب القتله…! ولا ضروري ان يعرف اهلهم اين دفنوا …. ده كلو ليه عشان الطغمه الانقلابية دي تجي تاني وننسي …..انتوا يا سادة ابليس ما نازل الانتخابات دي عشان نديهو صوتنا……؟20 سنه من عمر البلد تروح وفق هوي المفسدين وما مشكله وعفي الله …..! عجبي
يا أحباب شكلنا متفقين، نحن محتاجين الي حكم رشيدولكن مختلفين في الطريقة وإختلافنا هو مربط الفرس
وهو ما يبحث عنه الأعداء ونقطة ضعف واضحة
تعرفوا إنو أكبر عقاب لهم أن نجردهم من السلطة والنفوذ وده مكان وجعهم (وجيبهم البخافو عليه) وانا هنا لا أقصد فقط الحكومة بل كل الأحزاب الخربة في الميدان
وده ممكن جداً ولكن عاوز صبر وتخطيط وما عاوز إنفعال
وصدقوني فقدنا وبنفقد الآن وحنفقد في المستقبل القريب والبعيد
بس زي ما قال الأخ ود الخلا الفرصة جات قدامنا احسن ما نفوتهافي الكلام ونعمل البنقدر عليه وصدقوني اربعة سنوات ولا حاجة في عمر الشعوب
والأيام دول
المشكله وين
لا أبدا مافى مشكله
عادى جدا الناس تموت عادى
تنادى للجهاد و نص البلد تموت فى الحرب
و يجيك الشيخ يقوليك ماتو فطابس
عادى جدا
كل يوم المراجع يطلع تقريرو
البلد بتتنهب
عادى جدا
ما دام المؤتمر الوطنى عندو نص السته
يبقى السرقه حلال و عادى جدا
زمان الكلاب لامن جاعت أكلت جرجير
هسى بتاكل بنى آدمين و برضو عادى
يحلف ستين طلاق بأنو مافى أجنبى حيدخل البلد و هسى عدد العساكر الأجانب أكبر 15 مره من العدد أيام الأستعمار
و عادى جدن
الأخ حسن حسون ..
أعتقد أنه قد آن الآوان أن ندع سياسة عفا الله عمّا سلف جانباً التى عانينا منها كثيراً ولا زلنا.. إذا أردنا لهذا البلد أن يخطو نحو الأمام ..ولابد كذلك كما نادينا مراراً وتكراراً بتفعيل سياسة الثواب والعقاب ( لاحظ الثواب أولاً ..) حتى يعرف الناس مآلهم..وكله بالحق والقانون السماوى حتى لا يضار أحد وكا نفس بما كسبت رهينة ..
كيف تريدنا أن ننسى كل الظلم الذى حاق بالكثيرين من أبناء هذا البلد من تعذيب وتشريد.. ومنهم من فقدوا أرواحهم فى غمضة عين ..ولا حساب ولا عقاب ولا مساءلة للجناة… مالكم كيف تحكمون ؟ والمصيبة الكبرى هى المتاجرة بالدين فى سبيل تحقيق مصالح دنيوية شخصية زائلة ..
إن الله يمهل ولا يهمل ..وكل أول ليهو آخر ..وما الله بظلام للعبيد .
تصحيح ..وكل نفس بما كسبت رهينة.
معذرة .
مين يحاسب مين؟؟؟
الأخ حاج أحمد السلاوي
من طلب منك أن تنسى ومن قال أنه لن يكون هناك عقاب ؟
أنا يأخي أتحدث عن طريقة للتخلص واسلوب جديد للتغيير
حقيقة أنا لن أقف للبكاء أو حتى التباكي
سأجعل ظلمهم وحزني دافعاً لي
الظلم حقيقة
ووجودهم وقدرتهم حقيقة
وتمكنهم حقيقة
ووجودي وضعفي حقيقة
وتشتتي حقيقة
وقوتي إن بحثت عنها أجدها في ضعفي وهذه حقيقة الحقيقة
وهذا ما أبحث عنه
لدينا مشكلة كبيرة فيما بيننا تتمثل في تفرقناوتشتتنا
لا تجمعنا مصيبة
بل تزيدنا تفرقاً
ونحن كشعب سوداني لسنا بالشطارة االسياسية التي نقول أننا نتسم بها
فنحن تأخذنا العواضف
وتأسرنا المواقف
فننسى مصالحنا
والعالم من حولنا تحركة مصالحه كل المصالح
أرجو أن تقرأ كتاب الدكتور محمد شيخون وفيه يقتبس من محاضرات الترابي عندما سألوه مرة عن أصلاح القطاع المصرفي السوداني كجزء من الإقتصاد السوداني فقال ” ما جئنا لنصلح الإقتصاد بل جئنا لنتمكن” هذا هدف واضح ولا لبس فيه ولا يهم غيره أي شيء
هل ترى أي عاطفه في هذا الكلام
كلام عملي واضح لا لبس فيه
لماذا ليس لديكم كلام واضح مثله
الموضوع طويل أرجو أن نعود اليه مرة أخري
سلام ياقبيلة،،
الأخوة الكرام حسن حسون وحاج أحمد السلاوي
نحن متفقون علي أن لا نتفق أبدا” ومختلفون جدا” علي الأتفاق وهذا هو حالنا فعلا” أخي حسن حسون، نحن الآن في مفترق للطرق والشمس قد آذنت بالرحيل والليل قد بدأ في أرخاء سدوله علينا وهذه المنطقة كما نعلم جميعنا مليئة بالوحوش والمفترسات ولا سبيل لنا بالمبيت هنا فلا بد من السري ولا بد من دليل يهدينا سواء السبيل، ونحن نعلم أنه يوجد علي رأس كل طريق من هذه الطرق دليل ينادينا أن هلموا اليّ فأنا دليلكم للنجاو وللطريق الصحيح، ونحن نعلم كذبهم وأفكهم فلقد جربناهم أجمعين فكلهم مخادعون، ولكن وبالرغم من ذلك وكما يوجد في ألعاب المتاهات فهناك طريق واحد صحيح يقودنا نحو النور وبر الأمان ويقف عليه أحدهم ونحن نعرفه ونعرف أنه لم يصدقنا أيضا” يوما من الأيام ولكننا مضطرون لركوب الصعاب والأنقياد له حتي نصل معه لمخرج من هنه المتاهة وبعدها يحلها ألف حلال!!
سلام ود الخلا
بصراحة النظرية بتاعتك دي ماوقعت لي. فاذا كان هو (و أنا طبعا ما عارفك قاصد منو ممكن الصادق أو البشير) كذاب ولم يصدقنا القول فما هي الميزة النسبية لكذاب على أخر؟ فأنا شخصيا لا اري اننا مضطرون للأنقياد لكذاب و نحن خبرنا كذبه من قبل. المسألة يا ود الخلا واضحة جدا (من غشنا فليس منا) و لك خالص الود و الاحترام.
الإخوة صفوة الأخيار .زسلام .
وكما قال أخونا ودالخلا نحن فعلاً مختلفون فى كل شىء .. مختلفون فى طرحنا للمسالة السودانية منذ أمد بعيد مختلفون فى تعاطينا للحلول لهاولكنه فى النهاية لا يصح إلا الصحيح..لأننا بصراحة لا نفكر بعقولنا بل نفكر بعاطفتنا الجياشة كما يقول المغنون وتصرفاتنا تحكمها ردود الأفعال.. ولهذا السبب نتخبط فى كل شى ..وقلتها من قبل واقولها الآن وغداً ..كفانا عبطاً وسفهاً وتمسكاً بسياسات عفا عنها الزمن واصبحت فى ذمة التاريخ لمن يريد أن ينهض ويتقدم إلى المام ..ضعوا سياسة عفا الله عمّا سلف جانباً .. واقيموا دولة العدل والإنصاف بتفعيل سياسة الثواب والعقاب … الثواب لمن أجاد وأحسن عمله والعقاب لمن أساء حمل الأمانة .. وقدوتنا رسولنا الكريم صلوات الله وسلامه عليه قال فى الحديث ما معناه : لو ان فاطمة بنت محمد سرقت لقطعت يدها ..فعندنا من يخطىء يُنقل من موقعه السابق إلى موقع جديد مترقياً ومن ينهب يُطبطب على كتفه ويُقال له : سماح هذه المرة ولا تعد لما فعلت مرة أخرى ( ويعود مرات ومرات).. إلى متى أموال الدولة تُنهب من ذوى القربى والجاه ولا سؤال ولا محاسبة ..إلى متى تُنتهك الأعراض وتُزهق الأرواح ولا سؤال ولا محاسبة .. إلى متى يأتى من يصحو باكراً ويفرض رايه وسياساته العرجاء على الآخرين زوراً وبهتاناً؟… وإلى متى تحكمنا البيوتات والطائفية ومن لف لفهم من أصحاب العقائد الفاسدة والضالة ؟..وإلى متى ؟..وإلى متى ؟ … واسئلة كثيرة جداً لو ظللنا نعددها لما أحصينا لها عددا..
دعونا من معسول الحديث الذى لا يقدم بل يؤخر كثيرا وهو الذى أبقانا إلى الآن فى مؤخرة الدول فى كل شىء إلا التنظير ..ولا اريد أن اعود بكم مجدداً غلى بوست سابق نقول فيه .. نحن كنا ..ونحن كنا ..ونحن ..ونحن ..ونحن فى مكانك سِر…
الله سبحانه وتعالى أمر بالعمل والإخلاص فى العمل.. فهل نحن فاعلون ؟
وخلونا النشوف آخرتا مع الإنتخابات شنو ؟
سلامز مربع
كتب الحبيب الوالد السلاوي
الأخ حسن حسون ..
أعتقد أنه قد آن الآوان أن ندع سياسة عفا الله عمّا سلف جانباً التى عانينا منها كثيراً ولا زلنا.. إذا أردنا لهذا البلد أن يخطو نحو الأمام ..ولابد كذلك كما نادينا مراراً وتكراراً بتفعيل سياسة الثواب والعقاب ( لاحظ الثواب أولاً ..) حتى يعرف الناس مآلهم..وكله بالحق والقانون السماوى حتى لا يضار أحد وكا نفس بما كسبت رهينة ..
فلا عفا الله و يحزنون
و و يجب أن يعاقب الجميع و على رأسهم البني آدم – إن جاز التعبير – ياسر عرمان على جرائمهم
و من ارتكب جريمة في حق الشعب سواء الحكام الحاليين او السابقين ..
غفر الله لنا و لكم
ولدنا مشاكل ..سلامز..
أهو إنت كدا جيت على الخط الصحيح ..ونحن لم نحدد شخصاً بعينه .والقانون يجب أن يطبق على الجميع دون إستثناء ..دا هو الصاح ..
عدّاك العيب .
تخريمة سغيروووونة .. الكلام دا خليهو بينى وبينك .. موضوع عرمان اهون بكتييييير من غيره !!!
سلام ياقبيلة،،
أخوي التلب اللزوم جاموس الخلا للرجال هزّام حبابك وحباب اليوم اللينا جابك..
أنا معاك 100% والقصة فعلا” واضحة جدا (من غشنا فليس منا)، وانا لم احدد شخص بعينه أو فئة محددة فكما ذكرت فكل الذين بالساحة مجروح فيهم ولا ثقة لنا فيهم البتة، ولكننا في مفترق الطرق، والوضع حرج ومتأزم، ونحن فقدنا البوصلة والتمييز الصحيح، وأبحث عن من يهدينا لسواء السبيل.
أخوك محتار وداير ليهو دليل يقودوا للطريق الصحيح،،،،
رسونا علي بر الله يهدينا ويهديكم..
عرمان او اوباما السودان كما يحلو لمنسوبى الهركه الشأبيه لتهرير!! السودان ان ينادوهو اليومين ديل طالع فى الكفر مافى شارع الا تلقاهو معلق صورتو مع علم الحركه.
والله يا مشاكل الزول دا منو خوفه . امبارح شايفوا عامل حشد كبير فى شمبات ومعاهو لينو وشايف الحافلات تنقل فى نسوان ورجال من مناطق نائيه فى العاصمه واخر يا صفيق واخر يا هلوله .
لكن ان شاء الله ما يفوز ولا يضوق الفوز وناس الحركه يحفروا ليهو ويرموهو هردلب ونشوفوا يتيم فى مائدة اللئام وطبعا راح نتلائم عليهو لئامه للابو لو ناس الحركه فكوهو بلوم .
عرمان هو احسن وافضل قائد للبلد دى وكفايه بس وقوفو مع الضعفاء وانا بديهو صوتي وكلي ثقه فيه
الله يكون في عونا من الحراميه
سلامز
مادام البوست دا لسه شغال
نقول السيناريو ( الممتع الجميل ) لما سيحصل للبني آدم – إن جاز التعبير – ياسر عرمان
بعد فوز البشير … كلها كم شهر و ينفصل الجنوب … يبقى عرمان بين ثلاثة خيارات
الأول هو الذهاب إلى جوبا … و في الحالة دي الجنوبيين ح يزلوهو زلة كلب في سلخانة
الثاني هو خروجه من السودان ليعيش في بريطانيا او امريكا او اي دولة أخرى … و تاني ما نشوفو في الخرطوم
الثالث و هو بقاءه في الخرطوم … و ساعتها ح يطلع ملف جريمة القتل … و كم جريمة تانية كدا خليها لمن يجي وقتها … يقبض ليحاكم … و في الآخر … إما يعدم أو يسجن سجن مؤبد
و خير الأمور أوسطها